Kawlgam Leiibaa kuan loh ding?

Kawlgam Leiibaa kuan loh ding?

Tulaitak Kawlgam mikhat ciang gamdang leiibaa US$400 val bang kinei aa, gammi GDP ii 31.6% in ki ciamteh hi. 2005 kum in kiciamteh 110% tawh etkaakna in, gamsung sumlut, sumzat leh leeiba phatuam hong suak hi. World Bank leh IMF (International Monetary Fund) te’n zong Kawlgam hoihlam manawh cita sam uh hi.

Kawlgam gamdang leiiba pen US$15billion bang hi aa, a beisa kum 3 lai in, Paris Club kici gamdang sumleitawipia gampawlkhat leh, a phadeuh in Japan (US$3.58billion) leh Norway (US$534billion) te’n a maiisiangsak khit na ngawn in, US$9 billion bang om lai a hihi. Sengam in maaisak cih genloh khiapding tudong pulak nailo kici hi.

Leiiba a tamzaw pen 1962-1988 sung General Ne Win khutsungteng in a kila hi aa, 1988 galkap kumpi khitzawh gamdang te’n Kawlgam sumzuak/leina khaktan a hih man in, gamvengte lobuang a dang pan, kilaakbeh theinawnlo bilbel a hih man-in US$4billion val tangbek kilabeh bek a hihi.

Tua sum te koi ah kizang hiam cih leh, kumpi sumzat behlapna, zato leh pilnasanginn vai ah kizang pii’ pen ci-in kumpi thunei te’n gen hi. Tua ban ah, lokho nasemte leh khuaphialep meilam bawl te’n zong noptuam pih mahmah kici hi. A gahbel muhsa ciat a hihi.

Theihsa bang in, a sumlom in a kipia ziau hilo aa, nasepna(project) tungtawn in, kipia a hi hi.

201o kumpithak hong kah nung, a diakdiak in gamdang sumzuak/leina lam kikheelna pawlkhat om aa, gamdang pan sumbulkoih tampi leh huhna zong hong paikikta a hih man-in, nidang sang’ naakdan a nuamzaw dingtawh kibang hi.

2012 aa kipan’ a dang tampi lakpan Worldbank in US$80million pansan in, Khamtung(Zogam-Chin State) lam na-ngawn ah tuasum te kizang a hi ci uh hi. Tuhun ciang, Khuami taangpi/tate hoihsakna(Community Driven Development) tawh kikalsuanta ci a hih man, mailam saupi geelna tawh a kalsuan khua te’n sauvei kimang leh mikhempeuh huamkim ding geel-in kisem theita hi.

A kigen ngei Africa gam pawlkhat te’ bang in, “basket case” ki ci a tawntung in, mihuhsa bektawh nuntaaksawm loh ding kiginkholh kikhualkholh theih hi. Leiiba bel kuakua in zang aa, noptuam pih mahleh mipi vek in lohding a hi veve lai hi. Nantal’suan

A simbehnuam ta ding:

1. Promoting inclusion in Chin State with CDD at Worldbank.org
2. Myanmar debt total US$9billion at Myanmar times.com
3. Myanmar Debt to GDP at Tradingeconomics.com
4. Burma-Myanmar National Debt at Countryeconomy.com
5. Myanmar’s Debt at Eurodad.org