Naupang Lungsim:
1. Khuamial sungah lau, mitam lakah lau, kuamah om kei lezong lau, hunhoih sungin kipak, hunsia-leh bucip!
2. A zo lamlamah pang nuam, a neinei mai-et nuam, suan ding nei-leh kihisak, nei kei-leh kidai-thah!
3. Tawm a ci-na-leh tau pahpah, tawm dah-leh kap pahpah, tawm nuam-leh nui pahpah, tawm nei-leh tang’hau bang!
4. A nasepna a manphatna thei lo, meii niim-leh khuadak, guah phin-leh tai pah, nitum kal ngaklah, lamdawt tawn nuam!
5. Mun hoih ngah taleh a gei-a-te eng’, khuapi sung vak-leh amah kineu muh, nungak khat mu-leh a zi hawmthawh, tangval khat mu-leh a pasal hawmthawh, mi’ tate mu-leh a tate hawmthawh, muh hau-leh buai semsem!
6. Mupah lapah ngahpah nuam, a hoih zaw kigeel taleh ngak zo lo, a tungtham tawh lungkim, olno takin nungta nuam, pauhlap zongzong, a min bekin sem!
7. Thu im theilo, thu khual theilo, kiphat-leh nuam, kihilh-leh heh, tuak lelah kibuaipih, kisuan nading mel thei lo, a hiding mah ki sasa!
8. A lawmte ngai mahmah napi-in, muh nading munte ah tuh nuam, khual mahmah napi-in, mun awng-lote ah nawlkhin nuam, a hi-pen ding ut!
9. A tup, a sawm’khat laih kawikawi, lungkia baih, mite’ mitmei en lo, a hazate’ thugen nangawn um, thuhoih thusim kikuppih thei lo, tuakkhial zel, kamsia kisa den!
10. A gilkial-leh heh, ne lelah gilmul vang liang zel, vah lelah dongtang sa, ni sa-leh hang, guah zu-leh phun, kisui khaleh dakkhawng, ngeukang in pik khaleh kukek!
Khangno Lungsim:
1. Pumpi kilamthak, lungsim kilamthak ahihmanin, kip nailo-in kihisak nuam napi, teldotna ngam nailo!
2. A pianglo ding pipi, a hitheilo ding pipi ngaihsun kha pahpah!
3. Mite sangin a sang zaw, a hoih zaw suah ding ut, midangte’ sep sangin ama’ sep a hoih zaw-in mu den, mi hawmhawh den, a nu a pa zong hawmthawh!
4. A lungsim khauh ding tawh kibang napi, a sungtawng taktakah, amah-le-amah kihawmthawhna nei den!
5. A nu, a pate’ zia en mahmah napi-in, a nu, a pa a kihta lo bangin kilang nuam, ahizongin a simthamin a nu, a pa it!
6. Amah a it, a khual mite thei siam, a pawlbawl’ peuhpeuh zui, khemnopin taksang baih, innkuan sinkhamna piang!
7. Zi neih, pasal neih vai-ah ngaihsun cianlo pi-in nei buatbuat nuam, a pualam melhoihna bek en-in khial thei tawntung!
8. Lungsim manlang, ngaihsutna manlang ahihmanin hih hun sung pen mi tampite’ pianthak theih sung hi!
9. Mite’ khutnuai-a om ding ut lo, suakta nuam, a kikhungsa thu khat peuh zui nuam lo, ama’ ngaihsuttawm’ leh a geeltawm’te bek thupi sa!
10. Mi minthang, mipil misiam, mihau milian, galhang thahat mite’ thu za nuamin thu tampi a ciintheih hunsung ahi hi.
Upa Lungsim:
1. A thu bangin nuntak sawm, lau taleh a lau lo bangin om, cing takei-leh a cing bangin om, muanhuai takei-leh a muanhuai bangin om, zawng taleh thumthum lo, a-sia a-pha ding lung ngai!
2. Ki-thusiamsak masa lo, ki-cinghsak masa lo, a hunhun-ah cilel, a gensa khat peuh dokkik lo, a lem lote za sak kik, mite a mawkna in lamen sak lo!
3. A ngap lohna gengen lo, a hehna peuh hanghang lo, a dah hun leh a nuam’ hun kilamdang lo, a ngahna leh a zatna en-kak, sikseh, koihsiah, kiguang khual, beita cih khit phamawh khual zo lai!
4. A lauhuai munte ah nawlnung ngam, ki nunungbawl’ ngam, lawmte hansuahin thapia, a muh ngeiloh khat uh zong muhpih sawm, a lamet ngamloh khat uh zong ngahpih sawm, minthan nop manin sem lo, sep manin minthang zaw!
5. Na thakthak muhkhiat sawm, upmawh thu-le-thugal-zakah kinga lo, mite buaibuai sak lo, lamdawt tot sawm lo, a ngah zah tawh lung kim!
6. Hun masa lam-a supna phamawh sa lo, hun masa lam-a lelhna phamawh sa lo, hun masa lam-a zawnna phamawh sa lo, thahat lai-a Singlamteh puak ut zaw, nopsakna nunun nuam!
7. Ngaihsun masa lo-in kam pau lo, phattuamna piang lo ding pulak lo, ki maitang phat hangin nui-pah lo, gensiatnate kipuah na’n zang, galte’ tung pan pilna la, a vot a sa sin kawikawi!
8. A kikholhpihte, a kizoppihte telcian, a telcian mite kiplet, mu-mu ta-keileh muang kinken, mite in heek taleh taksang lo, a hunciam’ kipelh lezong hungaih lai, kimuh kik mateng ki um kip!
9. A ngimna, a tupna ki gensiat sak taleh, “Deihna kibang lo hi” ci ziau lel, a haza khat omleh, “Ka nasep hoih hi” ci ziau lel, langpang a neihleh, “Hong ki-eng’ hi” ci ziau lel, a sawt-le-sawtlo-ah buai lo, lawhcin ding bek thupi sa!
10. A nasep a man phatna tel, gim-le-tawl’ thuaklawh ngam, lam khakna-le-langpannate nawk ngam, haksatnate a nasep a manpha sak teng hi ci, leitung khuahunte in kilamdangsak lo, leitung kilamdang sak zaw! Tdkhen
Khaikhopna:-
” Na Khempeuh, Pasian’ Minthan’na Dingin Hih Ding ” (Korin masa 10:23-33).
Comment piaknop aomleh...