Khasiat huai mihai nih ii zawlthu ~ Peter Suumpi

Khasiat huai mihai nih ii zawlthu ~ Peter Suumpi

Nidang lai in ah hibang tangthu khat na om ngei hi. Hi tangthu sung aa numei nu le pasal pa anih un hai uh hi. Mihai pa hai ahihman in atawntung in hai paupau hi. Mihai nu zong hai ahihman in atawntung in mihai pa hai nuihsat in en-en hi.

Atu-ung in amau te nih kitheilo uh hi. Mihai pa pen leitaw lampan hong pai hi aa mihai nu pen leilu lam pan hong pai ahi hi. A innkuan pihte un amau tegel pen mihai hi ci in awlmawhlo in a utna peuh paisak lel uh hi.

Leitaw lam pan leilu lam manawh in mihai pa hong pai hi. Leilu lam pan leitaw lam manawh in mihai nu hong pai hi. Anih un ahai vakvak in huih mutna na ah akalsuan uh ahi hi.

Atu-ung in tuapa pen mihai hilo hi. Anasep na ah alu leisang tawh akisat aa kipan ahai ahi hi. Mihai nu zong atu-ung in mihai hilo hi. Tan 10 laihuanna ah akhuasung uh ah akhatna ngah hinapi akhua uh aa mihaupa tanu in tungsiah te sumpia in atuhkhiat zawh kua mah tawh ki ho nawnlo in anu apa zong thudon nawnlo in ahai suak ahi hi.

Bang tan lampai khin cih athei kei uh hi. Mihai pa ahihleh apumtung aa apuansilhte nin mangkhin hi. Avom ci-ip teta akhedap zong anuaidap kihawk khia hi. Mihai nu zong apuan tual kang silh meikhu mel pua ta hi. Asam tung ah lopa keu om in akhut ah tui thawl khat tawi kawmsa in lampi aa mipau khempeuh anuihsa kawikawi hi.

Nitak nitum dektak ciang in amau te gel hong kimu uh hi. Nin bung gei aa pongmoh ap khat anih un amu khawm uh hi. Anih un atawm nuam hong kituh uh hi. Mihai pa in pongmoh hong ngah hi. Mihai pa in mihai nu a en gega hi. Mihai nu in anuihsan hi. Akam ka in tua pongmoh mihai pa in deihtak apek suk buat hi. Mihai nu in mitphialo tanglo in a en hi.

Mihai pa in mihai nu khat vei khiatna neilo takin aen hi. Mihai nu ahileh cilval guapguap in mihaipa aen gige hi. Mihai pa zong ana nek khawl in amah a en gige mihai nu hong en hi. Hibangin mihai nih paulo phunlo in sau veipi ki en gige uh hi.

Mihai nu apongmoh omlai teng apia hi. Mihai nu zong lawptak in la in ne pah buatbuat hi. Mihia pa zong tua munpan hong pai khia hi. Nung heilo in agiakna inn luipi sung ah mihai pa hong ciah hi. Inn gei atun ciang tua mihai nu in azuih lam aphawk kha hi. Mihai nu in amah anuihsan hi. Amau te gel ki ho peuhmah lo in tua innlui pi sung ah anih un aom khawm uh hi.

Nitak lup ciangin cikmah aa atuak ngeiloh lungnopna kha muanna te mihai pa in ngah hi. Akhan lawh ciangin mihai nu in amah akawi hi. Mihai tawh kibanglo in mihai nu ihmut nuamtak in a ihmu hi.

Hibang in mihai nih innkhat sung ah hong omkhawm uh hi. Sun lam ciangin anih un zuakphualte ah pai in agil ciat uh adim uh hi. Nitak ciangin tua innpi sung ah anih un hong giak kik zel uh hi. Nikhat khit nikhat, kha khat khit kha khat nite kha te anih un hong kantan toto uh hi.

Nitak khat koi pang hong tawp hiam thei khang khut bulh khat mihai pa in hong ciah pih hi. Tua akekseu khut bulh pen mihai nu ii khutme mezom tung ah hong bulhsak hi. Mihai nu zong nidang mah bangin anuih kawm in mihai pa maitang a en hi. Tua nitak ahih leh tua mihai nu nui lawh lawh zo hi. Adai kikhe zan dap sung in mihai nu nuih aw ahi khom khat ciang kiza hi. Mihai pa deihtak hong pom phei in ahang kitheilo pi in hong kap hi. Mihai pa ahileh amiatang ah bangmah acilo dan in om milmel hi.

Mihai nu aci na hi. Khat vei zong acina ngeilo mihai nu hong cina hi. Mihai pa tawh zing an zong dingin hong zui zo nawnlo hi. Mihai pa hong nuihsan zo nawnlo hi. Mihai pa ahileh amaguak in an vazong in sun ciang hong ciah kik hi. Akhut sungah tuithawl thak thawl khat le pongmoh thoh athak thoh khat tawi in hong ciah kik hi. Mihai pa maitang bawk gawp hi. Akhut me te zong dulh gawp hi. Anak pan siluang hi. Sai sung ah tui le moh aluhna ah sai nei te satna ahi hi.

Mihai nu ahileh amitte asih kawm in nidang bangin mihai pa anuihsan veve hi. Pongmoh kheh in mihai nu kamsung ah aguansak hi.Mihai nu in nezo nawnlo hi. Adan hong man nawnlo hi. Acisa lua in khua hong phawk lo hi. Amaitang tungah cikmah aa kilang ngeilo pawl khat hong kilang hi. Cihmawhna, ahuhding omlo zawngkhalna maitang hong kilang hi. Tua innluipi sungpan mihai pa hong tai khia hi. Puan eng asilh galkap khat amuh ciang mihai pa hong kap hi. Hi pen mihai pa ii kah cilna ahi hi.

“Ka zi hong hutkhiat sak ve” ci in akam pan awngkhia in akap hi. “Pai khia sin mihai… douk… innpan pai khia tungtung bang mihai tawh kituak laizang ka leh”

Tua galkappa in acihcih kawm in tua mihai pa hong suituk suk hi. Mihai pa leilak ah kipai suk hi. Galkap pa in agil deihtak thum vei tuansuk beh lai hi. Tua pan amia ah cilphih in ataisan hi. Leilak ah mihai pa sawt veipi lum hi. Atawh zawh ciang amai aa cilte zong na keuta hi.

Mihai nu anungzang ah pua in lampi tung ah hong pai hi. Lampi tung ah mitampi om hi. Ahihang in kua mah in amau awlmawh lo hi. A en sunsun te in lah kihhuasa in kihepsan hi. Mihia nu lam gei khat ah nga in cihmawh mit tawh mihai pa in miteng hong ban et kawikawi hi. Mihai nu ahih leh anak lai mialmial bek mah ahi hi.

“Cina mawtaw hong sap sak ve vua. Ka zi cina zawm lua hi ven. Hong huh vevua. Ka zi hong huh khiatsak ve vua amah zawm lua hi ven” ci in mihai pa a awt hangin kua mahin thusim lo hi. Tha kha thu in lam gei aa man kitam them khat mihai pa in hong tawm in gawng in akang dikdek mihai nu khut tua man them tawh hong at hi. Si tampi hong luang khia hi.

‘Ha… ha… ken mi khat thah… hong en vevua… ken mikhat ka that ve hong en ve vua” ci in mihai pa hong awngkhia hi.

Tua khit zawh cina pua mawtaw hong tung in mihai nu hongpua khia hi. A gei aa aen mite in tua mihai pa satgawp sui gawp uh hi. Hotkhiatna angah sam hangin mihai nu atawpna ah si veve hi.

Zato EOPD ah nai khat sungzong nungta lo in misi buk ah kipuak pah hi. Asih khit hangin amaitang nuihmai in maitai hi. Asih dong mah akhut mezom ah akekseu zungbulh abulh lai hi.

Mihai nu hong ciah kik ding mihai pa in sawt veipi angak hi. Ahihang in mihai nu hong ciahkik nawnlo hi. Amah anuihsan ding in mihai nu hong ciah nawnlo hi. Mihai pa akap hi. Khasia takin akap hi. Tua nitak mihai pa kahna aw bekbek tawh kidim hi. Ahihang kua mah awlmawh khalo hi.

Amau te gel akimuh masakna mun ahi ninbung gei ah mihai pa luang kimu hi. Amaitang maitai hi. Akhut ah akikhek nailo tuithawl thak khat le a apkhin pongmoh pehbang khat ahum teta kawm in… Peter Suumpi