Khaici Tuh Hun ~ Tg. Kham (ZAM 2011)

Khaici Tuh Hun ~ Tg. Kham (ZAM 2011)

Cialna
A masa-in laisim mimal kimin hih ih simma-in, kei aa ding bek hilo ka hopsawn ding leh ka mipih tul tampite dinmun ka etphatna ding hi, cih lungsim nei masa-in, mipihte a panpih vive ihih kimna ding kigingsa-in ih simtek ding ong cial nuam masa ingh.

Sepkei leh nekding omlo
Tulaitak gamthumna a tungsa Zomi te dinmun leh Malaysia aa gambel aa om Zomi te ih nuntakzia en le’ng, ih theihtek mah bangin ih nektawm ding zon’ zia, innkuan nuntakna ding hanciam ziate ih naupangte-in hong telpih loh hang thu ngaihsun thei khin gual Zomi khempeuh in telmuh mahmah hihang.

Malaysia aa gamthumna lamen aa omlai Zomi sung pan a tamzaw (vekpi phial) pen, ih patauhna tuamtuam leh ih lunggimnate zong ahilo nektawm, dawntawmna ding sum leh pai zongin ih mun tekpan, baihkei mawk ei, nuntak haksa mah ei, aci vive kihi gige hi.

Mite khutnuai aa nasep zia leh a nasep mahmah pen baih hetlo himah taleh, ‘sepkei leh nekding omlo’ cihdan khat himawk ahih manin kisem tantan hi.

Malaysia ah nektawm ding koici zon’ ihiam
Nipi kaal khatbup off/leave ngahlo-in sep akul nasep nei tampi, ahih kei leh kum khatbup off day ngahlo phialin sep akulna mun aa semkha tampi, ahih kei leh innkuanpihte tawh hunnuam zat hun ding a ngah manlo liang aa sep akulna mun aa semkha tampi, ahih kei leh a omngei lua ahi bangkua sungah dahna-kahna thu a tun’ hang a nasep khawl ngahlo aa sep akulna mun aa semkha tampi, ahih kei leh gamthumna lunggulh takin ngak ahih hang a thupi phone letding hun angahlo liang aa sep akulna mun aa semkha tampi, ahih kei leh mipihte tawh kimuh man ding peuhmah a ngah manlo aa sep a kulna mun aa semkha tampi, a nasep sumthalawhna lian simloh vaidang peuhmah a vaan manlo aa sep akulna mun aa semkha tampi, ahih kei leh mipihte sungah bang thupiang aa, bang kigen cih ngaihsun man ngiatlo aa sep akulna mun aa semkha tampi, ahih kei leh Zomi Nam Ni, Khuado Pawi cihte phawk manlo liang aa sep akulna mun aa semkha tampi, ahih kei leh kikhopna biakinn tung man ngiatlo aa sep akulna mun aa semkha tampi cih bangin kum khat khit kum khat ih hun bei tawntung hi.

Zomi sungah, ama ut hunhun, a deih hunhun in a nasepna pan tawlnga thei, off/leave a lathei ziauziau pen tawmcik bekmah omlel ding hihang. A om leh zong, tua a sepna munah a thatang kha tampi sung beikhin cihna hi.

Thamanh ngahlo ki-om tawntung
Hihbang tengtawh nektawm ding hanciam takin kizong ciangbek hilo lai-in, tulam semsem teh a nasepna pute-in khasum pialo, thamanh pialo, hawlkhia, simmawh, nen’niamna tuakin ZAM ah khasum ngahkik theihna ding huhna hong ngen ki om zelzel dinmun ahi hi.

Banghang hibang omthei hiam cih leh, nasepna pia pute-in gambelte ii dinmun tel semsem uh aa, nasep apiak uh ciang laikung laidal tawh ki thukimna tawh, thukhun tawh nasep kipia cih hilo mawk ahih manin eitung aa hong bawlnop bangbang uh pen amau thuthu himai hi.

Gamthumna tun’ ciang ee?
Gamthumna ih tun’ ciang hih ih nasep, nektawm zon’ teng tawh kipelhin tu hithiat aa nek leh dawn tawh lung himawh nawnlo ding ihiam? Hi hetlo lua kisa-in, a tungsa ih meltheih tanau khatpeuh dong le’ng tampi hong genthei ding hi. Ih bil tawh zong ih zaza khin ding hi. Nuntak zia nop mahmahta a cizo tawm hi. Nop zawdeuh cihbek omthei aa, Malaysia aa nuntak sang’ haksa zawtham a cizong Zomi ki tam mahmah hi. A deuhdeuhin Malaysia pan aa gamthumna tungsate-in hong gelh lai le uh ih lunghimawh kholh thu tampi mah hong kigual zihziah ding hi.

Pilna siamna masuan zo ding ih om hiam?
Malaysia ah nasep ih ngahtheihna dingin nasepna pu leh pite-in hong kalh/dot theih pen, degree (buaih) ngahkhin maw cihte, mangkam siam maw cihte, na laisinna sang koi pan cihte, na professional bang cihte hi masa hetlo hi. Kum tamsim sin ngiatngiat in ih ngah pilna siamna taktak tawh nasep zong pen tawmcik petmah bek omding hihang; Tawm mahmah ding hi. Zomi Tedim kam pau sitset tul sawm val bang ih omna-ah, tuadan tawh nasep anei ih ki simthei phial tam cihnop huai hi.

Nasep bangci ngah

Malay pau, mangpau theita kei le cin va kisin limlim ding, sep kipat teh sin kipan hiding cihtawh nasep kilut theihna a tampen kici thei lai hi. Na kuhkal cihtak nak leh lem toto lel ding hi, cihdan nasep namte ki cithei hi.
Zomi tampi pen, sum leh pai kisapna tawh kizui-in meltheihte khatpeuh ii panpihna tawh a mun ava tun’ teh a sepding a theipan khawng ih omna Malaysia gam ahi hi. Ih teel zawk ding dang mupaklo ki himai hi.
Nang sepding (ta-vuan/mawhpuak) hiteng, hiteng cihzong om khollo-in pu leh pite hong sawl bangbang phunlo, niallo-in na sepzawh nak leh nasep lutthei ci-in, ei sep ngei leh ih kivaknasa tawh kisai vetlo nasepna phual aa a sem zong tul tampi omding hihang.

Ih ki phatsak pih liang khak leh….
Ih gensa teng banah, nasep ih ngahzia pen enpha taktak le’ng leitung khan’toh zia tawh teh na’ngin ih dinmun niam mahmah lai cih muthei tek ni.
Tawmkhat a enhuai zawdeuh nasep neite dinmun en ni; Pau a theizaw deuhte kideih hi, acih nasepna munte-ah zong pau thei cihpen kum tampi a semkhinte aa dingin ahih leh siamta uh hi. Siamta cihna sungah, Malay pau pen Zomi te ki siambaih kici tekin mangpau ahih leh ki siambaih kici ngamlo hi. “Thei ngei ke’ng!” hilai hi.
Malaysia aa ih mangpau zatdante gamthumna-ah, nasep thupi mun leh mi namdangte thusim zawhding munte taktakah aki zangthei tammaw? Ana tel uh tam?
Nasep zia zong nop, pute zong thunuam lel, nasep hun zong Malaysia aa ding a nuampawl, ahih kei leh ih seppihte tawh nasep zia nuamlel ci-in nisim hong buaisak ih nasepna-ah, ih vaihawmnate-ah ih zat ziahziah Malay pau pen gamthumnate-ah ih zatna ding a tamlai tam? Tua tawh nasep zon’na a lemtuam tammaw?
Hih mi’ gam, mi’ lei-ah, innkuan sung vai khatpeuh, veng leh pam vai, khuapih tuipihte vai, pawlpi sung vai, minam sung ki panpihna vaite-ah, iki seppih, vaihawm pih theihna hang pen ih Malay pau tawmtawm leh ih mangpau helkhop theih gawpgawpna hang na hizaw gige thei lai hi. Tuate gamthumna-ah ih zangthei lai tammaw?

Ei leh ei kidotna khat
A ban ih zopma-in, ei leh ei kidotna khat neihding ong hanthawn nuam hi ingh. “Tulaitak aa ih sep leh ih buaipih nuntak zon’na nasep bang lian asem dingin ih naute, ih tate, ih tute ih deihsak hia le?”

Bang ngimna tawh hih thute gen ihiam
Hunkhat ciang Zomi a tawisangzo ding dinmun atung tampi ih omzawhna ding a mainawt huaiziate, a kipat huai ziate a lungngai khawm nuam ihi hi.
Ih nau, ih ta, ih tute hun ciang aa ding bangci sepsak kholthei ding ihiam kikupnopna ki cithei hi.

Lampi dang omthei nailo
Tulaitak in a tamzaw in ih nasep sum zon’ zia pen ih lungtup dan hilo zaw hamtang kha ding hi.
Lungsim hongkhia-in ei mimal dinmun leh ei leh ei bek ki enlo-in, adeuhdeuhin Malaysia aa Zomi icih ih minam ii nasep nektawm zon’ ziate khatvei en pha ni; Nipi kaal khatbup off/leave ngahlo-in sep akul nasep nei tampi, ahih kei leh kum khatbup off day ngahlo phialin sep akulna mun aa semkha tampi, ahih kei leh innkuanpihte tawh hunnuam zat hun ding a ngah manlo liang aa sep akulna mun aa semkha tampi, ahih kei leh a omngei lua ahi bangkua sungah dahna-kahna thu a tun’ hang a nasep khawl ngahlo aa sep akulna mun aa semkha tampi, ahih kei leh gamthumna lunggulh takin ngak ahih hang a thupi phone letding hun angahlo liang aa sep akulna mun aa semkha tampi, ahih kei leh mipihte tawh kimuh man ding peuhmah a ngah manlo aa sep a kulna mun aa semkha tampi, a nasep sumthalawhna lian simloh vaidang peuhmah a vaan manlo aa sep akulna mun aa semkha tampi, ahih kei leh mipihte sungah bang thupiang aa, bang kigen cih ngaihsun man ngiatlo aa sep akulna mun aa semkha tampi, ahih kei leh Zomi Nam Ni, Khuado Pawi cihte phawk manlo liang aa sep akulna mun aa semkha tampi, ahih kei leh kikhopna biakinn tung man ngiatlo aa sep akulna mun aa semkha tampi cih bangin kum khat khit kum khat ih hun bei tawntung hi.
Cih bangin a tomin kikhen theiding aa, a haksazaw dinmun zong tampi omthei hi. Ih ut aa, utkei zongin a tamzaw in nisim ih buaipih tawntung thute himawk hi.

Ei leh ei sung bek ki tehkaak khakna
Zomi sung pan kiim leh pam aa minam dangte dinmun khat zong ih muhzel kul tektek aa, mi’ gam khawng a tung ihih semsem tawh kizui-in mite nuntak zia, mite khan’toh zia, mite’ lungsim puakzia, mite ei bang mahin nektawm zong hiam cihkhawng zong ih muh semsem kul hi; Gamthumna tun’ ciang nak muh mahmah kullai ding hi. Mu bek hilo-in, khan’tawn zong hong himai thei ih nuntakna ding gamte-ah ih etteh theihding nuntak ziate ih etteh zawh ding kisamta hi.
Zomi te ih pian’na muallak guamlak pan hilel aa, hiciang ih tun’ zong thupi lua hang kicih khak ding ngaihsut phat huai hi. Ei sung a tamzaw hici ciang dinmun mah hi, ci-in ei leh ei sung bek ki etteh, etkaak kha kei ni!

Mailam dinmun ding ki puahkhol theilai
Tulaitak ih dinmun sangin a sawtlo-in ih tuahkhak ding dinmunte ki puahkhol theilua hi. Kei, nang, khuapihte, innkuanpihte, naute, tate, mipih akuama peuh sumzon’ sumlawh haksa takin nektawm zong ding a deihsak omlo hihang. Amau aa ding koici kigin’ sak thei ihiam? Zomi mimal khat a daupai leh Zomi bup phattuamna khat mah ki cithei hi. Zomi innkuan khat a daupai leh Zomi bup phattuamna mah hi; Hihte pen, mipihte aa ding panpih zo nai takei leh a omomna pan minam tawisang hipah hi.

Ih mangngilh dekdekta pilna
Tulaitak dinmun sangin a sawtlo tuzawh kum (5-10) aa hong tungpah ding gamthumna aa ih dinmnun ih puahkholh nop leh, ih pilna sin tawh nasem zo ih tam mahmah kulding hi.
Kei leh nangin ihih leh, pilna sin a patna pan kipan kik ding cih zong a haksatna pawlkhat a om hang, a sinthei gual ih nau, ih tate tul tampi ki pantah thei lua hi. Ziakai nailo hi.
Malaysia gamsung deuhdeuh ah Zomi khangno 7,000 val bang omding hihang. Tuamah bangin, basic education (sang pilna a bulpi teng) a sin gual ding, lamkhat pan kum (18) nuai naupang pen 2,000 val bang omding in ki ummawh hi.
Kha bangzah taam ding ih theihkholhlohna hih Malaysia gamah hih ih naupangte ii dinmun ih muhpih kei aa, ih mangngilh khak aa, ih ki theihmawh bawl leh tuzawh kum bangzah hiam a sawt hetlo khat ciang Zomi sung pen, tulaitak dinmun mah tawh ih nuntak khuasak zia kibang lai veve ding hi. Zong kiamzaw maithei hi!
Hih naupangte bek hilo-in ei a upakhinte mahmah zong, ih sintheih ding, gentehna mangkam cihte khawng ciang beek hahkat aa, lampi zong aa ih kan, ih sinsin kei leh gamthumna ih tun’ ciang zong atunglam aa ih gen nuntak zon’ zia mah tawh ni tumtum lai ding hihang.

Ih makaih, ih minvawh bangin hong nungta ding uh hi

Naupang khat pilna manphatna ih lah zelzel kei leh, amau ukzawk ding thu pen tuhun teh kim leh pam ah tam mahmahta ahih manin tuate-in a lungsim uh kaii zaw tawntung hi.
Tuhun teh, ih ngeina khat bang danin a kum tawm hong cing pian leh, ‘Tangvalte/Nungakte’ cih min vawh pah kha zel ihih manin a tangvalta akisa pah, nungakta akisa pah ki tam mahmahta hi; Asan’ zia ki siamnailo sungah zathuai khollo hi.
Gam khangto, minam khangtote-in kum (18) nuaite bang pen naupang bangmahin gamtat hoih pattah ding khempeuh pantah uh aa, eimi sungah, tua gualte nu leh pa’ ukna, a kem khatpeuh ii ukna nuai pan suakta nuam aa kitom keii pen, amau utbang aa ih khah khak loh ding etcik kul tawntung hi. Tuabek hilo-in, kum (18) hong naihteh, ka nau tangvalta, nungakta, ka ta tangvalta, nungakta ci aa ih ciapteh khak leh tuabang lian mahin hong nungta pah ding uh hi.
Ih kiim leh pam, ih muhna ih zakna-in ih nuntak zia hong hei zo mahmah thei aa, a khangto gam bang ih tun’ teh, naupangte aa ding a khan’toh baih theihna ding uh muhna zakna tampi a ommah bangin, a susia thei ding zong tuazah mah om tawntung hi. Ih makaih bangbangin nuntak pih uh cihmah bangin, thu hilh tangtang zawhding kisam ngiat hi. Banghang hiam cih leh, naupang lai thu ngaihsut theih ih kipat teh, ih lungsim hong kaikai, hong samsam, hong dawndawn thute pen a tamzaw khan’tohna hong pialo vive hizaw aa, ih kin hetloh leh ih zuihnop kholloh teng a thupite vive hizaw hi.

Lampi dang omthei gige kimlai, nasem sum thalawh zo ding hita ci-in, na semsak aa, sumtang mah ih zon’ sak tangtang leh a kumcin’ ciang zong tua bekmah hong theipah ding aa, sum bekmah ngaihsutin hong neiden ding hi. Sum thupilo hilo-in a thalawh zia ding makaih, lamlah kul hi.

Koicidan nuntak zia deihsak ihiam
Nuntakna ding sum zon’ zia pen, ei pattah bangbangin amau hun ciang ih naute, ih tate-in hong zui takpi ding uh hi; (Khatvei ih etphat dingin, naute, tate icih ciang eima innkuan bangkua sung lian bek enlo-in, Zomi sung aa ih nauzawte, ih tate, ih tagualte ih mitsuan zawh ding hanciam ni.)

Sum mah thupi-in tha lawh tangtang un, icih leh tuabang mahin hong zuiding hi. Adang nuntak zia hong mulo ding hi.
Sum zon’na-ah thatang mah kisam hi, icih leh thatang zat tangtang sum thalawhnate bekmah hong theiding hi. A tawldam zaw, ahih kei leh khuak zat nasepte hong theilo ding hi.
Sum thalawh pen, ih nasepna pute/pite ii thu man’ ding aa, cihtak mahmah ding hi, cih tawh ih thuhilh leh thu mang ding, sem tantan ding cihbek hong theiding hi. Amah pen tua a thu mang, a citak nasemte a ukpa, ahih kei leh nasep a guan’ pa/nu a hihtheihna ki ngaihsun khalo ding hi.
Kei zong khua-ulsa thuakin gimin tawlin sum thalawh tangtang ingh, cici-in tua lampi bekmah ih sialsak khak leh hong zui takpi mah ding hi; Bang tanvei semzo ding a hiam?
Ka nasepna-ah, mang pau siam kisam se kei cih tawh ih makaih khak leh tuabang lian mahin nuntak a kizong tek sa mah ding hi; Hun omlai buang aa, sinsak lo ding ihiam?
Kei zong nisim mahin kuan tangtang ingh, tawlngak hun zong omkei mai ei, ci-in tua lampi bekmah ih muhsak leh ei nung hong zui bilbel mah ding hi; Cikteh a cimtak di’am?
Tulaitak Zomi tampi nasep a lem peuhpeuh tawh nuntak zong hihang ci-in, a hoihzaw lampi ih lahtheih kei leh ih naute, ih tate-in zong pilna siamna tawh nasep zon’ zia, nasep thupi taktakte ngahzia hong mulo ding uh aa, sang leh pilna sinna phualte-ah a hun uh a beiloh hang awlmawh lo lel ding uh hi.
Koicidan nuntak zia deihsak ihiam (a zom)
Nuntakna ding sum leh pai zon’ zia pen, ih naute, ih tate-in, tulaitak mah aa ei pattah bangbangin amau hun ciang hong zui takpi mah ding uh hi.
Naute, tate icih ciang eima innkuan bangkua sung lian bek enlo-in, Zomi sung aa ih nauzawte, ih tate, ih tagualte ih mitsuan zawh ding hanciam ni; A sawtlo hun khatteh Zomi te dinmun alak dingte vive ahi uh hi.
Koici bangin hong lakding uh hiam? Gamthumna gam khat peuhpeuhah, Zomi khangnote ii kihelna zawkdeuhna vai khat peuhpeuh tungtawnin mite ii hong ciaptehna zia ki zakik ding aa, mite-in apha aa hong mu hiam, asia aa hong mu hiam khat zawzaw hipah ding hi. Apha lam tamzaw maw, asia lam tamzaw ding cihpen tulaitak aa athu ngaihsun thei gual peuhmahin koici bangin lampi sialsak khol ihiam cih tung ki nga mahmah hi.
Hamphatna lampi kihong tuamtuam tawh gamthumna tung ngeingai-in, nasep hoih amu tawh, innhoih aneizo tawh, van gil a neizo tawh tampi mah ih omding kawmkal pan, a gamtat sia, khamtheih guihtheih zang, ahih kei leh thusia bawl khatpeuh hangin minam bup hong ki theihlawh pah ding hi. Hong ki ciaptehna pen apha za khat bang a om hang, asia khat a bawl kha pa/nu hangin asia lamin ki limgen zaw tawntung ih ten’na leitung hi.

Ih ki-uk, ih ki taiitaii zong a genhak simsim Zomi naupang tampi om in, ciangduai leh bil nuai khawng tawh ana ki-uklohna gamte tung le’ng bangci pattah zawh ding ihiam? Tuhun lian mahin na thuzawh kul pah aa, hong zahtak na ding mun ah hong zahtak theiding leh a kisap leh hong kihtak na ding munah hong kihtak dingin ngaihsun sun liang mah aa makaih kisam hi. Tulai naupangte tei uh aa, deihsak nak leh etcik kisam hi.

Innkuan sung pan ama thalawh lohin apiang nawn vetlo Zomi naupang sum thalawhte ih gen naikei ding aa, vaihawm zia adang omthei lai na pi-in innsung sumzat tawm a phattuamna ding khawng tawh Zomi naupang mi’ khutnuai aa semding a kisawl, ahih kei leh a kiphal kitam semsem hi. Tua dinmun pan, kha khatin angah zah hong sim ding aa, kim leh pam ah naupang lungsim a kaii muhtheih atam mahmah bangin, phone hoih nono hong mu ding uh hi. Internet sai hong theiding uh hi. Puansilh nikten hong lung himawh ding uh hi. Tua adeih sim giugiau vante hong leizawh teh amah leh amah hong kimuang simtham ding aa, a kimuthei vante bek hong lunglut semsem ding uh hi; A kimutheilo, a kigutheilo, hawmkhiat hang a beitheilo Pilna zon’ ding hong phawk nawnlo tektek ding hi. Mihing hamphatna aki piakhia ziahziah gamthumna khawng ciang tua hamphatnate tawh behlap in, Pilna sin takei le’ng, ahih kei leh Sang kah takei le’ng sum thalawhna lem lel, neih leh lam kinei zo mahmah lel cih lungsim hong puata ding uh hi. Anung theih teh ziakai khin ding hi!

Zomi unau, innkuan khempeuh in ih theihding a thupi khatah, hih Malaysia ah tawlkhat sung a ompak hilel hang ee, gamthumna panin ih naute, tate maban ding limtakin geel pha ni icih khak hetlo ding thupi hi. Tuabek hilo-in, gamthumna tun’ ciang atangtang khat hong omsam in teh cih ngaihsutna zong neihkhak loh ding thupi hi. A lungsim puakzia ding uh, a thumuh ziading uh, asia le apha khentel theihzia, akum uh hong cin’ ciang amau leh amau nuntak zon’ zia dingte, hih khempeuh pen Sang inn pan hong hilhsak tawntung ding uh hilo hi. Ih tuahding thu vive lakpan apha, ahoih tampi ih lamet mah bangin, asia penpen ding zong kigin’ kholh ding thupi hi.

Gamthumna ah gambel dinmun tawh atung naupangte ii hamphatna pawlkhat ommah hi. Nuntak khuasak kipan kik ding himawk in, innlam pan ih ken’ ih tual lungsim leh innkuan ki makaih zia tawh tuabang hamphatnate hong tun’ tak ciangin a san’ zia, a dawh zia leh naupangte ih zatsak zia pilvang kul ding hi. Nisim nuntak khop ding ciang tawh zong ibuai mahmahna pan tua gamthumna khawngah va tung le’ng huhna tuamtuam hong lutding aa, naupang sung deuhdeuh ah nuam asak luat pah ding, hih val nuntak bang omnawn hiam acih khak ding uh lauhuai mahmah hi.

Gamthupite-ah, mite-in atate-uh aneu-aa kipanin lungsim picing, amah leh amah ahoihlam aa kimuan’ ngamna lungsim ana hilh toto khin lakah ei naupangte ava kihel tak ciang apuaksa uh ngeina pawlkhat va laihthei pahlo ding aa, eimah mahin tuilam bang hileh ih sialsak siamkei leh naupang khangno lakah a omzia a tatzia ding uh hong musiam hetlo ding uh hi. Tua kawmkal pan, khan’tohna bucing apia tampi aom mah bangin siattheihna apia zong tuazah khat mah aomna gam hita ahih manin, a khangto taktak dingte lakah akihel zawhkei leh a lailak maw, tuasang’ a niamzawte lakah maw a omzia, a tatzia nuam hong sazaw ding aa, a tawpna-ah pilna sin’na Sang innte tawh ki gamla tektekin lamkim lampam nuntakna lak zong tung maithei hi. Tua hun tung taktak leh, ki puahpha thei nawnlo hi! A nu leh pa hong ngawhthei lai hi!

A sawtlo hun khat ciangin, adeuhdeuhin Malaysia pan aa gamthumna tung Zomi naupang-khangnote ki ending aa, tua hun ciang mite-in hong ciaptehna khat, hong muhna khat teiiteii hong omding hi. Hih naupang-khangnote khan’toh zia hong thupi leh hih minamte khangto uh, thupi uh ei hong kici ding hi. Tua hun ciang, a pantah, a hilhzo a nu leh pa ahih kei leh a keemte pen pahtawi huai Zomi aa ding nasemte hi gige uh hi.

Hua minamte university thupi vive-ah tampi kah uh, hua minamte kimawlna-ah minam dangte zahtak khop zahin kiva uh, hua minamte music lam siam mahmah uh, hua minamte Sang naupang tgkhamsung vaihawmna khat peuhpeuh ah madawk uh, hua minamte kidemna khat peuhpeuh ah mi tungtuang uh, hua minamte a ngeina, a lai leh kampau uh kemcing zo uh, hua minamte ki thu hual uh, hua minamte milak omzia siam uh, hua minamte citak uh, hua minamte hih gam mahmahah zong makai dinmun tawh kituak uh, hua minamte gamtat kidawm uh, hua minamte a upna nuntak pih takpi uh cihbang aa aki ciamteh pen Zomi naupang-khangnote vive ahih zawhna ding a lunggulhlo omlo ding hihang. Tuabang dinmun ih tutpih zawhna dingin, gamthumna tun’ khitciang kithawi pat ding hilo aa, khaici tuh hun pen tuhun ahi hi.

Tg. Kham

(ZAM 2011)