Kim Jong Nam thahna vaitawh North Korea gammi 4 te Interpol Red Notice kipia

Kim Jong Nam thahna vaitawh North Korea gammi 4 te Interpol Red Notice kipia

Malaysia KLIA2 sungah Kim Jong Nam kisuamlupna vaitawh akizomding in aki ummawh North Korea gammi 4 te amanlang in matkhiatding in Interpol te’n “Red Notice” piakhia uh cih CNA pan kiza hi. Interpol pen leitung gamtuamtuam palik kipawl khopna “International Criminal Police Organization” ahihi.

Hih Interpol Red Notice kipiakvai tawh kisai in Malaysia Inspector-General of Police Tan Sri Khalid Abu Bakar inzong genkhiatna nei a, tua North Korea gammi 4 tepen Kim Jong Nam aki suamluphun laitak in KLIA2 vanlengtual sungah omding uh cihi.

Tua mi 4 tengin Kim Jong Nam ki suamluppen Airport sungmah ah gal et dinguh a, numei nihte’n guza atatsak kiciantak in amuhkhit uhciangin amauzong KLIA2 panin vanleng tawh alengkhia hiding uh kici hi.

Malaysia palik te hanciamna bek hinawnlo in, tu’n leitung gamtuamtuam palik kipawlkhopna Interpol in “International Arrest Warrant” apiakhia uh hita ahih manin, tua North Korea gammi 4 tepen amanlang in ki mankhiathei dingin ki lamen cihi.

Interpol Red Notice angah matkhiatding North Korea gammi 4 tepen: Rhi Ji-hyon (kum 33), Hong Song-hac (kum 34), O Jong-gil (kum 55), Ri Jae-nam (kum 57) ahi uhhi.

Hih North Korea gammi 4 tepen Malaysia gamsungah Kim Jong Nam akisuamlupma in atuamtek in alung uh ahihi. February 13 ni in Kuala Lumpur International Airport 2 (KLIA2) sungah kisuamlupna amankhitlian ciangin Indonesia, Jakarta lam zuanin lengkhiapah uhhi.

Kim Jong Nam sihna ahang taktakpen Macau City ciahding in KLIA2 sungah aom laitak amai ah “VX nerve agent” kici Chemical Weagpon kitatsak ahih manin asi ahihi. Atatsak pen numeinih hi a, ahi zongin tua numei nihte ii anungah asawlkhia taktak pen tulaitak Interpol Red Notice akipia North Korea gammi 4 te hiding kici hi.

More: KLIA2 sungah Kim Jong Nam kithahzawh khakhatsung thupiang te

Interpol Notice pen atuamtuam omsak uh a, avekin nam 8 bang phasak uhhi. Tualak ah nam 7 pen Color minvawh uh a, Red, Blue, Green, Yellow, Black, Orange, Purple cihbangin ciaptehna nei uhhi. Adang khatpen “Interpol-United Nations Security Council Special Notice” ahihi. ZD Sawltak #zomidaily