Ki pattah na’ng ahoihpen hun ~ Pau Lun

Ki pattah na’ng ahoihpen hun ~ Pau Lun

Matthai 18:13-15 Tua ciangin mi pawlkhat in a naupangte uh tungah Jesuh in akhut nga-in thu a ngetsak na ding deih in, a naupangte uh ahong paipih uhhi. Ahi zongin a nungzuite in tua mite nataii uhhi. Jesuh in, “Vantung ki-ukna pen naupang tawh akibang mite ading ahih manin, tua naupangte ka kiangah hong paipihsak unla, khaktan kei un”aci hi. Tua ciangin Jesuh in naupangno te tungah akhut nga-in thupha apiakkhit ciangin a paikhia hi.

Mihingte ih nuntak hun sung, athupipen hun in banghun hiam? cih dotna khat hong kidong hileh banghun ih ci ding hiam? A tamzaw in kitel kim khollo dinghi. Ei Zomi te bangin “numei le naupang simloh”cihdan in numei le naupang thusim khollo hihang. Ahih hangin Topa Zeisu mahmah in naupangte it-in “vantung gam pen hih naupang abangte omna dinghi”ci-in na gen hi.

Mihing khat pattah ding hun tawh kisai-in Mipil te’n (Life began 1000 days) ci-in ih nu gilsungpan ih suahzawh kumnih dong pen ih taksa le ih khuak khantohna dingin nutrition le vitamin hoihtak a neek ding hi”ci uhhi. Tua khit “kum-8 dong pen ih khuak pattah hun hi-a, laitan in tan-3 dongpen naupangte akhuak uh ahatna dingin pattah ding, sinsak ding hun hi”ci uhhi.

Tua ahih manin naupangte a nu gilsung akipan kum-8 dong ahun zui-in cidam in hong khantoh na ding theihhuai thu te sinsak, simsak ding ahi hi. Kum-3 pan kum-8 ciang naupangte pattahna-ah;

• (1) Taksak lam khantoh na ding (Physical development)
• (2) Khuak lam khantoh na ding (Mental development)
• (3) Gamtathoih khantoh na ding (Moral development)
• (4) Ahunzui a lungsim khantoh na ding (Emotional development)
• (5) Mi tawh kikholh-theihna khantoh na ding (Social development)

Hih atunga nam (5) teng kihual kim a, akhantoh theihna ding, thupi mahmah hi. Tua banga akhantoh na dingin anuai aa hilhzia te tawh pattah kul hi –

• (1) Ki mawlsak ding (Playing Teaching Method)
• (2) Music sinsak ding (Singing Teaching Method)
• (3) Lim suaisak ding (Drawing Teaching Method)
• (4) Khut siamna tuamtuamte sinsak ding (Art and Craft Teaching Method) thupi mahmah hi.

Naupangte agolkhit teh ih buaipihna pen aneulai uh a ih pattahloh man hi ka ci nuam hi.

Laisiangtho sungah, “Naupang khat aneulai-in lam maan tawnsak le cin a teek dongin lampial nawnlo dinghi” acih mah bangin athupi pen hun in ih Sunday School kahhun hi a, Sunday school ah ih naupangte hilh-maan (sound of Teaching) kisam mahmah hi. Ahilh ding Sia/Siamah te’n zong laisim a, hoihtak kigingin hilh ding thupi hi.

Topa Zeisu ngiat in naupangte thupi sa a, it in amakiang ah apaisak ban ah a angah tawi (pom) in aom bangin ei Zomi te’n zong naupangte thupi bawl a, ih pattah ding thupi mahmah hi. Hih banga kipattahna pan in Zomi khangthak te’n i ngeina hoihte le ciindan hoih (ethics) te hongthei-in hongzui ding uhhi. Pu Pau Lun Min Thang (Minister, Ministry of Social, Chin State Government)