– Singapore ah na zin ding leh na PK (Chewing Gum) khai ke’n. Singapore in 2004 kuma kipan PK khamcip hi. Gamsungah zuak kiphal lo, gampua pan puak zong kiphal lo. Hong kitheih leh Singpore $500 hong kigaam ding hi.
– Milan khuapi ah na hawh ding leh maitai den in. Dahmai puak ding pen khuasung hausa te’n kham hi. Sihgaalna leh dammawh vehna bekah dahmai kipua thei hi. Tua lo hun dang khempeuh ah maitai den ding cih thukhun khauh takin kibawl a, a zui lote sum kigaam hi.
– Capri (Italy) tuikulh ah pai na sawm leh phanat keng kei in. Phanat bulhsa a ih vak ciangin kalsuan simin ging dakdak den ahihman in midangte nawngkai sak thei hi. Capri tuikulh thuneite’n phanat bulh ding phal ngiat lo uh hi!
– Victoria (Australia) khuapi sungah na mei Bulb a siat zenzen leh nang thu in a thak laih thei lo hi teh. A laih thei dingte pen Meilam siamna License neite bek hi. License nei lopi in na mei Bulb na laih leh Australian $10 hong kigaam ding hi.
– Lanjaron khuapi (Spain) ah tawl khat sung sih ding kikhaam hi. Bang hang hiam cileh tua hun laiin hanmun ding kivai om nai lo banah mikim in inn a neih kim nai loh man uh hihi. Hih thukhun pen mikim in nui kawmkawm in zuih zawh ding hanciam mahmah uh hi.
– Italy gam pen lawm kingaite ading in gam nuam leh suakta mahmah khat hi. Ahizongin mawtaw tai lai tungah lawm kingai a kinam a om zenzen leh Italy sum in za tampi kiliausak thei hi cih mangngilh kha ken!
– Russia khuapi Chelyabinck ah mawtaw sawp siang lohpi na hawl peuh mah leh amau sum 2000 hong kigaam ding hi. Khuasung thuneite in khuapi sungah mawtaw niin a taai ding khaamcip uh hi!
– Hawaii (USA) ah khaal sangkhak laitakin mun tuamtuam panin mi zin den uh hi. Ahizongin a khuapi uh ahi Honolulu ah nitaak nitum khit ciangin lasak kikhaam hi cih mangngilh kha ken. Zan a lasak khawng nuamsa na hileh Honolulu khuapi ah pai loh mai hoih zaw thei hi!
-Francis Lamthang (Zomi Quavdis)
Comment piaknop aomleh...