Khutmee tawh a kigenteh nupa ki-itna (Ring finger)

Khutmee tawh a kigenteh nupa ki-itna (Ring finger)

Mihingte in khut langnih ah khutmee nga tuak kinei hi. Tua khutmeete tungtawnin zong a kinial thei lo muh theih thumaan ki-it zia ding khat hong mu thei sak hi. Hih thu pen minam khempeuh ii ciin le zat hi-in a kinial thei lo thumaan (universal truth) khat ahi hi. Na khumeete a langnih tuakin zalto inla, kimat sak in. Tua khit ciangin na khutmeelaite gel kitalsik sak inla, a dangte pen Pasian bia ding danin zaltang sitset kik inla kimat sak in.

Tua bangin na hihna ah na khutpite gel pen nu le pa (parents) kici a, na meekawkte gel pen pianpih sanggamte kici a, na meezom (ring fingers) te gel pen nang le na zi (nupate) cihna hi a, na meeneute gel pen na tate ding kici hi. Na khutmeete tua bangin na koih khit ciangin na khutpite gel tang sak lecin hong tangdin-in hong kikhen khia thei ding uh hi. Tua khit ciangin na meekawkte gel tang sak lecin zong hong tang thei, hong kikhen thei ding uh hi. Ahi zongin na meezom (ring fingers) te gel pen hong kikhen khia thei mahmah lo ding hi. Na meeneu zong kikeek sak lecin a dangte mah bangin hong kikhen hong kikeek thei ding hi. Ahi zongin na meezom (ring fingers) te gel peuh mah hong kikhen khia thei mahmah lo ding hi.

Tua ahih manin ih meezom pen khutzungbuh bulhna in kizang hamtang hi. Khantawnin kikhen lo ding cih lahna tawh lawm kingaite in tua zungbuh a kipiak uh pen meezom ah bulh tektek ding uh hi. Tua pen kikhen thei lo cih lahna hi. Nupa pen tua banga a kikhen khia thei lo ding ahihna thu tawh kituakin meezom ah tua a kikhen thei lo itna lahna in zungbuh kibulh hi. Tua pen ciaptehna khat hi. Nu le pa le sanggamte tawh kikhenkhia in zi le pasal kinei thei cihna pen khutpite meekawkte hong kikhenkhiat theihna in hong lak ahi hi. Ahi zongin nupa ki-itna ah a kitengsate kikhen-a nu le pa nungsang, u le nau zuan kik thei lo ding cihna thu a lahna hangin ih khutzungbuh bulhna meezom (ring finger) te gel kikhen kikaak khia thei mahmah lo hi.

Tate ahi a, sanggamte ahi zongin it lo ding cihna hi lo-in tate, sanggamte sangin nupa ki-itna nupa kithuhualna ih liatsak theih zawk ding zong kimu thei hi, cihnopna hi. Ih tate tawh kikhen khia thei ding cihna hi. Tua lahna-in, meezomte gel a kimat bikbek laitakin ih meeneute gel kaak rehang kikaak kikhen khia thei hi. Ih tate in zi le pasal hong neihsan thei ding cihna hi a, ahi zongin nupa te gel kikhen thei tuan lo ding hi cih thu pen hih muh theih khutmee tawh gentehna tungtawnin hong kihilh ahi hi. Zozaang ka khua vuah khatvei, Lasiam Pu Thang Za Khan a tate khat si hi. Nitak khat thu ong gengen a, a tawpna ah amah le amah bangci-in ong kihehnem hiam cih leh “A paisate a pai hi ta mai henla, ei a nu le a pa cian lai buang ih hihteh, cidam peuh leh Pasian in hong pia pia lai lel ding hi” ci hi. Ahi lo ding a bat hangin a thuman a gen ahi hi.

Nu le pa nusia in, zi le ta kinei thei a, tate in zong nu le pa hong nusia in zi le ta hong neihsan toto ding uh ahi hi. Nu le pa nusia in zi le ta neihna pen thupha hi zaw hi. Na tapate na tanute inn tuan mo khak in om zo loin, kikhen thei ngei mahmah kei lehang a dahhuai zaw ahi hi. Ahi zongin nupate kinusia thei lo uh hi. Kinusia leh a kikhen hi a, kikhenna ah kinuam lo hi. Tua nupa kikhenna thu pen leitungah thuhamsa pen le a dahhuai pen thu ahi hi. Mo khakna le inn tuanna pen khantohna ahi hi. Lungdam ding hi zaw hi. Mi pawlkhat hau mahmah a, khak ding tanu tapa a nei lo om hi. Hau mahmah napi-in a tapate a tanute a khawng khia zo mahmah lo zong ki-om thei veve hi. Tua mah bangin zawng mahmah napi-in a tanu a tapate a khawng khia ziahziah zong kitam mahmah veve hi. Topa’ thupha ih cih pen kikhenna pan kipumkhatna ah leaving to cleaving ahi hi. (Nupa thu ah).

Suang Dal