Malaysia gamsung Puchong veng aom Pub khatah zanni zingsanglam in khuttawi bomb (Hand Grenade) khat puaktam ahih manin mi 8 liam cih theSun in genkhia hi.
Zanni zingsangtung 2:30am pawlin thupiang hi a, Puchong IOI Boulevard aom Movida Outlet pan ahihi. Mi 20 valkhawng Nightclub sungha gualnuamtak in aomlaitak apuakkham hihtuak hi.
Selangor deputy police chief DCP Datuk Abdul Rahim Jaafar akicipa ii genkhiatna ah hih Bomb puakkhapna pen migilo te ngongtatna tawh akizom, aki Link hiding hi ci’n genkhia hi.
Kumpi thunei te kankhiatna ah hih bomb asukhampa in Pub sungah akhuttawi Bomb lawnto in puakkhamsak a, numei 4 leh pasal 4 in liamlawh uh cihi. Asi bel omsamlo hihtuak hi.
Hih buaina hangin kumpi thunei te’n ageikiim aom CCTV te sitcian uh a, athu limkan mahmah uhhi.
Aliam te pen Serdang Hospital leh Sunway Medical Center ah kipuakpah hi. Aliam te lakah khatpen huaisia simtham cihzong kiza hi.
Hih Bomb apuakkham laitak in hih Movida Nightclub pen akhakkuan ahihi. Buaina apiankhitzawh minute 30 ciangin meiphel Fire and Rescue Department te hongtung uh a, akiim apam velcianna neipah uhhi.
Movida Management te’n ahihleh hih Outlet pen kahonzawh uh kum 4 bang valkhinta a, buaina omlo cihi. ZD Sawltak #zomidaily
Comment piaknop aomleh...