Beng tawh kisai, Zomi makaipite tung thumna ~ Dr. Dongno

Beng tawh kisai, Zomi makaipite tung thumna ~ Dr. Dongno

GZA GS ii patauh tangkona i lungdam hi. Gal nei ihi hi. Gal mawkmawk hi lo-in gal lian anei ihi hi. Gal lian hi bek lo-in ‘gal lianpen’ ahi lai hi. Gal i neih ciangin om mawk lo-in kigin kholh kul hi. Gal nang defensive, ding hi bek lo, galte i leh do offensive zawh nadingin kigin kholh kul ahi hi.

Tu-in gal nei hi bek lo-in i galte’n ong sim khin ta uh hi. Hih pen Zomite adingin athupi mahmah ngaihsut ding hun ahi hi. Tonzang gam ( mundang ah zong ) ah beng langtangpi-in ki lim ciin mahmah aa sum ngahna zong piang saam napi, beng hangin khangno tampi sia khin, si khin ban ah khua nangawn amangthang zong om khin cih i zak sawt pi ahi hi. I galte’n ong dodo, ong thatthat ta uh ahi hi.

Bang hangin i gam ah i pu i pa’ ciin ngei loh, i ngaihsut ngei beek loh beng ong kiciing zenzen aa aciingte midangpi, gamdangmite hi sawnsawn aa kua kiang ah bang thu ngah aa hi bang na ong sem thei uh hiam cih zong i kan ding kisam hi. I manthan nading ngaihsutna tawh ong ngiim om gige ahih lam i phawk ding thupi hi. Hih pen a khatna hi lo-in, anihveina hi bang gal i neihna ahi hi.

Hun khat lai-in hih beng mah bangin, Tedim naupangte kisiat nading ngiimna tawh mi pawlkhatin zu leh No 4 (beng khauh nam) tawh naupangte zolin pantah uh hi. Ahunin ki phawkin nasia takin aki thuhilh ciangin, “Ka sep ding teng hih khin ngawn ing” ( acih nopna: ‘ tampi ka sia sak khinzo lel hi ‘ ) ci-in gualzo kisa in alungkim mi khat bang om hi. Tua ahih ciangin hih pen athupi mahmah ong sia sak nuam mite zat galvan ahina kician mahmah hi.

Galin ong sim khin uh ahih ciangin, mimal khat ciat, kidop ding thupi mah hi. Tua bek tawh man lo-in, hih athupi gal lianpen i do ciangin, Zomite ading aa kikhaam, leitung khempeuh ahuam level kipawlna i neih, GZA, Global Zomi Innkuante ahi zongin, Tedimgam (Tonzang kihel) Kipawlna, TA, Zomi Youth Kipawlnate ahi ZYA, leh Zomi Biakna ki pawlna tuamtuamte-in, khua sung hausa upate, biakna makai pawlpi sia leh upate, sang sia te leh kumpi nasem tuamtuam te in i omna khua ciat ah ma pangkhawm in hih Zomite gal lianpen dokhop ding hanthawn hi bek lo-in, hangsantakin makaihna, mapanna panmun nong lak ding uh taangpi in ong kingak zawh sawt zo hi.

Tu-in gal kido ta hi, Gal ki do ciangin, Galkap Mangpi makai-in ‘ battle-cry’ tawh gal zawh nading, gal do dan ding akisam na khempeuh vaihawmin geelsakin makaih hi. Makai om lo-in gal kido ngei lo, gal kizo ngei lo hi. I gal pen, gal lianpen ahi hi.

Hih vai tawh kisai-in, ki uknalam taavuan nei u liante tawh zong kimuh ding kul tham ding hi. Tua munte ah hangsan takin Zomi kipawlna min tawh nong makaih ding uh nakpi-in kong thum hi. Mimal khat kuamahin, individually in thu gen theihna vaangh ngah ngei lo ding hi. Zomi nam buppi’ gal ahih ciangin, Zomi kipawlnate-in nong thupi lak ding uh kong muang uh hi. Tua ahih cingin nu-leh-pa aa muan Zomi kipawlnate-in, agolpen pan anuai lam, hih bang hun ong tun ciangin nong din kei uh leh bangcih theihna om nawn ding hiam?

Tua ahih leh, beng hoih lohna lah thei, gamdang pan ong pai-in beng ong suan uh cih lah thei, beng hangin i khangnote tampi sia/si khin cih lah thei, beng hangin khua neu pawlkhat mang khin ta cih zong i thei hi. Bang cih ding cih nangawn zong geelna om nai lo tawh kibang hiamhiam pan lai mawk ihih ciangin, ki zekai mahmah ta hi. Ahih hangin zekai lua cih om lo ahih ciangin hih thu nakpi-in ong ngaih sun le uhcin ci-in kong thum uh hi..

Beng ciin pen upadi -in kham hi. Beng ciin theih nading thu om lo hi. Gamdang mun khatkhat ah pak huan ah pak nam khat bangin tawm kisuan thei bek hi. Zatui tawh kisai Zato lamte zatna lo buang kumpi-in nasiatakin kham hi. Bangmah kihtak ding, haksatna om lo-in upadi siksanin gen theih nading thu i nei hi.

Hih pen ahun lai-in i sep kei leh, i population tawm mahmah ahih ciangin i koihkhong ngeingei leh asawt het lo hun sungin bengin ong teep kang ding cih phawk ciat ni. Hih loh phamawh hita ahih ciangin asawt lo-in i makaipite muk leh kam lametna lianpi tawh i ngak ding hi. A mau ong makaih ding leh ong dian ding uh i muang hi. A mau ong makaih bangbangin mipite’n phun lo, nial lo-in kithuktuak diamin ong sawl bang un i zuih ding kigingsa-in i om ding hi.

Hih thu thupi mahmah aa, Zomite muihmang theih nading thu ahih ciangin, na khat pepeuh i sep kei leh, pata lo hung ding aa kisawl tawh i kibat ding lau huai hi. A pa-in a tapa kiang ah ” I lo zawngin an ane hiam va vil in” ci-in thau khat pia-in sawl hi. A tapa zong thau tawh lo en dingin tai vingveng pah sam aa, zawng hopi-in vaimin gau teng ane mu hi. Zawngkuh bangzah, api bangzah, ano bangzah cih dong thei hi.

More: GZA pan tangkona: Zomite gal lianpen khat ~ Dr. Do Suan Mung

A thau lawn lo, zong awng beek lo hi. Tawlpi khat a et khit ciangin, zawngte’n an gai khinin pai khia uh hi. A pa kiang ciah kik in, ” Pa, nong sawl bang mahin lo ka vil leh zawng honin vaimin gau teng ne khinin gamlak ah tai kik ta uh” ci-in agen i bang nuam kei ding hi. Deihsakna tawh, Dong No