Khebawk/ khena cihte pawl

Khebawk/ khena cihte pawl

Khetungah meima omthei hi. Khevun tungah meima om miamua thei hi. Tuapen khe tungah sisan a kicing tungzolo hi. Oxygen a kicing tung zolo a hihmanin vuntung meima (Ulcer) hong piang a hihi.

Khetung meima pen khenpi nih in ki khenthei hi. Lungtang lamah sisan a puakkik sivui a kikhakna hangin a piang leh lungtangpan sisan a khahkhia sivui a kikhakna hangin a piang natna te a hihi.

Lungtanglam ah a ciahkiksak sivui kikhakna hangin a piang khetung natna pen khe gawng teng leh khe a niamlam tengah kimuthei hi. Liamna te in limlemel kician neilo hi. Sithu luangthei hi.

Lungtangpan a khahkhia sivui kikhakna hangin a piang natna pen khepek tung, a diakdiak in khepeknuai tengah lim om nuam mahmah hi. Khepeknuai a hihmanin gu lut baih aa a dampak keileh siavuan te kiangah lahtheih ding kisam hi.

Sisan puakkik hatloh man aa piang natna a thuak mi in hun awng a ngahsim in a khe a sangna munah lamto ding hi. Mawza leh pattii te tawh tuamding zong thupi mahmah hi. Hihnatna te pen sikhum, zunkhum a nei mileh a thaulua mite tungah piangthei pahdeuh hi.

Bang ante nekhuai hiam?

Hibang natna te a damna dingin annekzia thupi hi. Sisan a puakkhia leh a ciahkikna sivui te nasep manpeuhleh a damkik ding hilel hi. Tua sivui te nasep a maan nadingin a nekhuai annam pawlkhat gen ding hihang.

Vitamin C tampi a kihel ding – tampaya, suaklu, leh a thuksinggah nam, pankawpi (cauliflower) maidawn ngek, kawpi lum, kaihlan, Vitamin E kihel ding- mangbuh, a hawngkhauh singgah nam te leh tuipi ngasa te nekhuai hi.

Buhtang, pawngmoh leh khauhsuaibte zong hoih hi. (Gulutsak kei in. Sawtpi in a damkeileh siavuan te kiangah kilak in) Sikhang natna neimi na hihleh ci tamnek kei in.Ref- A book written by Dr. Mimiko/ Siamsin Library