Kikhelna (Conversion) ~ Dr. Ngul Khan Pau

Kikhelna (Conversion) ~ Dr. Ngul Khan Pau

George Ingle in a gelh The Lord’s Creed laibu sungah mi khat hong kikhelna tawh kisai dawl thum om in gen hi. Amasa, mi khat peuhpeuh a kikhel nadingin Jesu Khris ama nuntakna bulpi ahih lam phawk in ama nuntakna zong Jesu tungah nga hi, tua ahih kei leh kikhelna picing thei lo hi. Anihna, mi khat hong kikhel ciangin biak kikhopna lunggulh hamtang hi. Amah bek-a nuntak sawm, kuamah tawh kikhol utlote kikhelna kicing hilo hi. Athumna, a kikhel taktak mite’n midangte awlmawhna, huhnopna, veina nei hamtang uh hi. Ama ading bek-a nungta dente’n kikhelna taktak mu lo uh hithei hi.

Hih panin i muhpak theih thu in: a kikhel mipa pen ama kibawltawm hiloin a sung lam panin Pasian biak nopna, midangte veina leh lainatna hong nei hi. Eimah bek vantung tung dingin Topa’n hong gum khia lo hi. Midangte tonpih thei ding, itna leh veina nei ding; tua hileh eima pianpih a hilo Kha Siangtho hong luahpa hang ahihna kimu thei hi.

Martin Luther in zong kikhelna nam thumin na gen hi. Khatna, lungsim sung kikhelna (Conversion of the heart), hih in pianthakna kici thei ding hi. Nihna, ngaihsutna kikhelna (Conversion of the mind), ngaihsut luite nusia in ngaihsut thak, lawpna leh sepnop thak tawh kikhelna hiding hi. Thumna, i neih sum leh paite zong kikhelna (Conversion of the purse), mipum a pianthak hangin a neih a lamte a pianthak kei leh bukim zo lo hi.

Martin Luther genna panin i behlap nop ahih leh “ngaihsut kikhelna” thu hi. I pianthak hangin i ngaihsutna ama thu in kikhek pahlo hi. Thu hoih la hoih tawh i khek sawm kei leh ngaihsutna zat ngeite mah kizang kikkik hi. Tua hangin mi pawlkhat a piangthak hangin a kampau leh a gamtat piangthak mite gamtat luhek tawh kibang lo hi. Amau zong piangthak taktak leng hih bangin ngaihsun lo ding hi ing, ci-in camp khawng mahah na lut kik, na ki-ap kik zel uh hi. Na mobile sungah thu hoih la hoih na koih leh tuate na deih ciangin na zang thei ding hi. Ahi zongin a thak bangmah thun loin a luite bek na koih leh a lui siatna mawhnate bek mah hong gingging ding hi.

Tua hangin sawltak Paul in, “Leitung mihingte’ gamtat bangin gamta kei unla, na lungsim uh kikhelin Pasian kipuahphasak un. Tua hileh a hoih nate bang hi a, bangte in amah lungkimsakin, bangte a kicing hiam ci-in thei-in Pasian’ deihna na phawk thei ding uh hi,” na ci hi (Rom 12:2). Ngaihsutna thaksuak kei leh leitung mite’ deihna bangin kigamta ding cih hih munah kimu hi. Tua hangin mi tampi a pianthak uh hangin a ngaihsutna uh kipuahpha (thaksuak) loin leitung mite deih teng mah tawh nungta uh hi.

Tua tawh kizomin i neih leh lam zong a pianthak kisam hi. Hih zong thubaih hilo hi. Tua ahih manin sawm-a-khat piak ding khawng Lai Siangtho siksanin kihilh kikkik kisam hi hang. Mi kimkhat amau pianpiha a cing mahmah (generous) om hi, pianthak man cih hi loin midangte piak nopna nei ngiat mi om hi. A tamzaw tua bang kihi lo ahih manin piakkhiatna zong kisin ding kisam hi. Lai Siangtho sunga Zacchaeus hong pianthak ciangin a neih leh a lam tawh hong piangthak hi. Topa’ tungah, “Topa aw, ka neihsa a kimkhat mizawngte tungah ka pia ding hi. Mi khatpeuh khemin a na ka laksak leh a zah li-in ka lohkik ding hi,” na ci hi (Luke 19:8). Zacchaeus a kikhel ni-in a neih leh lamte zong piakkhiat ding khensatna nei hi.

Jonathan Dodson in zong kikhelna tawh kisai nam thumin na gen hi. Khatna, pumpi kikhelna (Body conversion); a cih nopna in mi khat hong kikhel ciangin Khris pumpi ahi Pawlpi (Church) tawh kizopna nei hamtang hi. Nihna, buh-at ding a kikhelna (Harvest conversion), a cih nopna ahih leh khamangthang lainatna hong nei ding uh hi. Gammial veina hong nei ding a, Pasian thei nai lote awlmawhna hong nei ding hi. Thumna, Biakinn kikhelna (Temple conversion). Biakna tawh kisai i gen ciangin Ephesa 2:14-16 leh I Peter 2:5-10 sungah midangte tawh kizopna kilamkhawm i hihna Paul leh Peter in gen hi.

Ephesa sungah Paul in Topa Pasian in ama mite Jews leh Gentailte sung panin “mi thak” hong bawl hi, ci hi. Tua mi thak pen Jews maw Gentail hihna tawh kithei ding hi nawn loin Khris tawh kizopna hangin new community ding ahi hi. Hih ciang tung dingin Pasian in a Pawlpi a gelna telpih kisam hi. Pawl nih kideina phiatkhia in “Pawl Khat” sungah ama hangin na gawm hi. Tua hi leh awkaih siksana kiphut kipawlna, tua ciang denomination tawh kiphut Pawlpite phiat ding cihna hi loin, i awkaih, i denomination lote tawh zong Khris sungah pumkhat i hih lam phawk ding kisam hi cihna hi.

I thuzawhna dingah Stanley E. Jones in mi khat kikhel takpi hi cih a kitel theihna nam nga-in gen hi. A kitel theihna masa pen ahih leh “Pasian kammal Lai Siangtho” sung pan hi (John 1:12, 5:24, Rom 8:16, I John 5:12-13). A nihna pen “Midangte’ theihpihna”. Mi khat hong kikhel leh a inkuanpihte’n tel masa hamtang ding uh hi. Kikhel kici a kuaman a theihpih loh pen a kikhel hi ngeilo hi.

Kha Siangtho hangin mi thak hong suak khat pen kilamdanna nei teitei ding hi. A kampau mahmah zong kilamdang hamtang ding hi. A thumna, “Eima sunga siangtho nuntak nopna,” nidangin zu-mun sa-mun nuam sa, guk ding lawhcin ciang lungdam ahi kha zongin ama sungah hihte nusia in a siangtho nuntak nopna hong nei hi. Mawhna sungah na bualkha ahih hang lungkimna nei lo ahih lam leh a zongsang sate hong tawpsan ciangin a neih ngei loh lungdamna leh lungkimna hong nei hi.

Tua khit ciang, “A kikhelsak Topa thu teci panna” gen nuam in gen ding kithalawp den hi. A muh peuh kiangah ama lungdamna bangin lungdam ding deihsak ahih manin genpih nopna hong nei hi. Gilkial khat in nek ding tampi omna ah an hong nek khit ciangin amah banga gilkialte kiangah anlim koi-ah omhiam cih gen ding a kithalawp bangin Jesu Khris nuntakna ann a ne mite’n midangte kiangah pulak nuam uh hi.

A ngana ah, “Kha Siangtho in ei kha hong hilh” (Rom 8:16, Gal 4:6-7). Ta hihna eima kipiak tawm hi loin Kha Siangtho in i hihna hong hilh a, tua panin Pasian i sap ciangin “Pa aw” (Abba) hong cisak hi. Mikang pau ah pa cih ciangin “father” cih kizang hi. Ahi zongin ta in a pa a sap ciangin “father” ci loin “daddy” ci hi. Tuni in vantung a om Pasian “daddy” i cih theihna Kha Siangtho hong lamlahna hi. Topa’ sungah hih kikhelnate a tel leh a ngah dingin ama thupha nang tungah om hen. Rev. Dr. J.M. Ngul Khan Pau