Kimpu leh Kimpi – 5
Nipini zing kikhop tawp ciang Kimpu leh Kimpi zong a lawm a gual teng uh hopih in “dam maw?” “dam” ciin biakinn kong ah niangtui dawn kawm in a kimu kawikawi uh hi. A sangkah uh zong khat 3 bang hong sawtta, Nipini zingsang kikhop pelh ngeilo uh ahih manin theih zong tam deuhdeuh a, upate in zong it mahmah in nupi te bang a meltheih nuam a kituh liang uh hi. Kimpu bel a melhoih a, ahih hangin a khuahek manlang lua pian ahih manin nungakte’n zong a theisiam kei phial uh hi. Kimpi bel Zolia takpi hi a, Zongeina kemin zui a, ahi thei zah in puah a sawm hi. Ahi zongin amah zong Zomimio khua pipi ah college kah cih buang ki standard sak deuh ding mah lah a ci pian hi. Tua manin nupi ten “mo dinga hoih” a cih te uh hi a, a mel ahoih veva loh hang ithuai phinphian mahmah a, Kimpu zong a vaang tang’lah dekdek zel, lah hoihsa lianlo, a mizia lah iplah cih bang khat hi.
Niangtui dawn khin, a man masasa ciah khia pahpah uh a, khangno makaite leh niangtui sai teng leh upa pawlkhat bek omta cih ciang Kimpu leh Kimpi zong ciah dingin a kithawi uh hi. Gate a kaan laitak un phone hong ging a….
“Hello.. kua na hia?”
“Hong theilo kineih pahpah maw u Kimpu?”
“Ka cihtakpi hi, kua na hia… koi pan na?”
“Ha ha ha… phamawh kei nong theihnop kei leh… zan mah a phone nambat kipia a.. hmmm…”
“… zan mah a phone nambat kipia… aw, aw… Nuamno maw…?”
“He, na theihnoplohte hi ing ei..”
“Mawk peuhmah cia Nuamno aw, theihnoploh om kei e… na phone nambat save khalo ka hih cianga, sorry peuhmah ei..”
“Aw, hilai maw… kei a bang peuh save taak kei mah e… bye…”
“Na khawl phot in, banga nong gennop, na khia nai ken”
“..tuut tuut tuut..”
“Kimpi, tuni hawhna ding na nei hiam? Mualtung lam Lia leh Taang Lenmual ah i vakkhawm diam?”
“Huh, tu mah a Nuamno in hong phone hilo amaw… na zumselna ding bekin hong zang ken maw u Kimpu”
“Mawkmawk tua bang hi kei ei… Nuamno in bangmah genlopi, a phone khia hilo maw… ka sap kik hang la ut nawnlo..”
“Huh, kei tawh kisai kei, no gel kikal vai… na ut uh leh Lia leh Taang Lenmual ah va vakkhawm vo…”
“Tua bang pah vauvau ding hi kei veh aw Kimpi, Nuamno tawh ken bangmah vai ka neihlohpi…”
“Hoihtak hopihlo na hih cianga na lawm a heh aita ve… kei a bawmta a nong zat uh hilel ing e..”
“Kimpi, tua bangin ngaihsun kei in, ken nuamno a melhoih hang a gamtat luhek manlang sa lua hoihsalo, nang hoih hong sa zaw…”
“Na kamsiam tawh hong khemkhem ken maw… hong mutpuk ding na hi…”
“Kimpi hong theikhial ken maw…”
“Theihkhialh omkei, theician hizaw..”
“Tua leh ei omna tuak ah ciah mai ni maw, na boarder vuah hong kha ning maw..”
“Nang khak kul peuhmah keng, ka omna inn uh theilua ing…”
“Kimpi aw, hong hehsan kei ve… kei nang tungah hehlo ka hi maw… nong telkhialh man hi… khak na ut kei leh lah ci teitei kei ning… na pai in aw…”
“…………………..”
Tring….. tring….. tring….
“Hello… Nuamno, bang thu ahia? Nitak nitum ding hita a, bangthu lamdang om a hia?”
“Bang thu lamdang om kei e, tu sun kong hopih a nong hopih noploh mahmah ki lawmngaih neisak lua teh…”
“Kilawmngaih neisak hi peuhmah keng, na theihkhialh hi…”
“Hilua ei, Kimpi tawh kitona hong thei ngamlo hilo ding na hia?…. ha ha…”
“Kimpi tawh kiton mah ung, ahih hang nang ngaihsut bang hi kei…”
“Tun zong na kiangah om cih sim… a hehlua diam, kong hopih mawk hi e… ka khia aw?”
“Na khollai in… wait a minute”
“Tua leh bang?”
“Tuni no koi ah hawh… kei Kimpi tawh biakinn pan ciah khawm in ko omna tuak ah ciah, tun kei bek Hostel ah om lawmte lah vak khin, cimhuai lua..”
“Ko, kuamah in hong vakpih nuamlo uh cin a… ka lawmte tawh Lenmual ah nitum en a tu maimai hi ung… hong pai veee… u Kimpu..”
“Na takpi hileh hong pai mah ding hi veng, tangval tam lua dinga, kei val kha ning…”
“Kua mah om kei ei, ko lawmta teng bek hi ung.. ka lawmte in zong nang hong thei uh ei… hong mu nuam… theisiam hia??”
“Hah, …..[pai ding ka hia aw, pai leng Kimpi in a thei kha tam aw…].. no hong paizaw vevua…”
“Ko maw, pasal hostel ah hong hawh ding maw? U must be joking u Kimpu”
“Ka takpi hi e Nuamno, tu lai ciang numei pasal cih khawng kituambawlbawl nawnlo pi, a khangto lo gam bek ah tua bang hi, numei pasal kideidan cih om nawnkei… hong pai un…”
“Aw haw, tua leh ka ciah lam uh ciang hong baang nung maw, nitum hong en khin phot nung… the sun set is beautiful… kong phawk lua…”
“Ok, sure. Nitum khit ciang Hostel kong ah na ngak ning ei. Hong bang un, coffee khawng na dawn thei uh hiam….?”
“Dawn thei lua, i dawn khawm khin veleh…”
“Tua bel coffee stall ah hi a, tun bel kei bawltawm ding hiven…”
“Oh, that will be so special… ka ut lua u Kimpu.. ni tum ding hita, hong tungsuk pah nung aw…”
“Ok, see you… Nuamno, na lawmte bangzah?”
“Ko mi thum hi ung… one two three, ha ha haaaa…..”
Tua laitak in Kimpi zong a lawmnu khat in pasalte hostel ah a classmate te khat kiangah a sangkahloh ni a a class notes et ding kawm nuam in a paipih dingin Kimpi zawn a, amau zong pai dingin a kithawi uh hi. Pai pak a kileh kik pah ding a sawm uh a, tua laitak in a lawmte khat in hopih ahih manin minute 20 bang phone tawh a kiho phot uh hi; tua sung khempeuh Kimpi in a lawmnu ngak a, a man uh ciang pasal omna Hostel lam zuan in Kimpi te lawmta hong pai phei uh hi. Hostel a tun dawn uh lamkawi ah numei leh pasal kiho kawma nui lualua nuamsa lua a za uh a, lam kawi a suakphei uh ciang a lawmnu Nuamno te lawmta Kimpu tawh lamsiau (walking) a pai tawh akituak vat uh hi. Tua leh Kimpu zong a lawm Kimpi te lawmta a lametloh ban ah zingsang lama Nuamno hanga a kilungkimsakloh teng uh phawk vat ahih ciangin a mai sai biaibuai a, a khua ul bang a luang hathat liang hi. Kimpi in zong a mulo kineih in a peel a, a pelh laitak in a mit-heem tawh a et leh a u Kimpu in zong tua bang lian mah in na en phei a, lungsim lahho bih bang zaizai in a so hi….
“U Kimpu, tua i tuah na lawm Kimpi te lah na hopih het kei a” [gualzo kisa pianin hopih]
“Amau manlah hi ding hong hopih man kei mah ve uh aw..”
“Nang pasal hive cin, na hopih masak ding aive…”
“Pasal in numei hopih masa ding cih laibu ah kigelh tuanlo pi..”
“Himah ei, lawm Nuamno, kigelhlopi, u Kimpu cih dik hi…” [Nuamno lawmte’n na huh]
“En ve, na lawmten zong a ci pah vele Nuamno…”
“Ih hong ciamnuihna hisam e… Kimpi bel ei tawh na kikholh heh mahmah ding aive u Kimpu”
“No problem, heh a kul leh heh hen aw, phamawh kei… no ompeuh le uh cin…”
“Hehsuak taktak leh nang hehzaw ding na hi aw.. Kimpi in hong khen taktak leh aw…”
“Zong kingai kei ung e, a kikhawl bek hi ung”
“Kingailo kikhawl cih bang omthei diam? Nidang om thei, tu khangthak hun ah om nawnlo, na thei hia?”
WELCOME TO “NUAMNO NIANGTUI NUNNUAM STALL” cih a tun uh ciang Kimpu lutsuak in..
“I vek in coffee mah dawn thei tek hang mate”
“Nuamno Niangtui Nunnuam Sianu aw, coffee hai 4 nong suak thei diam?”
“He, hong suah pah ning ei, na tu un…”
“Awle, lungdam ei, hua pam ah na tu nung…”
“Awle, lungdam ei, hong tawi pah ning maw..”
“Awle.. awle…”
“Ni tum et a nuam hiam Nuamno?”
“Nuam mah ei, etlawm ngel hiven, nang kiphasak hong pai utlo, Kimpi hong zawt hileh pai dinghive cin”
“Khatvei pai ut mah ing e, sangkah kong tun tung lam khatvei lawmte tawh pai in, nitum ding laitak guah hong zu ding meii kaii sese hiveh aw, tua zawh pai kik nailo..”
“Kimpi tawh khatvei va pai le uh cin aive… na lelnop sinthu uh zong tam ding a, ha ha ….”
“Ha ha …. mawk aw… bang dinga amah vive gengen na hia? Hong deihsak pian maw, ahih kei leh nang tawh kikholh nawnloh ding na utna maw… tua bang ahih leh lah gensiang vet aw”
“Pasalte bel pillua uh cina na gen uh zuau maw tak maw kitheilo..” [hilua, hilua, lawm Nuam ciin a lawmten na huh uh hi…]
“Hilo, tua bang mi na tuakkha a hi, kei tuaci hetlo…”
“Pasal teng kibang khin uh cia… kheih, sorry, ka mit ah niin hong tu hiale…”
“Bang e, na mit ah niin hong tu maw. Koi maw…”
“Hong etsak o u Kimpu, ka mit siip lua…”
“E-hem…. e-hem…. e-hem…”
“U Kimpu bangci ahia, Nuamno mit ah tho tu maw? Poi mah si e, hoihtak etsak o… e-hem”
“He, a mit ah niin tu a, a etsak hiveng aw, no zong hong tu un, coffee maw, niangtui??”
“Ko leh ko na kizon nung, na lawmte in nuamsa kei kha inteh”
“Awle, Kimpi, na lawmnu in nuamsa kei kha mah inteh..”
“Ka mit siangta ei… aw! hua lai ah tu te kuate a,,,, Kimpi te hilo maw?”
“Kitheih khem bawl kei in maw Nuamno, na mit ah niin tu na cih zong a tulopi hi inteh…”
“Huh, nang Kimpi na muh ciang hong tuacih pah maw… paivo, ciah ni…” [ciin din sawm pah mawk, a gal pan Kimpi te lawmta in en giugiau….]
“Khol phot, tu lai,” ciin Kimpu in a khutpan len a, a tusak kik hi.
Kiho lah nuam nawnlo, a gal ah tu Kimpi te lawmta in lah a u Kimpu te Nuamno Niangtui Nunnuam Stall ah a muh vat ding uh umlo…. a suaktalo vive kimukhawm uh ahih manin kiho ding tawm mahmah a, ki et giaugiau, niangtui, coffee dawn a inn lam ciah baih ding bek a nuampen hong himai ta hi… life i cih zong maw, khatveivei ciang laklawh tak veh aw….. Kimpu leh Kimpi kimuh kik ding zong uthuai ngeungau khol kenteh… Nuamno leh Kimpi kimu kik ding zong bangthu teng a kidawng uh tam…
(zop lai ding)
Hau Za Cin
Phuitong Liim
Comment piaknop aomleh...