Kim Jong Nam thahna ah akihel Vietnam gammi Doan Thi Huong thu tawmkhat

Kim Jong Nam thahna ah akihel Vietnam gammi Doan Thi Huong thu tawmkhat

Malaysia KL Airport sung Kim Jong Nam thahna ah akihel numei nihte lakah khatpen Vietnam gammi ahihi. Amin Doan Thi Huong hi a, kum 28 phakhin hi. Vietnam gam ii khuapi ahi Hanoi City sung aom “Hanoi Medical University” ah zatuilam pilna sinin sang akah ngeikhat ahihi.

China Press te pulakkhiatna ah Doan Thi Huong pen University ah Pharmacy zatuilamsang kum 5 sungbang asinin sangkah ngei cihi. Apianna khua ahihleh khuaneukhat hi a, Hanoi City panin 90km bang agamlatna ah aom Nam Dinh khua ah asuak ahihi.

Apianna khua ah avengte khat ii genna ah Doan Thi Huong pen University ah Pharmacy pilna sinding in azinkhiatpen sawtsimta cihi. Kum 5 sung Pharmacy zatuilamsang pilna sin cih kathei a, ahi zongin Degree ngahmah ngahlo cih katheiciankei ci’n avengpa in genkhia hi.

Avengpa in Doan Thi Huong te innkuanpen atheihzawh kum 40 bang valkhin a, nungdiak in KLIA2 sungah Kim Jong Nam “VX nerve agent” tawh kisuamlum cih Media tuamtuam in agen ciangin Doan Thi Huong akihellam kathei a, lamdang kasa mahmah ci’n avengpa in genkhia hi.

Aneutung panin katheih hih Doan Thi Huong in mihingkhat thahlupngam nading zahdong in lungtang neiding in ka umkei ci’n genbeh hi.

Banghanghiam cihleh Doan Thi Huong pen alungnem, mihehpih thei khat hi a, apianpih lungsim puakzia pen bangmah in khelzo pakloding cihi. Tuaban ah University ah asin zatuilamsang tawh kisai pilna Pharmaceutical Knowledge pen mithahlup nading in zangdingin ka umkei cihi.

Doan Thi Huong pen akhua panin azinkhiatzawh asawt hangin innkuanpih meltheih tanau tetawh kimukhawm dingin ciahtheizel cihi. Apa pen galkaplui hi a, Vietnam War lai in akhe langkhat kitan hi. Anu pen 2014 kum in si ahih manin, apa in zikik nei hi.

Thukhenzum in mithat in mawhhi acih hangin hih numeino pen migiding in ka ummawh hi ci’n avengpa in genkhia hi.

Doan Thi Huong tawh thu akibawlkhawm ahi Indonesia gammi Siti Aisyah ii anu apa tezong atanu vaitawh lunghimawh mahmah uh a, ahehnemding, Moral Support piading in Malaysia ah zinsawm uh cih kiza hi.

More: Kim Jong Nam suamlupna ah akihel numei nihte “Murder Case” tawh thu kibawl

Siti Aisyah innkuanpih te’nzong ka tanu uh amigi mahmah khat hi a, hihvai tawh kisai in atanu asuahtaktheih nadingin kasum neihkhempeuh uhleh neihsa innlehlo te zuakin Lawyer kawmin ka hanciamding uhhi ci’n genkhia hi. ZD Sawltak #zomidaily