Christmas Ciang Inn Ka Ngai – 2 ~ Hau Za Cin

Christmas Ciang Inn Ka Ngai – 2 ~ Hau Za Cin

(a masa behlap pak na) Lamka phawkna: Lamka zong ka mitkha in ka mu den hi. Banghang hiam cih leh ka u Cing, ko unau ah a upa pen omna hi a, amau kiang Pearsonmun ah zong Christmas leh Kumthak ka zat hun om ngei hi. Lamka ka phawk mahmah dang khat pen Zomi vive omna khua hi a, lamdung khempeuh ah Zokam kipau ziahziah in a mi peuhmah zong ‘ka mipih, ka pianpih, ka sisan kibatpih’ cih lungsim khat hong om hi.

Hong khamuangsak in, hong lungnuamsak mahmah hi. Lamka i zin peuhmah leh a khuasung i tun phet pan i muh peuh ‘ei a, i mipihte a, i minam a, i gam a…’ cih khat lungmuanna kinei hi. Shillong pai leng i muh peuh Khasi te a cih khat om a, inntek lungsim kinei theilo in lengla lungsim kinei mawk hi. Tua pen Lamka i pai ciang omlo hi. Lamka khuami ka hi kei zongin ‘inntek lungsim’ ka nei hi. Tua manin Christmas hong tun ciang ka mipihte omna, ka sa pihte omna, ka pianpihte tenna khua ciin ka phawk velval hi.

New Bazar pan Go Cin Khup veng dong khe tawh i paitoh hang lengla lungsim puakna ding peuhmah omlo in inntek lungsim takpi tawh kidak veuveu lel hi. Hong piang eite hong gumpa Jesu ei a mahmah in i ngaihsut bangin Lamka zong ei a mahmah in i ngaihsut ciang i lungnuamsak, i tawldamsak in, i khamuang hi.

Lamka te Christmas zat dan pen koh khualam tawh na kibanglo hi. Christmas naih kuan ciang paungaihna tawh khuasung ah Christmas la tuamtuam kikhah in ging ziahziah a, Pasian thugenna awging cihte zong kiza mun mahmah hi. Gamdang, khuadang pan hong ciah, Christmas hun sung khawng bekbek inn lam ah a om man dingte puanhoih nono silhin khuasungah khe tawh a vak muh ding om uh a, car hoihnono zong kileh zialzial hi. Zingsang khuavak tungin na thawh leh sa lei ding pawlkhat zingsang dainom lai ah bicycle tawh kileh naunau na mu ding hi. Banghang hiam cih leh khuavak khit ciang sa hoih kimu nawnlo ci uh hi. Ahih kei leh zingsang meh ding kideih ahih manin huan man dingin kilei baih hikha ding hi.

Delhi phawkna: Zomi honkhat mahmah om ahih manin Zomi te tenna khuapi khat hong suakta hi. A piang a khangkhia zong om kiukiuta ahih manin a nu leh pate khualui lam sang amau pianna khua mah a ngaizaw tam tektek ding hi. Ahi zongin Christmas bel khualam a zatdan mah in zang uh a, lenkhopna, lasak khopna, annek khopna, cihte kinusia nailo hi. Kikhop tawp ciang mipi lasak khopna hun hi a, nitak lam ciangin nitak anne suak in nitak kikhop in zomsuak pah hi.

Khua a liat deuhdeuh leh gamtatzia zong kidang ahih manin zanhak, zanvak cihte a kizang tam hetlo hita a, innkuan leh meltheih u leh nau tawh hun zat khop ding zong a baihlo zaw suak hi. Delhi ah Christmas zat pen nuam mahmah, vanzat kicing, nek leh dawn kicing, kikhopna zong nuam mahmah hi. Ahih hang, hun kizeek, hun kihawmthawh, hun deihzah in kihaulo, ciahna kuanna gamla ahih manin a nop mahmah laitak in kikhen hong kul zel hi. Hau Za Cin (Phuitong Liim)