Kim Tuang mangpha khakna ~ Rev. Thang Van Lian

Kim Tuang mangpha khakna ~ Rev. Thang Van Lian

Kim Tuang, gam leh minam ading na naseppih lawmte sung pan kua hiam teng in phamna ningtui hong tulh un teh, cih nang um ngam ngei lo mate.

Kim Tuang, kikhen thei lo minam khat hi hang ci-in Siamah Dim Lun Mang kithah lai bang lungphona ah nang makai keei mate. Ahih hang kuaten na ngawng hong tan ding, cih nang um ngam ngeilo mate.

Kim Tuang, selung va bang a pil, milun kiciten na khetul guipite tem tawh attanin na sa hong sem nenin mei tawh hang keu ding uh, cih nang bek hi lo kuaman um ngam ngeilo mate.

Kim Tuang, na luang hong kivui ni dong nang hong thatte in na lutang sel cip lai ding uh, lutang om loin hong kivui ding, cih nang um ngam ngeilo ding mate.

Kim Tuang, na itte mah in a hing laipi mah temtawh hong at laitak na nungah nang gum dingin kua teng hong kipan ding, cih na mitkha ah a banbanin mu ding napi cin ni za val dong hong kidak koih lel ding, cih nang um het lo ding mate.

Kim Tuang, Zomi vai-in mulkim het loin nang thautawi lo khat hong bawlsiat laitakun tua hong bawlsia leh hong thatte mah na khualluatnate amau thei het lo mai ding uh mate.

Kim Tuang, kum 100 val bang Zomi Khristiante tangthu ah a piang ngei nawn lo mulkim huai leh lipkhap huai tual thahna nang tungah hong tung ding, cih nang bek hi lo amau a support mite in zong um ngam ngei lo ding uh mate.

Nang bang khangno gam vai thumu, hangsan leh veina nei khat galhiam tawi lopi gal man sa man bangin a om uh teh a meidawi luat zawk man uh hi, cih amaute kiphawk tuan lo mai ding uh mate.

Laizom melmate khutlum tawh mulkim huai takin kha na kiat ni hi ta leh ni 142 sung na luang hong kiselcip sung ahi zongin na luang hong phumna uh pan la khia in lam khang ken ah hong paih ding uh, cih nang um ngam lo ding mate.

Na luang hong kipham ni leh hanah dai na tan ni-in na it na ngaih, na muan na suan, na lamet mahmah lawm hoih teng kim kei si uh e, ci ngel ni teh mate!! Khuamial sung i tun laitak eima lim nangawn in hong taisan hi mawk a maw.

Kim Tuang, na luang tungtang ah hong delh pah ziahziah ding a na muan miteng gelkhia diamdiamin a om uh leh zong lamdang sa kei in! I Topa in nang hong gelkhiatsan ngeilo ding a, nang adingin thuman thukhenna lakkhia ding hi.

Kim Tuang, Topa Pasian in nang adingin thuman hong khensak ding a, na sisan takna leitang bek hi loin nipi khapi leh khuazing khuavakte in nang adingin Pasian mai ah teci na pang ding uh hi.

Kim Tuang, lungnuamin na pai in! Na veina leh na lamet Zogam Zomi mabante a zom dingin khangthakte kil bang hong khang ding uh hi.

More: ZRA leh Siamsin vaitawh kisai Kim Tuang ii Pulakna

Kim Tuang, nang a tawldam ta hi cia maw. Paisa na it na zuapa leh na it na ngaih tampite tawh kimu nucia maw. Migilote a kimuh nawnlohna mun thau suang a ukcipna leh mipi paulam a siatna bawlte om lohna mun Topa’ angah tawldam in maw. Rev. Thang Van Lian