Khang kizom thupha maw (or) khang kizom samsiatna?

Khang kizom thupha maw (or) khang kizom samsiatna?

Noah in leenggah zu kham in bangmah phawk loin guaktangin aom laitakin a tapa Ham in mu-a, a Pa’ zumhuainate seelsak loin zahpih takin a sanggamte nih(Shem leh Jafeft)te tungah va ko se hi. Shem leh Jafeft in hih thu a zak uh ciangin manlang takin paipah uh a, en zong en ngam loin a lehlam ngasa-in a Pa uh zumhuainate va seelsak uh hi. Noah in hih thupiangte a theihkik ciangin Ham tapa Kanaan pen a sanggamte sila ahi dingin samsia a, Shem leh Jafeft-te ahih leh thupha na pia hi(Pian 9:21-27)

Hih thu tawh kizomin i ngaihsut ding thu tampi om hi. Khang kizom thupha ngah nading leh khang kizom samsiatna ngah nading pen, Pate i bawlzia tungah tampitak kinga hi. Na Pa daipih ngam loin na zahpih kha hiam? Na Pa’ thu mang loin na ut bangin na gamta kha hiam? Na Pa simmawh in na langpan’ kha hiam? Tua bang na hih khak leh kingaihsun phakik in la, na Pa’ tungah mawhmaina ngen in. Tua bangin kisikkik nuam loin na Pa’ langkhat ah na panpan mawk leh khang kizom samsiatna pen nang leh na suan-le-khak te tungah hong tung ding hi. Nuntakna sungah a lauhuai tampite lakah khat in, Pate’ hong samsiatna ahi hi.

Na Pa pen, na deih bangin hong kicing den zolo ding hi. Banghang hiam cih leh Pate pen, Innkuan lutang ahih mah bangin Innkuan’ sung nuntak khuasakzia ding a zing vaihawm’ ding uh tam den ahi hi. Na Pa pen a thahat hun om dinga, a thanem hun zong hong om ding hi. A din’tang hun(a kip hun) hong om dinga, a puk hun zong hong om kha ding hi. Tua bang hun ciangin, a huh/panpih ding leh a phongkik ding pen zi leh tate ahi hi. Na Pa in sawt hong dampih nawn lo kha ding ahih manin, ama dam hun sung aam mahmah in la, na hih theih zahin lungkimsak sawm in.

Nang leh nang in ngaihsunkikkik in! Na Pa’ kicin’ lohnate ahuh thei zel mi khat na hi hiam? Na Pa’ lungkim/lungdam nadingin na gamta hiam? Na Pa’ tungah itna leh zahtakna na lak zel hiam? Na Pa’ thupha piakna ngah dingin na ki lamen ngam hiam? Na Pa it-in zahtak a, amah na lungkim/lungdam sak nak leh khang kizom thupha pen, nang leh na suan-le-khakte’ sungah hong tung ding hi.

Tua ahih manin, Pate it siam in zahtak siam ni. Pate’ tung panin khang kizom thupha ngah sawm ni. Ham bangin khang kizom samsiatna a ngah hi loin, Shem leh Jafeft bangin khang kizom thupha a ngah thei dingin, lai sim mimal kim tungah, Topa’n teel siamna leh sepzawhna thupha hong pia ta hen. Amen!

Khazih sungah,
David Tuang