Kawlgam zinna thu ~ Rev. Neng Za Khup

Kawlgam zinna thu ~ Rev. Neng Za Khup

KAWLGAM LEITANG SIK MASAKNA: 1960 January kha a Murlen, Mizoram pan Bualkot Manipur-a ka pem lai un ka ni Goih Khaw Dimte khua Luangel, Kawlgam tawn ka hihman un kei a ding in Kawlgam ka sikkhak masakna pen a suak hi.

KAWLGAM ZIN NIHVEINA: a kum thei cian nawn kei mai ing. Ka Ni Goih Khaw Dim leh a tute numeino nih (Dim Ngaih Don leh Lang Za Cing)te Bualkot-a hong pem ding laiin Bualkot pan ka U Dam Nang tawh anute pii ding in Luangel khua ah ka hawh kik a, ka kiik lam un U Nang Cin Dai in ong zui a, Kawlgam nih vei ka sikkhakna ahi hi.

KAWLGAM ZIN THUMVEINA (1974-75): December 1974 in pianthak lawpna hang in Kalwgam veina nei ka hih man in Tedim leh a kim a pam ka phak theihna tantan pha ding in kei bek ka kipan khia hi. Kei bek a khual zin ngei het lo ka hih man in a gen loh uh hang ka nu leh ka pa’n zong ong muang pha lo hi in thei ing. Cikha khua ah ka gaik a, puan lum lah kipua zo lo, ka giahna ten lah ong behlap zo tuan lo ahih man in tua zan pen vot mahmah ahih man in ka ihmu khol kei pah hi. Delhphah ding gina zong om lo in Sialvun ong phahsak uh hi.

Saipimual ah:
Hong nusia khin Rev. Dr. Chin Do Kham-te khua Saipimual ah ka giak a, nitak in ong kikhoppih uhi. Electrict cih thadah Patromax (meivakpi) nangawn zong om lo ahih man in Pulpit veilam leh taklam meilah/taaksing ka hal uh a, tua meilah kuang vak zang in ka kikhawm uh a, nuam kasa mahmah uh hi.

Tuithang ah:
Tuithang khua ah ka giak leuleu a, inn ah kikhopna ong neih pih uh a, kha khanlawhna tun lai, alawp lai uh ahih man in thugen lasak a nuam mahmah hi.

Tedim ah:
Tedim ka tung masa pen a, Bu Kam Cin Hang te’ inn ah ka tung hi. Krismas nai kuan ahih man in nitak in Krismas carol na ah ka zui zel hi. Tua lain AG leh EBC kikhen nai lo hi.

Tonzang ah:
Tedim pan in Tonzangah paiin Sia Cin Sian Thang te inn ah ka tung hi. Tonzang ah mel theih tanau nei leh program a nei zong ka hituan kei hi. Tonzang a ka om sung in Sia Phun Dum in cialpi hong bawl zen zen a, nitak in counselling khawng ka huh hi.

Gamlai ah:
Tua pan in Gamlai ah pai in Sia Khat Khaw Gin te inn ah ka tung hi. Gamlaiah zong mel theih tanau a nei cih bang ka hituan kei hi. Sia Khat Khaw Gin Murlen khua ka khua lui uh ah ong zin ngei in ka inn uh ong tung hi. Dalpau / Singkuang pau i cihte hong pua in tua khawng ong ngaisak hi. Tua banah la uk mi a hih man in mizo la a theih thakte khawng a sak hiauhiau ka thei hi. Biakna kikhopna zong biak innah ong zat pih uh hi.

Cingpikot / Keizang:
Ka Ni Don Khomante khua Cingpikot/Keizangah Krismas ka zang hi.

Phaiza ah:
Phaiza pen ka pa pute omna hi a, (ka theih khelh kei leh) kumthak zang ding in ka pai hi. Ka pu Gin Dal te inn ah ka tung hi. Sa zong ong gawh hi in thei ing.

KAWLGAM ZIN LIVEINA (1983): Manila pan M.Div. ka zawh ciang inn July 29 in kipan khia in Bangkok-ah zan khat ka giak hi. Bangkok pan in Rangoon tawn in July 30-August 1 dong ka tam hi. YMCA ah giak in mel theihte innah an ka ne kawikawi hi. Pa Gin Do Lian te inn leh Sia ST Hau Go-te inn a ka nek ka phawk lai hi.

KAWLGAM ZIN NGAVEINA (2014):

SHILLONG –KOLKATA (Jan.16,2014): Maynmar a hoh ding in Jan.26, 2014-01-18 zinglam 9:45am in Shillong ka inn uh pan ka lawmpa Jonathan van Aswegan, Johannesburg, South Africa a om, NECTAR in Laisiangthou Lehna a ma laakna a ka partner uh toh Yadav taxi ML05 –J7373 white toh Guwahati Airport zuan in ka tais uk uh a, Nongpoh khang zek a ZEN CAFE ah niangtui leh Puri ne in, Airport dong kham hetlou in teitak in ka pai uh a, tutung ka mawtaw tuan nuam ka sa hi. Airport 1:15pm in ka tung uh hi. Guwahati airport-ah Prof. Dr. Lalthantluanga, Vice-Chancelor, Mizoram University toh ka kimu uh a, niangtui hong khilai/taih in ka dawn khawm uh hi.

Guwahati pan Indigo flight in 3:20pm khawng in Kolkata ka zuan uh a, 4:45pm khawn ing Kolkata airport ka tu uh hi.

KOLKATA DOMESTIC AIRPORT: Ka zin louhna na sawt ta hi ding hiven, tuni Jan.16 ni’n Guwahati pan Kolkata-ah ka seppihpa Jonathan van Aswegan toh ka leng suk uh a, Kolkata domestic Airport sung ka lut ciang ka hi hiai-huai zaw zen hi. Na hoih in, na siangthou-a gamdangte muh ding in zong zum huai nawn lou hi.

MIZORAM HOUSE SALT LAKE: Ka vak kawikawi na uh tawl pian ka hih man un Salt Lake a Mizoram houseah L.O. Pu Hming a thusiamna leh deihsakna toh private room twin bedded khat mikhat Rs 525/- in room no.604 ah Jonathan toh ka giak uh hi. Ka ngaihsut sang na hoihlou zaw lua ahih man in ka tha bang dah in, tua hang mah ahi diam zong ka ihmu thei het kei hi. Room neu cik khat, a kipuah peuh mah lou, lupna lah sik lupnate, delhphah lah pan dikdek, nin simphial, lupna khuhna lah a sia pian a ni’n sim hizaw mah lai, zan puan lah a ni’n sim mah a vot dekdak a silh nop huai het lou khat tuak na koih uh hi.

Kisilna room ah lah bangmah om lou – towel, soap leh a dang bang mah koih peuh mah lou, tuilum sakna iron-rod om tei na pi’n kizang thei lou zaw mah lai. India gam i standard tua bang hilai ta zen ei! Ka lawmpa Jonathan, South Africa mi (Johannesburg) khua mi hi a, ka zum mahmah a, nuam kasak louh dan leh ka lungkim louh dan zong ka hilh ngam kei hi.

Jan.17, 2014: KOLKATA INTERNATIONAL AIRPORT: Ka giakna uh Mizoram House Salt Lake pan in 6:30am in Inteernational Airport zuan in Taxi khat in ka tai uh a, International Aiprot 7:00am in ka tung uh a, Rs 300/- taxi saap ka pia uh hi.

AIRPORT Thak: Gam dangte-a Thailand leh Singapore khawng te a bang a hoih ahih louh hang, Kolkata international Airport thak zong a zum huai lua bel hinawn sam kei. Na nuam mahmah ta hi.

SUM KHEKNA: Kolkata International Airport-ah foreign exchange hih theihna mun khat bek ah om a, ut zahzah khek theih hi. A rate bel sang peuh mah hi. Ei India sum nei Dollar a khek dingte kisum mahmah mah hi. India sum Rs 61/- USDollar khat a kibat laiin India sum Rs 65.50p in USDollar khat ka khek ta zen uh hi. USDollar khat-ah India sum Rs 5.50p. kisum ziahziah cihna a hi ve. Met peuh mah uh a hi ve.

Kolkata pan in Air India vanleeng AI-227 in Myanmar zuan in 10:30am in ka leng khia uh a, Yangon airport amau lam 1:20pm in ka tu uh hi. Air India pen a tutna khawng khe koihna ding vanleng dangte sang lianzaw ahih man in nuam kasa hi. Ahihhang a nuam lo ahih leh an leh air hostesste a hi uh hi. An hong pia na pi uh in a lim het kei hi. Air hostess-te pen upa thei mahmah, lah nuih mai lo, vanleng tung tuan nuamsak lo phial uh hi. International a leng vanleng-a hostess ding in a zumhuai hi in ka ngaihsun hi. Kawlgam immigration a semte numei pasal maitai in bangmah haksatna hong pia het lo uh hi.

Yangon van leng tual ka tun ciang un inn pua pan U Khantawng leh atapa Lianpu, ka tupa pa Vial Khan Do (Amah DO pe’n ka U Hil Khaw Zam tapa upa pen hi a, Tahan a om, Yangon doctor a kichek-up sak a na hawh hi a, Yangon pan Kalamyo dong man hong makaih ahih man in, ama tungah zong ka lungdamna a lian mahmah hi) leh ka tupa pa mah Rev. Khoi Lam Thangte’n (Lam Thang pen ka Ni Don Kho Man tupa hi a, Bible Society of Myanmar-a General Secretary a sep lai taka hi a, Yangon ka hawhna ding uh tawh kisai a bul pan a tawp dong na khempeuh ong saisak leh ong makaih ahih man in ma tungah zong ka lungdamna uh lian mahmah hi) ama office motor leh U Khantawngte car tawh hong dawn uh a, inn tung mah ka bang uh hi. (Khantawng pen Bualkot a ka om lai un tangval khawm ka hi uh a, male voice, action song leh lapawl khawng a sa khawmkhawm sa ka hi uh a, kum 20 nung ciang a kimu kik pan ka hi uh hi. Amau pata in Yangon a kom sung ten gong nusia lo in, a car uh tawhka hawh nopna peuhpeuh ah a man ngen lo in hong pua kawikawi uh ahih man in, ka lungdamna alian mahmah hi).

Ka tunna ding uh a a na book sa uh Hotel Panorama –ah hong kha uh a, tua pan in hong paisan uh hi. Nitak ciang in ka tupa pa Rev. Khoi Lam Thang in “Hot Pot” restaurant lian mahmah khat ah nitak an hong nek pih a, annekna dawhkan tungah kihuan tawmsou siahsiah lai kine ahih man in fresh mahmah a lim mahmah ahihman in gilvah tak ciat in ka ne uh hi. Ka annek man uh tam mahmah ding ahih man in bngzah bei cih zong ka dong ngam zawzen kei hi. Atawmpen in Kawlgam sum in Ks 100,000/- phial bei in ka um hi.

Annek khit ciang kei leh ka tupa pa Rev. Khoi Lam Thang in khe a pain ka U Awi Sian Cing (1963 kum Class IV ka sim laia Bungmual a ka omna te, ka nu pute) inn ah ka hawh uh a, a inn uh a sawng/khan sagihna siksan/step te to thei ta buang in 30mns khawng om in, niangtui dawn in thungetna ken ka nei a, Lam Thang in kikhopna ding khat 8pm a nei ahih man in taxi in ka ciah uh hi. Tua bang in ka tunni uh zang in, ka giakna room no.512 ah tawldam ding in ka lum hi. Ka lawmpa pen room no.509 ah a lum hi.

Jan.18, 2014 (Saturday): Tuni pen Kawlgam ka zinna hang uh amau paua Lai Siangtho nei nai lote tawh kimuh ni ding a ka seh uh ahi a, tua mah bang in Dai namete leh Koka namte tawh kimuhna hun in ka zang uh hi. Nitak an nek khit ciang in ka tupa Rev. Khoi Lam Thangte inn (Bible Society of Myanmar building) ah hawh in 7:30pm pan 12:30am dong ka om hi. Innkuan kingai, kithutuak leh Pasian a muang leh a thu amang innkuan khat ahih lam uh ka mit ka muh man in ka kha amuang mahmah hi. A zi a tate tawh hun nuamtak ka zang uh a, manpha kasa mahmah hi.

Jan.19, 2014 (Sun): Tuni zing 9:00am in ka pa Suan Za Pau leh nu Sangpui (a zi) in motor uh nuam leh hoih mahmah khat tawh ka hotel pan hong pua khia uh a, amau munpi Yuzana Garden City lamah hong taipih vangvang uh hi. Ka nu Sangpuiin motor siamtak in hawl ziahziah a kei leh ka pa Pau pen lungmuangtak in ka tu hiit-hiat uh hi.

Amunpi uh ka tun uh ciang kikhopna kipan pah a, ken eipau (Tedim pau) in Mat. 14:13-21 sung thu ka gen a, ka nu Sangpui in Kawlpau in let ziahziah hi. Nuam hiven! Kikhawm pen eimi leh namdang kikim ding uh hi. Akikhawm khempeuh 100 khawng ka pha uh hi.

Ka Pa Rev. Dr. Suan Za Pau pen Pu Kai Suan Suante ( Luangel khua leh a kim a eimite laka Christian masapen) tupa a hi hi. Kawlgam kumpi nuaiah kumpi na a sep khit ciang Pasian sapna za in a nasepna tawp a, Lai Siangtho sin in AG pawlpi ah pastor na sem hi. A omna peuh ah saptuam pawlpi pan zel a, Lai Siangtho sin a zawh ciang Yangon ah Word of Hope AG Saptuam phut khia hi. Tu in Lai Siangtho sang leh Tagah kepna Ynagon khawpi ah nei a, ama pawlpi pan in pastorate saptuam dang phut ding Christian om lohna ah sawl khia zel hi. Yangon ka tun ma deuh in Kawlgam pumpi AG kittelpina na nei uh a, Pasian in General Secretary ding in na tel uh hi. Azi ka nu Sangpui pen Lalsanglian Sukte hi a, Lai Siangtho sin a man khin lasak siam khat a hi hi. Amau innkuan pen Yangon a ka innpite a hi uh hi.

Kikhopna ka man uh ciang in ka U Khantawngte pata in Sing K. Thawn leh a zi Vungboihte nasepna hong etpih uh a, thungetna ka neih uh hi. Tua zawh ciang in ka pa Suan Za Paute tagah kepna ah ong hawh pih leu leu uh a, tua sanah zong thungetna ka nei uh hi. Tua zawh ciang ka U Khantawngte innah tawl dam ding in ka ciah uh hi.

Ka tawldam khit uh ciang in U Khantawngte, ka Pa Suan Za Paute, ka Gang Cin Khan Dalte leh Thawnbawihte tawh Restaurant nuam mahmah khatah nitak an ka ne uh hi. Nitak an gilvah tak a ka nek khit ciang un Word of Hope a original pen ci leng WOH a kipatna ah ei pau a kikhopna mun ah nitak 7pm in kikhop na ka nei uh a, tua sanah zong mel theihte tampi ka mu a, ka pa pu note khat Rev. Suan Go Khaite nupa tawh ka kimu uh hi. Hih kikhopn ah zong deihsakna tawh thugenna hun khah ka tang leuleu a Gen.12:1-4 sung thu ka gen hi.

January 20, 2014 (Mon): Zing lam 8:00am in kagiakna Hotel Panorama pan ka tupa pa Vial Khan Do leh ka tupa mah ahi Pum Sian Lian in amau car thak liklek tawh hong pua khia uh a, Mandalay pai ding Buste khawlna lamah ong kha hi. Ka tuna hotel pan naikhat val ka tai uh hi. Ka tupa pa Vial Khan Do tawh Bus nuam mahmah khat ah tuang in Yangon pan in Mandalay zuan zing lam 9:30am khawng in Yangon ka nusia uh hi. Ka Bus tuanna uh pen standard mahmah ci leng – a tutna nuam in, ka tutna ding uh ka tut khit uh ciang in tui thawl khat leh a vot dawn ding bung khat hong pia pah uh hi.

AC a hih man in vot a sate a ding in tutna khempeuh ah blanket khat ciat koih ciat uh hi. Lampi phei dih-diah leh mam hin-hen ahih man in bus tuan tawldam mahmah hi. Ka putu in ka ihmu mu uh hi. Sun annkena ding mun ka tun ciang un bus sung pan kum khiat ciang kong khak a bus conductorpa’n ha-nawtna leh a hanawtna za(paste) tun sa in hong pia a, fel ka sa mahmah hi. India gam ah tua bang bus ah ka tuan lam thei nai kei hi.

Nitak 6pm khawng in Mandalay ka tung uh a, ka tupa pa Rev. Dr. Thang Suan Piangte innah tawm cik lut pak in, tua pan in ka sanggam pa Cin Khan Paute innkuan un ong pi khia uh a, Restaurant lian mahmah khat ah nitak lim mahmah ong nek pih uh hi. Annek khit ciang in Cin Khan Paute inn ah hawh in 9:30pm in ka gaikna ding uh Dynasty Hotel eimite-a khat ah hong kha uh a, ka putu un Val Khan Do tawh ka giak uh hi. Ka giak man ka tupa Rev. Dr. Thang Suan Piang in ong piaksak ahih man in ka lungdam mahmah hi.

January 21, 2014(Tues): Tuni zingsang 7:30am khawng in Piang mah in hotel pan ong pikhia a, a inn uah ong tonpih hi. Tua ni zingsang amau inn kuan tawh, ka U Dam Za Nang zi tawh a inn kiang uah restaurant khatah Piangte nupa in breakfast ong taih uh a, tua zawh ciang ciah kiik in ka U Dam Za Nang zite kiangah tawl khat ka khawl hi. Tua zawh ciang in Piangte inn ah tawl khat mah khawl leuleu in tua pan in taxi khat la in ka U Suan Khaw Zam, ka Ni Don Khaw Man tapate inn lam ka zuan uh a, amau innah Aksa hul huan leh Bawngsa kan sun an ka ne uh hi. Ka U Zamte inn pan Mandalay van leng tual lam zuan in taxi tawh ka tai leuleuh uh a, Kalamyo lam zuan ding in ka tupa pa Vial Khan Do tawh ka leng uh hi.

Nitak lam 4pm khawng in Kalamyo vanleng tual ka tung uh a, Lun Deih Cing, Vial Khan Do zi leh mel r theih pawl khatten Wesley Hospitalte mawtaw tawh ong dawn uh a, Vial Khan Dote inn Tahan lam zuan in ka tai phei ving veng uh hi. Kalamyo Airport ah nidang a a kithei ngei lua zong hikho lo na pi’n Rev. Go Za Nang, Agape Ministry Church, founder pastor pa’n ong nohsiat in maitai tak leh kamsiam tak in ong hopih a, “ahih theih leh kimu leng ut ing” ong ci a, “awle” ci in ka kikhen uh hi. Vial Khan Dote inn ah nitak anne in, tawl khat ka om khit ciang in ka giakna dding Shin Hong Hotel ah lum ding in ka pai phei hi.

Hotel pen nuam gawp cih ding hi. Wi-fi hat mahmah ahih man in mun dang sang a nop zawkna khat hi. Hotel a nitak dutyte khat Hangpi kici Bangalore a kum 9 khawng tak Lai Siangtho sin a a om khin, a ka tute khat na om a hih man in nuam tuam mahmah hi. Zan khat giak man KS 25,000 hi a, zan nih a ding Ks 50,000 bek ka pia hi.

January 22, 2014(Wed): Tuni in Kalamyo ah ka tam a, zing 8:30am pan 1130am dong Rev. Job Thawngno, Tahan Baptist Church Pastor pa inn ah hawh in thugen ding kituh zawzen in hun manpha ka zat khit uh ciang in a innteknu in manlah pipi a a na huan Aksa hul limtak gilvah tak in ka ne uh a, tua zawh ciang Vial Khan Dote inn lam ah ka ciah phei uh hi. Ka ciah kawm un Tahan Tedim Baptist Biak Inn a kilam a kizo nai lo a kongah ding in ka khutte gel Biak inn lamah lik to in Pasian kiang ah thupha pia in ka ciah suak uh hi.

Vial Khan Dote inn ah Niang awm in mel theih tanau hilh theih theih hilh in ka om khawm uh hi. Ka U Go Khaw Nangte nupa, Ka tunu Dai Ngaih Cingte nupa, Ka tunu Uap Ngaih Cingte nupa, ka nu nue Niang Khan Cing, ka nu neu mah Zen Sian Ngaite nupa, ka nu pu Dote nupa, ka nu Nuam Ngaih Cing leh mel theih dang pawl khat tawh sun hun ka zang uh a, nuam kasa mahmah uh hi. Vial Khan Dote’n mel theih ong hawhte a ding aksa hul huan uh a, an nek khit ciang in ong ciah san ciat uh hi.

Nitak annek zawh ciang in ka tupa pa Vial Khan Do mah tawh a motor bike in 1963 kum a Class IV ka sin lai a Bungmual a ka omnate Vial Do Khupte inn ah ka va hawh uh hi. Tua zawh ciang in Agape private hospital a ki-at a om pa Kammang zi Nu Manpi ka va veh uh a, thungetna ka neih khit ciang in ka ciah san uh hi.

Tua zawh ciang in ka giakna hotel lamah Dopu in ong kha leuleu hi.

January 23, 2014(Th):
Zing nai 7:30am in ka giakna Shin Hong Hotel pan in Rev. Go Nang in a car tawh hong pi a, ka U Neng Za Kam (Rev. Khoi Lam Thang pa) kiangah hong koih a, tua sanah ka pu-tu un hun tomcik ka zat khit uh ciang in Rev. Go Nang mah ong pii kik in amau inn ah hong tai pih hi. A inn uh ka tun phet un zing annnek ding limci mahmah mansa in na koih uh a, tua pen a seppih pastorate leh makai dangte tawh gilvah tak in ka ne khawm uh hi. An ka nek khit phet un a Biak Inn uh ah pai in a staffte leh missionary training a neih te tawh devotion ka zang uh a, thugenna hun kei hong pia hi. Hun tomcik manpha tak leh nuam tak a ka zat khit ciang un Rev. Go Nang mah in a car mah tawh ong pua in ZCLS zumah ka lut uh hi.

ZCLS ah ka om laitak in Rev. Thawng Do Thang Galile Pawlpi’ Pastor pa tawh ka kimu uh hi. Zomi nam puak aktual khat ong tawi phei a, “Sia Khup, hih ka Zomi puantual Biju (Almirah) sung pan ka khai bangbang a kong tawi hi in na silh dih ou”ci in ong pia a, ken zong lungdamna lianpi tawh manlang tak in ka sang pah hi. Sia Thawng Do Thang pe’n nidang a Bualkot a Bekan lei a hong bawl ngei ahih man in ka khua luipa suak a, ka kimuh uh pen ong lunglen huai dek tak zawzen hi.

Tua pan a pam ah Galile Biak Inn ah Rev. David Kham te’n La tawh nasepna a neihna uah ka pai phei uh a, tua mun ah niangtui limtak ka dawn khawm uh hi. Tua khit phet in a khang a Vum Nang inn ah lutsuk in thungetna ka neihkhit uh ciang ka tuna ka tupa pa Vial Khan Do inn ah Rev. Go Nang mah in hong kha phei hi. Sia pa tung ah ka lungdamna alian mahmah hi.

Ka tunna innpan in Pa Kam Mang (Shillong a hong om, Christmas leh Kumthak zang a a innkuan ua a ciah) in Bike tawh ong pua khia a, a inn uh ka va en uh a, thungetna ka neih khit uh ciang in ong pua khia leuleu in Tahan a Hotel hoih mahmah khat ah sun an ong nen pih khit ciang ka tuna inn ah hong kha hi. Ka tuna Inn uah U Gin Lian nidang a 1963-64 khawng a ka om khoppih in ka tuna inn ah na ngak a, tom cik sung ka kithuah khit uh ciang vanleng tual lam ka manawh hunt a ahih man in ong ciah san a, ko zong VAnleng tual lam manawh in Wesely te zato in mawtaw tawh ka tai phei uh hi.

Lampi ah Rev. Dr. Thang suan Piang sungpa Pa Khen Lian Piang?? Te inn ah bang in, a vot dawn na leh thungetna ka neih khit uh ciang in Kawlpi vanleng tual lam ka manawh uh hi. Tung baih pian ka hih man un vanleng tual pan naicik a om Thangtawng zite inn ah pai in, niang san dawn in thungetna ka neih khi ciang un vanleng tualah pai in ka lutsuak a, Kawlpi-Yangon via Mandalay ah leng to in 7pm in Ynagon ka tung uh a, U Khantawng in vanleng tualah na dawn in, aman taxi khat ong laksak in ka tuna Hotel Panorama ah hong kha hi. U Khantawng tung ah ka lungdamna lian mahmah hi.

January 24, 2014(Fri): Ka Pu Rev. Suan Go Khai in Vok tuk 5 leh zung nih khat ong gawh ning ci a hih man in tua mun a hawh ding in ka kisa hi. Kei a ding ka damsunga ka khatvei tuahna a hih man in ka lungdam mahmah hi. Ka Pu Suan Go Khai pe’n ka pianna pute tupa hi a, hizahta a ong itna leh deihsakna pen lamdang kasa hi. Tuni kei a ding in ni lamdang ni manpha khat a hi hi. U Khantawngmah in a ma car a thak liklek tawh amah mah in hawl in ka omna Hotel Panorama pan zing 9:30am in hong pi leuleu a, ka putu un Yangon khua nawl kiu khat a om ka pu Rev. Suan Go Khai te inn a na sepna mun ah nai khat val ka tai uh ciang ka tung uh hi.

Hih mun ah Ka pa Rev. Dr. Suan Za Paute nupa, ka ni Cing (Suan Za Pau) leh a pasal ka gang Cin Khan Dal, Pu Awn Khan Suan (OK Suan) tapate nupa Rev. Dr. Gin Khan Tuang @Tuangpi & a zi Dim Khan Nuam, Pa Peter Mangpu (hong nusia khin Rev. Dr. Chin Do Kham naupa), meltheih dang pawl khat leh amau kep naupang te tawh hun nuamtak zang in tua zawh ciang in Voksa leh Buhsih leh Vaimim tawh gil vah tak in ka ne uh hi. Pasian in vangliatna ngah ta hen.

Annek khit ciang in ka Pu Khai tawh a inn leh a gam a zawh nailoh a innlam tungah kah to in ka te khit uh ciang in Pu Tuangpite nupa tawh amau mawtaw in a nasepna mun lam uah ong pai pih uh a, a nasepna mun uh mu in thungetna ka neih khit ciang un Rev. Khoi Lam Thangte inn ah hong kha uh hi.

Nitak 5pm pan 8pm dong Bible Society of Myanmarte meeting hall ah Keizang khawsuak meltheih teng ka tupa pa Lam Thang in nasam khawm a, amu tawh kithuah khawmna hun nuamtak ka zang uh hi. Ka hun zat kawm un Vaimim cim a lim mahmah leh samphok-manta atwh meh in ka hun nuamtak in ka zang uh i. Hihbang ong vaihawmsak ka tupa pa Lam Thang tungah ka lungdamna lian hi. Tua banga hun kazat khit uh ciang in ka giakna Hotel Panorama ah Lam Thang in hong kha hi.

January 25, 2014(Sat): Ka tupa Rev. Khoi Lam Thang thusiamna leh vaihawmna tawh Tedim Baptist Church, Yangon pawlpite tawh Mission Seminar nei ding in ka kisa uh hi. Zing 8:45am in ka hotel pan Rev. Khoi Lam Thang in hong pi khia in, Tedim Baptist Church, Yangon ah hong kha hi. TBCY ka tun ciang pawlpi makaite leh pastorte’n lungdamna tawh hong muak in Mission Seminar 10:00 pan kipan in nitak 4:00pm in ka zo uh hi. Seminarah mi 50 hong kihel uh hi. Ka kilamet hetloh hihbang hunpha TBCY tawh ka neih theih man in Pasian min ka phat hi.

Ka hunzat khit phet un ka behpa Rev. Lian Khaw Thang (Luangel pem S. Korea a Ph.D. candidate khat) a zi Hau Khan Cing (Korea mah a Ph.D. candidate) te inn kuan in hong pikhia uh a, Einsen a inn uah ong paipih uh hi. A inn uah a vot dawn in thungetna ka neih khit uh ciang nitak an ne ding in khawpi sungah ong taipih leuleu uh a, amau innkuan banah a sung nu U Ning Zen Niang leh a cousin Rev. Thawng Go tawh, “Golden Duck” restaurant kici a lian mahmah khatah nitaka an limtak ka ne uh a, tua zawh ciang in Rev. Thawng Go leh Rev. Lian Khaw Thang in ka giahna ah tai tawh hong kha uh hi. Lian Khaw Thangte innkuan tungah ka lungdamna a lian mahmah hi.

Tu tung lamdang kasak leh Pasian tung a ka lungdamna mahmah khat a hih leh mel theih tampi ka muh banah nidang a vaimim cim nangawn khamzo lo mel theihte -mKa Pa Suan Zapau, U Khantawng, Sing Thawn, Pu Suan Go Khai, Pu Tuangpi lehLian Khaw Thangte’n Yangon khawpi sung a mun leh mual amau min a nei a, innleh lo na nei ciat uh ahih man in Pasian hoihna leh hauhna lamdang ka sa a, Pasian min ka phat hi.

January 26, 2014 (Sun): Tuni Nipi in TBCY a thugen ding in ka kisa hi. Hotel pan in Lam Thang in taxi in hong pi a, Jonathan tawh TBCY Biak inn 9:00am ma in ka tung uh hi. Khangnote’n Praise & Worship pan pah uh a, a sawt lo in Baik Inn sung ah ka lut uh hi. Vai neuhneuh tam ahih man in 11:30am in thugen ka kipan a 12:15 in ka zo hi. Ka thugen sung sung 45min hi. Romans 10:14-15 na pansan in Pasian muh ding a a kilawm nuntakna in Khamangthangte matna ding ding a i khut, i khe, i muk-i lei i zat kisam hi cih thu ka gen hi.

Kikhop tawp ciang in Lam Thang tawh sumbuk ah ah naute zin pak ding zong in ka pai uh a, Mawite khedap ding leh Mungte T-shirt lei samsam in Hotel lam ah ka ciah uh hi. Nitak lam 2:30pm pan 4pm dong Hotel Panorama Lobby ah Tao/Resang namte mi nih Rev. Daniel Thawng leh Vantling tawh Lam Thang leh Jonathan tawh holimna nei in Tao/Resang namte pau a Lai Siangtho a kisap zia leh project lak theih ding ahi diam cih khawng ka ki kum uh hi. Khatvei kimuhna ahih man in thukhentatna kibawl thei lo a hun khat ciang sut zop ding in ka kikhen phot uh hi.

Tua zawh phet in Jonathan tawh Lam Thang tawh kizuiin Lam Thangte inn ah lut pak in, a lawmnu Siang Nem tawh ka li un Pa Suan Za Paute Inn lamah ka Pu Suan Go Khai ong vok gawh a phei meibang hong puaksak ne ding in ka pai uh hi.

Ka gang Cin Khan Dal te nupa leh Nu Sangpui in limtak a ana huan uh Pa Suan Za Pau te innkuan, ka Gang Dal te innkuan, U Khantawng leh Thawnte nupa tawh gilvah tak in ka ne uh hi. Annek khit ciang Lam Thang makaihna tawh lasak khawmna leh thutom genna khawng nei in khitui naptui tawh lungdam kipak in ka hun uh zang in thunget khawmna nei in kikhe lah mahmah in zan ani 10:00pm ong sat ta a hih man ka inn lam ciat uh ka zuan uh hi.

January 27,2014 (Mon): Kawlgam ah hun nuam leh manpha hoih tak ka zat khit uh ciang in tuni in India lam a kik ding in 10:45am in ka giakna uh Hotel Panorama pan in U Khantawngte pata Lianpu tawh mah in amau Car thak liklek in hong pikhia in Yangon International Airport lam ka zuan uh hi. Airport ah Niangtui ka dawn uh a, tua zawh ciang a sko a sung ah lut in, U Khantawngte pata in hong paisa ta uh hi. Nitak 2:05pm in Air India in Yangon pan ka leng khia uh a, Gaya ah tawl khat khawl in tua pan nitak 5:00pm khawng in Kolkata Airport ka tung uh hi. Airport pan in Meghalaya House, Ballygunj ah VVIP room lupna lian khatah puan tuam silh in Jonathan tawh ka giak uh hi.

Comments & impressions:
Tu tung ka Kawlgam zin pen tua bang zah a a nuam ding, a man lah ding leh a lawh cing ding in ka kingaihsun kei hi. Meltheih tanau leh ka tu ka ta ka pi ka pute ong deihsakna leh thusiamna te uh lamdang in manpha ka sa hi.

Nasepna lam tawh kisaiin zong gahsuah mahmah leh lawhcing mahmah ka kisa hi. Jonathan in Mark bu exegetical check zo thei hi. Tua banah maban kalsuan ding dan tampi hong navak sak hi. Nasep ding a tamzia zong hong musak hi.

Zomite bel Zomi vai ah pumkhat zawh lohna om hi in mu ing.

Tutung Kawlgam ka zinna pan a ka muh khiat leh Kawlgam Zomite hoihna pawl khatte:

1. Kawlgam a om Zomite’n gam dang a om Zomite hong itna uh (ngaihnatna uh) thupi sa ing.

2. Pasian thu a za nai lo Christian ahilote laka Pasian nasem ei Zomite bangzah hiam ka muh man in ka lung a dam mahmah hi.

3. Piak-khiatna lamah hausa mahmah uh ahih man in thupi sa ing. Lamdang bang kasa phial hi. Adiak in Piakna leh Zindona ah India Zomite’n Kawlgam Zomite kong phadek kei uh hi.

4. Yangon International Airport a semte maitai thei in nuam mahmah uh a, bangmah haksatna ong bawllo bek hilo in nui kawm in ong muak in nuikawm mah in hong kha uh hi.

5. India gam tawh teh in a tangpi a gen in siangtho zaw in ka mu hi. Rev. S. Neng Za Khup