Kha Suanga Kibualna maan taktak

Jesuh’ min tawh tua gamkemdawi a cihte uh a hawlkhia thei vangliatna na nei phial zongin tatkhiatna thu ah a kician lo mi na hihleh a mawkna hi ding hi. Luka 10: 20 – “Dawite in na thu uh hong manna hangin lungdam kei unla, vantungah na min uh a kigelh manin lungdam zaw un,” na ci hi. Jesuh’ hanga Pasian hehna a dam manin, vantungah ih min a kigelhna thu sangin a lamdang zaw a lian thei zaw thudang om nawn lo hi. Lungdamna thudang, tahum gospel ih cihte in a dawi hawlkhiat ding thupi sakin a tatkhiat ngahna uh Singlamteh thu ngai nuam lo mawk uh hi.

A siansuahna thupi sak napi, Lai Siangtho’ gen sianthona sungah nungta nuam lo uh hi. Khamitna thupi sak keei pong mawkin Kha Siangtho gahte a nuntakna vuah kimu zo lo mawk hi (Gal. 5: 22-23). Lam le dian le tawn teng tawh kha sungah cici na pi-un Kha Siangtho taktak pen thei kha lo nei kha lo uh hi. Kamtuam pauna, lamna, dianna, tawnna, kipumkhukna cih bangdaan le a pawlpawl teng pen kha sungah kibualna ci-in gen uh a, LST’ gen Kha sungah nuntak sianthona thu taktak pen a kitel khial nadingin a gamta uh hi a, Paul in tua pen lungdamna thudang na ci hi.

Lamna, khut betna cihte amah le amah in siatna om het lo-a hoih mahmah hi. Ahi zongin tua banga lamna le dianna cih namte a bulpi-in a ngaihsunte in lam nading, dian nading, khut bet nading mun le hunte ah a lungdam thei lote hi zel uh hi. Hih lamna le dianna thute bulphuhna tawh Kha thu le pianthakna thu ih ciangtan mawk leh kipai khial ding hi ci-a genna hi beka, khutbetna, lamna, dianna cihte a hun a mun ah kilawm taka zat ding mah ahi hi.

Ahi zongin hih banga a tungtham gamtatna teng a bulphuh luate in hih lungdamna thu taktak ahi tua Jesuh Khrih sisan hanga vantung ah ih min a kigelhna thu gen thei lo mawk uh hi. Dawi hawlkhiat nasep pen lungdamna thu (the gospel) hi nai lo a, Jesuh in vantungah na min uh a kikhum manin na lungdam zaw un, acihmah bangin tua lungdamna thu kimuam-a, kihilhcian ding pen a thupi penpen hi ta hi. Tua daante pen Kha thu sunga kibualna maan taktak hizaw hi.

Evan. Suangh Dal