Topa Zeisu leh Judah Siakazok lim kisuai na thu

Topa Zeisu leh Judah Siakazok lim kisuai na thu

Judah Siakazok or Iskariot (Judas Iscariot) :: 1980 kum pawl Sachaung Hentadah Street aa innsap a ka om lai un, “Judas Iscariot” cih thulu tawh ki-at, Germany mi liimsuai siam (Painter) khat in Topa Zeisu nuntakna limsuaih tawh lakna article (Depicting the life of Jesus Christ) khat kasim kha ngei hi. Ka innsap napa pen nidang in, USA ah, State Scholar pai ngeikhat hi aa “Readers Digest Magazine” bului honkhat nei hi. Kei zong ciimphawng in ka sim zelzel hi.

Late 50s or early 60s pawl aa ki issue Readers Digest bu khat hi in ciamteh ing. A limsuai pa min zong ka ciamteh thei nawn kei hi. Google ah ka zon leh ki upload lo hiding hiam mu kik zo nawn keng. Sia mah Lamnu (Daisy Dim Lam Cing) kiangah zong ka gen kha ngei aa, aman’ zong tua “Article” Readers Digest bului te khat ah kasimkha ngei mah hi ci hi. Ka ummawh at kahih loh lam kong gen na hi.

Germany te liimsuai siam khat in Topa Zeisu’ nuntakna lim in suai in laksawm hi. A limsuai khempeuh alungsim deih bangin zokhin himah leh, Topa Zeisu kum 12 a phaklai tak, a ithuai mahmah, mawhna abaanglo, melhoih naupangno mel ding a etteh ding mi mu zolo hi. Nikhat lamsiau in aa’ vakna khat ah, naupangno honkhat kimawl amu hi. Tawlkhat sung a etkhit ciang in, naupangno kum 12 kiim a pha khat kiangah vanaih in, kalimsuaihna khan (Studio) hong pai in, na sakmel liim kasuai nuam hi ci-in sam hi. Tua naupangpa’ sakmel liim Topa Zeisu kum 12 aphak laitak liim dingin suai in alung kiim mahmah hi.

A hizong in, Judah Siakazok liim ding a etteh ding mi muzo mahmah lo aa, a liimsuai zothei mahmah lo hi. Kum 20 sungbang, a’gitloh mel, a’zuautheih mel, mi melhoihlo khat zongzong hi. Nitak khat lungkia mahmah kawm in, zu sai (Bar) khat ah beer dawn in, aom laitak in, mi tangval hamsim, kum 30 val ding khat, alawm ten’ tua zu sai sungah sawnsuk aa, sualtung kipaaisuk hi. Zu hong pialai un, ci in awng buabua hi.

Tua liimsuai siampa in vanaih aa, akhut len in phongto aa, ke’n ma’n zu hong leisak ning ci in sam hi. Nasakmel lim in kong suainuam hi ka studio ah hong zui in, zu naduh zahzah kong pia dinghi ci’n zol hi. Tua pa’ sakmel pen Judah Siakazok lim dingin suaisuai hi. Tua hun laitak in, tua tangval pa’ a khitui luangin hong kap ziahziah hi.

Limsuai pa’n banghang in kap na hiam? Judah Siakazok mel ding aa, nasakmel ka suaih khasia na hiam? ci in adot leh; Nang kei na nong theinawn kei hi. Tumaa kum 20 lai aa, hih studio sungah Topa Zeisu kum 12 aphak mel ding aa, kasakmel na’suaipa ka hi hi. Tu in kei Judah Siakazok mel ding in kasakmel nong suai ciang, ka ngaihsut hongtam in, kisik kik aa, ka khitui hongluang in, akap hing ci’n dawng kik hi.

“Makai leh Hehna” Lian Muan Kim at article sungah Leonardo da Vinci ih suaih Topa Nitak Ankuang Umna sungah, Topa Zeisu leh Judah Siakazok liim kisuaina thu luan dan leh hih atung aa kong at, Topa Zeisu kum 12 leh Judah Siakazok limsuaihna thu kibang pian aa, a thunih mah aa, a thu kibang hiaamhiaam nih mah aom maw? (or) Dr. Lian Muan Kim in, aa telkhial a hikha tammaw cih ahi hi. Hih thu tawh kisai amaanpen a’thei na om uh leh hehpih na tawh hong hilhcian un.

Tua limsuai pa pen “Heinrich Hofmann 1824- 1911” hi kha in um ing. (A hih kei leh a min maan a thei na’ om uh leh hong hilh kik un). A kikhialkha ahih khak leh mi pawlkhat te in mailam ah thuhilhna (Sermon) khawngah ih genkhialh khak ding patau na leh laisim te’n a ngaigsut kak thei nading lunggulhna tawh kong at ahi hi. Kitelkhialhna in nei kei ni. Lungdam, Khupkhan Thang Taithul (September 9, 2019)