Khen ding Gawm, Gawm ding Khen

Khen ding Gawm, Gawm ding Khen

Nih le thum a pha om a, Khat “bek” pen nih le thum bangin a kimu zong om hi. Thu le la ah khen ding gawm pawlkhat om a, gawm ding khen pawlkhat om hi. Thu le la ah bang thu masa in bang thu nunung hiam? Bang thu tungah bang kinga hiam? Bang hang hi zaw hiam? Cih thute tawh kisai ah a masa a nunung khen ding le a bulpi le a hiang, a kung le a gah khen dimdiam ding cihna hizaw hi. Tulai thu kigente ah a langlek upna/ a langlek thugenna cihkhat kibulphuh hi. Tua ahih leh a nuai-ah langlek thu tawh kisai ahi lo thu ngaihsut ding pawlkhat ka hong sung nuam hi.

Zomi takpi Zolai gelhna ah langlek a gelhna pawlkhat kimu thei hi. Tuate lakah hih “leh, le, ng, g,” tawh ngaihsutna ka pia nuam hi. Pawlkhatte in “le” bekbek zang uh a, pawlkhatte in “le” bekbek munkhempeuh ah zang uh hi. Pawlkhatte in “leh” bekbek zang uh a, pawlkhate in “ng” aw le “g” aw nangawn khen thei nai lo uh a, mun khempeuh ah “ng” aw bekbek zangin “g” aw zang lo uh hi. Tua mah bangin pawlkhatte in “g” aw bekbek zang uh a “ng” aw zang lo leuleu uh a, a laigelh uh sim lehang ih nuih a zak hun zong om a, thumang kei tak ciai ih cih hun zong tam peuh mah hi.

“le” pen “and” munte ah zat ding ahi hi. “leh” pen “conditional situation/ if/ because of” cihdaante ah zat ding hi. “g” aw pen a zatna a tuam om a, “ng” pen a zatna a tuam om hi. Bang thu gen ding na? =Gen. N a lup ding ciang thu na ngen zelzel na? =Ngen. Tua hi a, “g” zat nading mun a om mah bangin “ng” zat nading mun a om mah hi cih thu pen na thukimloh a phamawh ahi hi. A dang tampitak om lai-in tuate ah na khen thei lel ding hiteh. Kuamah naupang om lo ih hihteh hong gen beh nawn dah ningh.

Pawlkhatte in Upna le gamtatna tawh gupna kingah ci hi. Ahi zongin Protestant upna ong kipatkhiatna pen Upna “bek” cih thu Zawmah ngeina sunga kidiah cip Zawmah upna in nial ta uh ahih manin tua “apostolic faith” pen a kipaikhiatpih ahi hi. Lai Siangtho sungah “thumgawm” cih laimal a kimuh loh hangin Pa Ta Kha thum hihna “Trinity” pen a kimu thei thu ahi hi. Tuamah bangin Lai Siangtho sungah “bek/ alone” laimal na muh kei phial leh zong Kha mit tawh Lai Siangtho na sim lecin “bek” thu na mu ding hi. Reformer te pen tua banga thu le la khen dimdiam a upna a nuntakpihte uh ahi hi. Tua bangin a khennop man un Lai Siangtho kammal na laih peuh mah lo uh a, Lai Siangtho kammal behlap lo ding, dokkhia lo ding (Rev. 22: 18, 19), Lai Siangtho pen Pawlpi adingin a kicing Pasian’ kammal hi cih bulphuh mahmah uh hi (2 Tim. 3: 16, 17). Lai Siangtho “bek” muang loin ngeina le ciin le zuih tawh a behlap Christian minpuate tawh kikhai mahmah cih kimu thei hi. John Calvin in upna “bek” ih cih ciangin gah nei lo ding cihna hi lo hi na ci hi. Upna pen amah “bek” a hih loh ciangin “upmawhna/ lunghianna/ uplohna piang hi. Jesuh’ sungah Upna “bek” in upna bek mah gah a, upmawhna/ lunghianna/ uplohna gah cihte gah thei lo hi. Pasian zong khat bek hi lo a, thum hihna tawh kidim hi, hi mah leh thum hi loin Pasian khat “bek” ahi hi. Faith is not alone it has fruit. One God is not alone but there in three persons in the Godhead yet One God.

Tua ahih manin thukham zuih zawhna tawh kuamah in gupna ngah zo nawn lo a, Jesuh’ ong zuihsakna sungah upna “bek” tawh gupna a kingah ahi hi. Tua Jesuh sung “bek” pan gup ngahna in a kineihkhem lo gup-ngah-gah gah hamtang sak hi. Tua gah pen Jesuh’ zia tawh a kibang gah hi bek dinga, a dangte’ gah kihel thei lo ding hi. Hai kung in hai gah “bek” gah thei hi. Lingmaw kung in lingmaw gah “bek” gah thei hi. Jesuh Khrih sungah upna “bek” in nuntak tawntungna pia thei hi. Salvation is by grace alone, by faith alone… Bangtungah bang kinga masa hiam? A gah pen tua “Upna bek” tungah kinga a, ahi zongin tua a gah pen gup ngahna hi lo hi. A hi zongin gup ngah kiciatna pen up-ngah kiciatna ah gah bek hi. Amasa pen upna “bek” hi a, a nihna ahi tua a gahte pen gup ngah lawhna hi lo hi ci-in Reformers te in Paul gen le James gen thute a kitukalh ahih lohna laibute sim lecin na nahlawh pek mahmah ding hi. Hotkhiatna pen Upna le Gamtatna (faith + work) tawh hi lozawin Upna bek tawh gamta hizaw hi. Upna le gamtatna pen nih kigawmna tawh gupna a piangsak hi lo hi. Upna in gup ngah gamtatna nei sak hi bek a, tua gamtatna khat zong kimu lo Christian pen tua upna “bek” in a gum zo lo hi lo zawin, a mah le amah a kipatna pek panin a kikhem, a kineih, a um taktak lo pi hizaw hi. Gupna taan cih pen a kipatna tawh kisai zaw hi. Na pianthakna ah upna le gamtatna suanna tawh a piangthak na hileh bel na taan kik ding hi. Upna “bek” tawh na pianthak leh na taan nawn kei ding hi. Nang le nang kisuang zel, Jesuh Khrih paulam zel nuntakna pen gup ngah kician lo cihna hi. Jesuh Khrih sung “bek” ah na ki-ap lecin na gupna khamuan huai pan ding hi.

Pawlkhatte in Pawlpi le by law khen uh hi. Pawlkhatte in doctrine le movement khen uh hi. Pawlkhatte in Faith le Confession khen hi. Khen ding hi lo a, zatkhop ding hi. A kisapna mun om tuak hi. Pawlpi khat in gupngahna tawh kisai ahih loh hangin by law neih kul tham hi. Tua by law thumaan taka a zang lo mite hangin by law kisam lo cih bikbek hi pah lo hi. Pawlpi khat in movement a thupit sak zah in doctrine thupi kaan lai hi. Upna kici faith a thupit mah bangin Upzia “Confession” te zong a kisam ahi hi. Thu le la peuhmah khen dimdiam ding pawl om hi. Amau mun ciat ah thu nei thei cihna hi. Gentehna pasal loin khang kisim lo a, numei loin khang piang thei tuan lo hi. Khat le khat kibel tuah. Khat lo a, khat om thei lo uh hi. Tuate pawl pen English te in “vice versa” na ci uh hi. Pawlkhat pen nih banga kimu na pi-in Khat ii a’ sungah gawmkhawm-a ih muh theih ding a kisam om hi. Gentehna Pasian le mihing nih pha hi. Ahih hangin mihing pen Pasian lo tawh piang thei lo a, Pasian pen mihing lo tawh a om khin sa ahi hi. Mihing in Pasian kisam a, Pasian in mihing ong kisam hi masa lo hi. Pasian pen mihing tungah ong kinga lo a, mihingte pen Pasian’ tungah a kinga tawntung ahi hi. Tuadaante pen English te in “not vice versa” na ci uh hi. Nih bangin a kimuh hangin a khat zaw pen a Kungpi tungah kingah cihdaante hi. Gentehna Gup ngahna taktak pen Upna hang “bek” hi a, tua upna in gamtatna maan nei sak zo pan hi. Khatveivei Christian te in gupna pen nih kigawm tawh kingah kisa pahpah hi. Nih kigawm hi loin Khrih sungah upna hang bek tawh gupna a kingah hi a, tua gup ngah kician gamtatna tawh nih hong pha hi zaw hi.

Thu le la ah bang thu masa in bang thu nunung hiam? Bang thu tungah bang kinga hiam? Bang hang hi zaw hiam? Cih thute tawh kisai ah a masa a nunung khen ding le a bulpi le a hiang, a kung le a gah khen dimdiam ding ahi hi. Akpi le aktui ih nek zawh kum 6000 bang a cinna sungah pawlkhatte in akpi le aktui a kikhan gual sa uh hi. Lai Siangtho in aktui na piangsak masa lo a, akpi napiang sak masa zaw hi. Tu hun in akpi le aktuite ahih uh hangin a kipatna pen akpi hang “bek” na hi masazaw hi. Khen ding gawm, gawm ding khen ih khak loh ding thupi mahmah hi.

Evan. Suang Dal