Khuavak nading nitum maw, nitum naadia khuavak ~ Bob Tuangpi

Khuavak nading nitum maw, nitum naadia khuavak ~ Bob Tuangpi

Tutung galkapte in thukhunpi 417,418,419 vive (State of emergency) paulappi nei-in vik ngekngek uh cih dan hiphot e. Tuzawh kum-1 sung ding ciphot uh hiven, akisap leh kha-6 khanto/extend (Thukhunpi mah tawdap) ding uh hilai mawk in tampi paulap ong zonzon loh ding uh thupi ve maw.

2008 thukhunpi bel phiat cih thadah tua dungzui cih paulapna (Gambup thukin tangkona nuai ah galkap mangpa’thuneihna zatna) tua zui aa nasem ding cih hileuleu pong hi. Union Election Commission zongh phuanthak pah uh hiven ong hoih toto sam in cia cih ciang hiphot in cei. NLD lamte ong kitom leh amau’khauhna (Tempo) zui-in (guitar bang hileh a awsan awniamna zui Key laih koikoi ding) amau zongh gawi toto un teh…Gamdang gamliante’ galhuhna (International military intervention) cihte bel pawlkhat otot bangin lamet bang khol ken teh.

Gamkhat in gamdang gal ado ding teh ama’ gam ii meet nading (National interest) en masalo-in gal kimawkdo zenzenlo hi.Tua kawmkal ah leitung gamliante gamvai kimawlna (Geo-politics) tawh zongh tampi kisukha gige ahihi.

Adiak Kawlgam bang bel leitung gamlian le gamthahat tuak (Regional power) nih ahi Sen le India kikal ah ki om kiukiau hi-in hih gamte (2) ii gamvai le sumlei sumzuakna lam kisaina kawmkal ban ah nitumna gamliante gamvai kimawlna (Power politics) in tampi hong huzaplai ding hi.

NLD lam makaite in zongh kiginkholhna (Plan B, C) na neihtuak phalo dan hi. Nidang 88 lai danin lampi tung ah mipitha (People’s power) tawh kalsuankik ding bel leitung gam tuamtuam aa thupiangte ih etteh baih tuanlo ding a, apat pan kipatkik mah hong kul zeel lel ding hi.

Tulaitak Kawlgam ah gamvai tawh kisai ahawlpi pawl/group-3 bangin kikhen thei hi. Kawl galkap bulphuh Kawl party + mualmi party honkhat, NLD makainu bulphuh Kawl le anaihuai Democratic force, mualtungmi thautawite + mualtungmi party cih bang pawl -3 kici thei hi.

Hiteng sungah Kawl tuaktuak galkap bulphuhte le Democracy bulphuhte’kikal ah kitelkhialhna le thuneihna kituhna tawh hong piangkhia buaina ( Power struggle) hang kici thei hi. Alangnih tuakun thukhunpi siksantekin kei man ing, nang khial teh cih kisialkhau suhna pan kipan hi aa, hidinmun atunma-in kihosiamna (Political dialogue) ahunlap nei hile uh hiciang tunglo khathei ding hi.

Bangbang ahita zongin suahtakna ngah 1948 pan tunitan gamsung buainate ih et tak teh Kawlmi gammakaite kikal aa thuneihna kituhna hangin gam kisia kibuaiden tunitan ahihi. Galkap thuneihna moltumin zangh-in tutna/panmun ngah sawm pawlte le mipi le Democracy paulapin thuneihna ngah sawm makaite’kikal aangsung khualluatna hang vive hilel hi.

Tua hi a, suahtakna ngah zawh tunitan gamsung Kawl mipi taangpi taangtate le mualtungmite in ih hih leh khatvei leh puanteen/longgyi ong kiteenpih zeelin, khatvei leh pheituam/bombi ih teen hun a om zeel aa, khatvei leh niik ih teen zeel vua, mai aate’ cih bangbang ih cici mai zen aa, tu’n ahih leh kum bangzah hiam khat sung niiksuah zeelin, niik lah bang pheituam lah bang, banglo hiam khat tawlkhat sung asilh ateeng ding dan hiphot thong hang e! “Kawlte mah hizeel e gam asusia!” *Lem toto sam in cia!* *Utna a om naak leh alampi ding kimukhia veve…* Bob Tuangpi (00122021 Diary)