KFC sai hon kasawm leh ~ Mungpi Khupson
Ka omna kiimah annekna sai tuamtuam tam mahmah napi KFC bekmah dimden keei mawk, a geia saite awng hiahua napi gual saupipi thum taka kigual deudau pen kei zong bang hi peuhmah hiamaw cin ka va zuan se hi. Minute 15 phial dinsa a kingakzo neek ding pen a free lah hi buang samlo, limsamin teh maw cikawmkawm phei kham lamzong kiphawk manlo zawzen hi. Tualeh kei hun hong tung petmah, a tam theithei, tawm man penpen-a’ ka theih “Jom Jimat Set A” ka order sukpah a, original price pen Rm. 6.10 hi mah leh Govt. tax. Cent 30 behlapin a vekpi’n Rm. 6.40 ka pia hi. Bang tengteng hong pia hiam cih leh: Aksa bak khat, chicken rice phamkhat ding khong, Coles law sikkeupi dim leh Pepsi hai khat ahi hi. Gil bel vah lian kei, nekma sang bel kilamdangzaw deuh cih ding hi!
Ka nekkhit teh ka ngihsutna hong kipan phingphing. KFC an hi zahta a kideihzen pen kenzong mun khatah KFC sai khat hong leng ka hau baih ziau kei ding maw…cih ngaihsutna hong lut pah a, hon ding ka kipan pah hi.
Nike-te thupi “Just Do It” tawh kihanthawn kawmkawm, pen khat tawh laidal khat ka maingat pah tinten hi. Sai khat sap ding, nasem mi 10 khong la ding, ak khawina farm pan wholesale in ak lei ding, buhtang bel tam lua…Coles law? hak kei lua bawngnawi leh kawpilum mix hilel…Pepsi? Coca cola zang zaw ning minthang zaw!! bang kisam lai?? Kalaisai! upmawhsang van kisam tawm tuak zaw na e! Meetlua ding aih cianga ka sum zat dan ding bang ka buaisim zawzen hi!
Tua zahta a meet ding KFC sai pen, tua zahta’n baih ziau ahih leh bang hang mikim in hong ngeingai lo aitam? cih thu ka kidot kikna panin zaitha khauhsa teng patbang hong nemkik ngiingei hi. Banghang maw? Manta ci’n KFC min kimawk zat theihloh… Franchise kici khat na om se vencin KFC minin sai i hon nop leh KFC phualpi pan phalna laidalpi leh sum tampitak neih masak na ngai gige mawk!! En dailenbuk lam banga olziau ding i sak leh na tuaci vetlo!
KFC sai hon theihna dinga’ kul le kisam teng:
http://www.thefranchisemall.com
Hihte pen sum tawh kisai kilemna bek hi in, hih khit ciang training limtakin hong pia lai ding uh hi.
KFC tawh kisai tawmkhat:
A pankhiapa : Colonel Sanders (Harland David Sanders)
Kipat kum : 1930 (North Corbin, Kentucky)
Headquarter : Louisville, Kentucky, U.S.
KFC Restaurant omzah : 15,400 (US=5,200, China=3,200, India=86, Malaysia=445)
KFC omna gamzah : 109 countries
USA ah Zomi, Sushi sai nei om kawikawi ta hih tuak in lungdam huai mahmah hi. KFC, Mc Donald, TGI Friday, Starbuck cih bangte pawl neizo lai leng khantohna lianpi hi ding hi. Zomite sumbawl siamte hi hang, bang hang neilah tuan ding!
Mungpi Khupson
2011-02-25
Comment piaknop aomleh...