Khangthakte Pasian thutawh khansuah ni (1) ~ Nu Sung

Khangthakte Pasian thutawh khansuah ni (1) ~ Nu Sung

Hun leh nite kikhel’in leitung pilna tampi sintheih nading dinmun ah ihom kimciat ta hi. Zomi te nidang lai hunin khamtung gamah a tamzaw ihom aa hibang pilsinna te zong tampi na om nailo hi. Tu in muntuam gamtuam leh ih zogam zongah leitung pilna sintheina te ihngah kimciat hi. Khantoh ding leh mi tawh liangko kikim nading ih hanciam ciataa pilsin nate thupi ihsa kimciat hi.

Nu le pa te’in zong tate aa ding deihsak mahmah in ihhih zawhzah ciatin pilna ih zonpih kimciat hi. Leitung pilna/siamna zonna thupi sakin tate Biakinn naleng ah a tun nawnlo nu le pa tampi ka mukhin hi. Hi bangin leitung pilna lamah ki makaihna pen thupilo hilo aa, Pasian thu tawh ih khansuahna lamah ih thanem khakding lauhuai a sa kahi zaw hi.

Paunak 22:6 “Naupang khat a neulai-in lampi man tawnsak lecin a teek dongin lampial nawn lo ding hi.” ci in Pasian kammal ih muhmah bang in a khuakpilna lam bek khansuah in Pasian kammal tawh ih khansuah na ding lamah ih thanem khak ding lauhuai mahmah hi. Thuhilhkikna 6:5-9, sung zongah, Pasian in nu le pa, naupang a pantah te khempeuh (parents & caregivers) tungah a Pasian kammal tawh tate ih khansuah dingin mawhpuak ong pia a hih lam ihmu kimciat hi.

Hih a nuai aa youtube ka ngaihna pan aa ka thangah teng kong hawmsawn hi. (Tg Samuel Nas thanks for the link)

Tua a hihman in Pasian kammal tawh ih tate ih khansuah kimciat theihna dingin hih a nuaiaa septheih pahding thu pawlkhat tawh kong zawn nuam hi.

NU leh PA’te aw: Ih innkuan sungah Pasian kammal tawh tate pantah kim ciat ni. (Gentehna; Innkuan kikhop neihding hanciam, tate Pasian kammal tawh kizui in thuhilhna a hi zongin neihding hanciam, etc.) Hih innkuan kikhop leh thunget khop pen kei ii nuntakna ah ka ciapkhak leh manpha ka sak mahmah khat a hihi.

PAWLPI Te aw: Pawlpi kim ciat in nipi sang (Sunday school) ki cian mahmah nei kim ciat ni. Thupisak kimciat ni.

Pasian in ong piaksa tate a ma kammal tawh a makaih zo ding in thupha ongpia kimciat tahen!

PS: Naupang te Pasian kammal tawh khansuahna in nuntak tawntungna bek hi lo in “asia a pha khenteltheihna pilna (moral development)” ong piakna thuzong a sawtlo in kikum laiding’in kongzawn hi! Nu Sung