Kawlgam, Magway ah Karaoke saikhat meikang in mi 15 si

Kawlgam, Magway ah Karaoke saikhat meikang in mi 15 si

Myanmar, Magway Region sung aom KTV khat meikang in mi 15 si cih Irrawaddy pan kiza hi. Magway khuasung aom “Shwe myat min tha mee” kici Karaoke saikhat ah zanni nitaklam 10pm hunpawl in meikang akipan hi a, numei mi 4 leh pasal mi 11, akigawm in mi 15 si cihi.

Magway Fire Station pan thunei te genkhiatna ah KTV inndawl tungah aom Electric Power panin salua in meikang akipan hiding ci uhhi. Karaoke saknading in akibawl inndei tepen abit mahmahding in aki umcip hi a, mei akat ciangin meikhu asungah lutin kuamah pusuak theilo in mei akangtum hiding kici hi.

Fire Department panin U Aung Win Sein in agenna ah KTV inndei sungah agamlum te apualam panin aki zaloding in akikoih Form tepen sahmahmah hi. Letmat 6 bang sah ahih manin, mei akat ciangin tua te ii akhu pen sing akatciang akhu tawh kibanglo in thuak haksadiak cihi.

Tua meikhu sungah gu namkhat kihel ahih manin, dikkhak nakleh thakhatthu in khuaphawklo in kituklian cihi.

Meikat ciangin hih KTV aneite pen kibucip in, taimangphot uhhi. KTV saigei ah aom te genna ah hih KTV pen akipat sawtnailo a, khakhat khawngbek hipan cihi. Zanni in numei athak pawlkhat tunbeh in, sai honpawi abawl hiding in ki ummawh cihi.

Meikat kipatlam in inntung ah phelkhai tawh tuibuak ngeingai uh a, ahi zongin meikuang liansemsem ahih manin anunung ciangin zonawnlo uhhi. Inntungdawl panin Waiter khatleh Waitress khat tuaksuk in, tualo inntung ah aomteng mei in akanglum cihi.

Thuthei te genna ah hih KTV, Karaoke akibawlna innpen innmawkmawk khat inndawl deitawm in akibawl hi a, asung kuacik in, lampaina tezong neumahmah cihi. Tua ahih manin mei akat ciangin painading, taikhiat nading cihbang akician in omlo ahih manin, mi tampi awkcip in asihlawh uh ahihi.

More: Myanmar China gamgi dungah buaina hangin mi 160 in sihlawhkhin

Hihbangin sumzon nadingin KTV abawlnuam ahihleh huang golpi sungah Commercial Building golpi lamding hi a, hihbang in teenna innmawkmawk khat Karaoke sai in bawlziauding hilo hi ci’n meiphelh ulian khatin genkhia hi. ZD Sawltak #zomidaily