Khangnote ading amanpha mahmah U Thant kammal 5 te

Khangnote ading amanpha mahmah U Thant kammal 5 te

Phunggyi Zahan thuap 3 pan mihing in a kikhel kik ဆရာႀကီး ဦးစာရိႏၵ in a kep Khantohna Magazine khat (a ni a kha a kum kigelh lo) laibu sungah UNO Secretary a sem U Thant in a gelh “Kammal 5,” cih thuluui pen Phunggyi pa ii thu ciaptehna laibu sunga kigelh hong kihawmsawn ahi hi.

Leitungah khantoh theih nading lampi tam mahmah hi. Khantohna ding tawh kisai a gen thei, a hilhsawn thei siapi zong tampi om hi. Ahi zongin a khangto mi tampi a omte khantohna lampi tampite lakah a nuai a thu 5-te in a thupi mahmahte ahi hi.

1). TUPNA/ NGIMNA NEI IN

Leitungah tupna/ngimna neilo mite pen bang vai cih theilo pi-a khual azin khia mawkmawk mipa tawh kibang hi. A khangto nuam mi khat in tupna le ngimna a neih ding ahi hi. Phunggyi thuap 3 pan nangawn in a paikhia thabanya pasian(သဗၺညဳဘုရား) nangawn tupna khat bek ading hanciam in kalsuan teitei hi.

Akua akua in a neu lai pan kipan in tupna kician khat a neih ding ahi hi. Tupna neite in a nasepna khat peuh ah nuamsa leh baihsa in tupna neilote sangin gualzawhna le khantohna lianpi ngah uh hi.

2. MIDANG TAWH KIBANG LO DEUH IN SEM IN

Hih kibatlohna in a tuamdang vilvel khat ahi hi. Ahi zongin cilgil taka ngaihsutna in mi khangtote ii thusim lianpi khat ahi hi. Mi tawh kibang lelin na sep leh mi tawh kibang lel na hiding hi. Midang tawh kibanglo deuh khatin sem lecin midang tawh kibanglo deuh khat na suak ding hi. Buddha zong midangte tawh kibanglo deuh in thu lungngaihna hong neih khiat akipanin midangte tawh kibanglo khatin pasian zaa phial ah hong tung ahi hi.

3. A TAMZAW THUKIMNA ZUI HAIHAI PAH KEN

A tamzaw thukimna mun ah khialhna tampi omkha thei hi. Leitungah pilna nei leh pilna neilote tehkaak hileng pilna nei taktak pen tawm-ci-lik khat bek om hi. ‘A tamzaw thukimna zui kei in’ icih ciangin hun khempeuh, mun khempeuh ah a tamzaw thukimnate langpan ding cihna hilo hi.

Thu khat peuhpeuh vai khat peuhpeuh ah, “A tamzaw thukimna hiven,” ci-a a nungzuih daldalte ‘a kizang theilo mipa,’ ci-in kiciamteh hi. A tamzaw thukimna in a khial ahih zenzen leh zong a khialhna pholak khiat ngam ding ahi hi. Langdo ngam ding ahi hi. Baak bangin a kawi taitaite khangto theilo uh hi.

4. KIPUAHPHAT DING LAU KEI IN

Leitungah biakna tawh kisai vai cih loh ngal thudang khempeuh pen a kipuahpha thei vive ahi hi. Nek le dawn, silh le teen, gamtat luheek, kampau muukpau, ngaihsutna cihte a tawntungin kikhel thei hi. Tuhun ciangin a manlang thei penpen a i nuntak kalsuan ding kisam hi. Tai kawm semsem a gamtat luheek hun hita hi. Leitung nuntak sung khantoh nading leh lawhcin nadingin kiphuahphatna le kikhelna i neih ding thupi mahmah hi.

5. THU UM BAIH LUA KEI IN
Ngaihsun masa loin a um pahpah gam le minam pen a niam mahmah, a hai mahmah gam le minam ahi hi. Thu theihna a khan nading le tua gam ii kalsuanzia a theihsiam nadingun nisim thu kizakna laihawmte simna pan zong kingah thei hi. Tua thuthak kizakna lai sungah Buddha pasian lim panin a khitui luang hi cihte, nau a paai nu sian cihte le kam ii hong piak naungeek, cih bang thulute tawh kigelh laigualte kituh liangin i sim lai siah Kawlgam mite in gual tawh tanbang i kim nadingin kal tampi kisam lai ahihna i thei hi.

A kigen khempeuh um kenla, na up khempeuh zong gen kei in.. Saikaak khinkhai masa inla gamta kampau zaw in. Hih in zong khantoh nadinga kahlei khat ahi hi.

Deihsakna tawh Kawllai pan ei lai in kong let kik hi-a, lungsim bangin kicing khinlo kha ding ahih manin nong na theihsiam nadingun kong thuum hi.

Lungdamna Lianpi tawh,
Dong Mung
Original Post (March 23 2016) Credit to Ashin Kelasa