Kawlgambup Pasian’ kiangah ciahkik hun mahmah ta

Kawlgambup Pasian’ kiangah ciahkik hun mahmah ta

Lungkham mangbangin cihna ding theilo in, thum in tau in i om laitakin i phawk ding thu in; “Pasian’ deihna/phalna om loin bangmah piang lo hi,” cih leh “Pasian’ theihloh kalin a piang bangmah omlo hi,” cih thu ahi hi. Tua ahih leh bang hangin Pasian in hi bang thuak dingin hong phal/deih hiam, cih i kan kul dinga, hi bang thuak dinga hong phalna a hang zong tampitak om kha ding hi.

A nungta Pasian a theilo, a um lo gam hi photphot banah, Pasian’ deihna tawh kituak loin ki-ukna leh kimakaihna tam lua, a mulkimhuai leh a lipkhaphuai zahdongin kibawlsia ngekngek, Pasian’ mite langpan’ in simmawh, Pasian’ mite mahmah in Pasian nungngat in taisan, Pasian’ mite in Pasian’ gam leh ama dikna sangin, leitung thudangdangte thupisak zaw, etc… adang tampitak om lai ding hi.

Pasian in hi bangin, gimna lianpi hong thuaksak taktak ciangin, kuamah in khaktan zo tuan lo hi. Lungkim takin thuak dingte i thuak hong kul ta ding hi. Ahi zongin hi bang i thuakna sung panin, kipuahphakik thei a, kiniamkhiat in ama kiang i zuatkik nak leh, Topa’n eite’ khialhna hong maisak dinga, i gam i leitang hong hoihsakkik ding hi(2 Khang 7:14). Topa kiangah i ciahkik nak leh, amah in eite hong balgawp hangin hong damsakkik ding a, eite hong liamsak hangin i liammate hong tunsakkik ding hi(Hosea 6:1)

I gamtatnasate limtakin ki-enpha kikin Topa’ lamah kiheikik ni. Vantunga om Pasian tungah i lungsim pia-in thu ngen ni. Kah La 3:40-41

Hih thupiang khempeuh pen, Kawlgambup in Pasian a muh nading leh Pasian tawh i kinai zawk semsem nading hizaw ta hen. Amen!

Khazih sungah, David Tuang