I kigawm khawmna Tedim pau ~ Pau Tun Thang

I kigawm khawmna Tedim pau ~ Pau Tun Thang

Zomi a kici diakte’ sungah zong teenna mun leh mual tawh kizui in min tuam tuam piang hi. Zosuan sungah Tedim kampau zangte’ lakah Beh tuam tuam om kim pen dingin a lamet huai na ciang om ding hi. Zosuan dangte’ beh nangawn Tedim kampau te lakah om tek hi. Hih in i ki unauna kician takin hong lak hi. Zosuan sunga Tedim kampau zangte leh pau dang zangte kizopna, midang kuamah I om loh dan thak ngaihsut kik dih ni:

Saizang:
I pu leh pi te Ciimnuai khua ah a teen lai unkhawsungah gamsai kung pona zangtam khat om hi. Tua lai mun a teengte a mun min zuiin Saizang na kici uh a,tua pen tudong mah in kizang suak hi.

Teizang:
Ciimnuai khua ah a kiteen lai in pawlkhat Meitei gun dung Bangzang khua ah hong peem uh hi. Tua lai panin pawlkhat mualbem khua ah hong peem kik leu leu uh hi. Mualbemah Teipi phung khatah hong teeng masa uh ahih manin tua paulam in Teizang cih min hong piang hi. Teizang pau leh Tedim pau zangte pen a kikhen thei lo khat hi.

Pau zong kinai diak in nidang pek a kipan tuni dong mah La Bu khat, Laisiangtho kibang ki zang khawm tawntung hi. I ki unauna bang pan kilang hiam cih leh Teizang pau zangte leh Tedim pau zangte pen behkhat vive ki hi pian hi. Hih beh pawlkhat Hatzaw, Hatlangh etc. te khawng pen Teizang leh Tedim kam paute’ lakah om tuak hi.

Dim:
Ciimnuai khua panin pawlkhatin Geeltui khua hongsat uh hi. Tagah Liando leh Thangho tua munah hong nuamsa uh hi. Geeltui khua panin pawlkhat in Dimpi khua hongsat kik uh hi. Dimpi pan Dimlo ah pawlkhat peem kik in hih mun pana hong khangkhia te Dim mi na kici uh hi.

Khuano:
Ciimnuai Pan in Suante beh pawl khat in Sasih khua sat uh hi.Inn 7 bek pha in khang thei lo uh a tawmcik bek teeng den uh ahihmanin Khuano khuano kici hi. Sasih khua pana khangkhia te khuano mi kici hi. Tua pan Phunom khua hong zuan kik uh hi.

Sihzang:
Sihzang kampau te tawh nidangin Laisiangtho leh Labu kizang khawm ngei hih tuak hi. Ahizongin pilna hong khangin Sihzang pau in La Bu leh Laisiangtho ki nei thei ta ahih manin Pau khat a ki zangkhawm thei nawn lo suak. I kinaizia beh leh phung i neihkhawmna pan in ki tel mah mah hi. Vaiphei bang zong Pau nam tuam a zat uh hangin sihzang nam peng hih tuak hi.Suantak beh bang ngaihsun leeng Tedim pau ,Sihzang pau leh Vaiphei pau zangte lakah om hi.

Zo/Zou
Kawlgam sungah nidangin Zo Leh Tedim pau zangte in Pau namkhat(Tedim) pau zangin Pasian na be khawm ngei uh hi.Ahizongin tuhun ciangin Zo pau tawh La leh Laisiangtho ki teikhia ta in pau khat ki zangkhawm thei nawn ta lo hi.Tedim pau leh Zopau pen ki nai mah mahin a awkaih a kibanglo pian bek hi lel mai hi. Simte i cih khong zong Zo nampeng khat ahi hi. Hih beh pawlkhat Samte,Shoute leh Tungdim etc. te Tedim pau leh Zo pau zangte’ lakah om tuak hi.

Paite:
Nidanglai I pu leh pite pen mun khat pan mundang zuan a ana peem kawi kawi ahi uh hi.Tibet lam pan kawlgam lam zuan in, Kawlgam pan India ah na lut sawn lai uh hi. Kawl gam pana India gama ana pai masa pawl pen Paite kici hi. A pai masate cihna dan hi. Paite pau leh Tedim pau zang te zong Laisiangtho leh La Bu zang khawm ngei i hih loh hangin i pau kinai mah mah hi.

Gam khat a om khawm bang hi leeng i pau kigawmzo ding hi. Tun zong gamkhat a om khawm i hih loh hang kamphen (interpreter) cial kuul lo in nuam takin iki hotuah thei veve hi. Beh pawlkhat Guite, Tunglut, Thawmte, Ngaihte, Naulak, Khuptong etc. te bang Paite pau leh Tedim pau zangte lakah om ciat hi.

Thado:
Thado te tawh iki zopna pen Songthu (chawngthu), Kipgen Haokip cih khawng pan ahi hi. Cihnopna ah hih beh te pau nih zangte lakah om tuak hi. Gangte lah Thado nam peng khat hong hi jel ahih manin kuamah midang ki om het lo hi.

Lusei:
Lusei nam sunga beh lian pen Sailo pen Eimi te Zawlta na hih tuak hi.Ralte nam nangawn Tedim kam pau te lakah na om zen veh aw.Hualngo zong Lusei tawh ki unau hi zel ahih manin midang hong hi tuan lo leu leu hi.

Hmar:
Hmar te tawh i ki taan beh pawlkhat te pen Varte (valte), Khuptong (Khupchong), Thomte (Tlomte) etc. ahi hi. I pau bel tawmin ki gamla piañ ta hi.

Hih a tunga i genkhawmna te pan bang kimu thei hiam cih leh Tedim pau pen Zosuan nam tuam tuam te kigawmkhawmna khat hong suak hi. Tua hih manin kammal (vocabulary) zong kicing vanglak hi. Tedim kam pau pen a nei tuam kuamah om lo a Zosuan ten i neih khop pau khat kici thei hi. Kuamahin kisuan ngaihsut lo leh Inn teek lungkim pua a i zat tang tang ding thupi hi.

Zomi a kici diak te lakah Tedim pau pen a zang tam pen dingin upmawh huai hi. Mi khat Teizang pau a hong pau ciangin Teizang mi aive maw kici hi. Sihzang pau a hong pau ciangin Sihzang mi ai ve maw kici leu leu hi. Ahizongin Tedim pau zangkhat pen Teizang, Sihzang etc. ahih theih lam ki tel hi. Bang hang hiam cih leh Tedim mi i cih takciangin Sihzang, Teizang etc. te genkhawmna ahi hi. Tua ahih manin pau dangte sangin Pautaang suakzo zaw dingin lamet huai hi.

Tedim mi cih pen a tunglam in kuamah om tuam lo hi.Hun hong sawt ciangin Pu KamHau in Tedim hong luah a. Tuahun in minam 7 na teeng khin uh hi.Tua te Saizang, Teizang, Dim, Guite, Zo, Thadou, Vaiphei ahi uh hi. Hih nam tuam tuam te sawt sim hong awm khawm tak uciangin a pau uh hong ki hel zau in tua Tedim pau i cih pen hong piang mawk hi. Tua ahihmanin Tedim pau pen a nei tuam om lo a kitang a i neihkhawm ahi hi. N. Pau Tun Thang