Kawlgam kitelpi ding gal-etna ~ T. Sawmlian

Kawlgam kitelpi ding gal-etna ~ T. Sawmlian

Na khatpeuh, nai cik panin en lehang a kician mahmah omin, ahi zongin neucik bek i muh theih hun om ahih manin zat theih melloh hun om thei a, gamlapi panin gal-et lehang a kicianzaw bang om hi. Khatveivei gal-et ciangin tampi a kimuh hangin kician zo lian lo thei ahih manin hoih khin lo thei hi. Ngaihsutna gen hun laitak ahih manin hong tung pah ding kum 2020 Kawlgam kitelpi ding gal-etna nei dih ni.

Gambup hi leh state/divisionte ah, kum 2015 kitelpi bangin party hat tuam lua a om lamethuai lua lo hi. Tua ahih manin tukum kitelpi tungtawn a kumpi kibawl ding pen party kigawm/semkhawm kumpi (coalition govt.) ahih ding lamethuai a, tua lo a single majority a om leh zong kum 2015 bang liang ahih ding lamethuai lua lo hi.

USDP in upadi tawh kizui-in 25% reserved a neihsa uh banah, mun pawlkhat ah lawhcinna hong ngah dingin tuat lehang, 35%-40% ciang bang haksa lua lo ding hi (adiakin gambup innpite ah). Mualtung mite thuzawh sawmin hanciam thak mahmah uh ahih manin lawhcinna ciang nei dingin lamethuai hi.

NLD in mipi lamet bangin sem zo lo tawh kibang a, minsiatna tuamtuam hang tawh kum 2015 banga a hat ding uh lamethuai lo hi. Makaipinu mahmah zong mualtung mite a it, a huaikhawm dinga lametna lianpi ama tungah kinga ahih laitakin, kapnote vanzat khat banga ngaihsutna tawh minsiatna lianpi hong nei mawk a, tuate hangin mite in hehpih ding maw, mite hehsak zaw ding, cih bel ngaihsuthuai hi. Ken bel, Kawlte lak hiin, mualtungmite lah hi leh, a hoih lam sangin a sia lamah affect a om ding lamenzaw mawk ing. Ahi zongin sia lawmlawm sam lo dingin ka tuat hi.

Democracy huih diik nuamzaw deuh ta tawh kibang ahih manin, USDP leh NLD ahi lo, Kawlte sung leh mualtungmite laka party 70 val pen nidang sangin hong thahatzaw mai dingin lamethuai hi. USDP lah kapnote mah, NLD lah lamet bang zo lo, regional party hong hatsak tek mai uh leh kilawm ka sa hi.

ZCD, Zomi misel a party in lawhcinna leh dinmun hoihzaw hong ngah ding maw ngah lo ding theihsiam haksa a, candidates tawh zong kisai kha ding hi. Party sungah i om a, om kei zongin, policy i thukimpih a, thukimpih kei zongin, minam minsel party, Kawlgambup a ‘Zomi’ cih hong pholak ahih manin va do bawl luat kilawm lo hi. Kum 2015 hun-a a champion pih uh lah lawhcing lo ding dan hi leh kilawm a, tua banah myo thu, lampi thu leh thu tuamtuam a behlap tam mawk hi; kum 2015 hun bang a thu lian, lawhcin pih ding a thak (leh a luite zong) hong luikhiat siam kei uh leh, mipite adingin muanngam haksa thei kha ding hi.

Kuangluina ding 9 lakah a ut 17 tak om lakah a ngah lote kalsuanzia in zong nakpi takin sai kha ding hi. Tua banah 2015 a tha a pia mahmah, mun pawlkhat a kuanglui lo lianga a huh NLD tawh kuangluina khempeuh-ah kidem ding hong suak ahih manin baih lo kha mai thei hi. Thudang khat-ah, Chin state pen Zomi state ding, (mipi tamzaw pom leh pomloh thutuam) Chin = Zomi ci a, Tedim leh Tonzang bek a kuanglui, Kalaymyo leh Tamu lam lah baan lo ding tawh kibang ven, a kigendan leh kuangluidan kilamdang zek tawh kibang.

Gambup Innpi nihte ah bel i gensa bangin simple majority a ngah zo om kei hen la, a zenzenin ZCD bang pan gualzawhna ngah om leh coalition kumpi ah hamphatna neucik om kha thei ding a, thupha suak thei zawsop hi. Tua dingin national leh regional party banah lawm bawl siam kisam kha ding hi.

Chin state sung, adiakin Zomi, kamphen kul lote Tedim/Tonzang Area ah gambup-huam (national) partyte lak panin USDP leh NLD mah hong thahat kha ding uh a (majority a cing ding cihna hi loin, vote tam mu ding), regional party lakah ZCD lo thahat lua ding lamethuai lo hi. Chin state buppi sungah NLD pen kum 2015 bang zo dingin lamethuai lo tawh kibang a, Tedim/Tonzang Township (ZCD Area) lo, mun dangah zong 2015 sangin regional party thahatzaw thei tak maw.

Tua ahih manin national level thutuamin koih zawzen lehang, Chin state sungah ZCD in a kuangluinate uah lawhcinna a ngah uh leh, coalition govt. bawl dingin hamphatna/manphatna lianpi nei thei, deciding factor a pangkha thei uh hi. Tua dingin midang tawh bang ciang a kalsuan sawm, cih bel thupi kha ding hi.

Kum 2015 in NLD in constituency pawlkhat ah kuang lui loin ZCD huh hi. Union leh state ah zong a kizom mahmah hong suak uh hi. Tua ahih manin, Chin state leh ZCD Area ah, development a om kei leh, ZCD guak mawhsak theihloh tawh kibang a, mawhsak ding i hih leh lawm ginalo tawh kithuah, cih kul kha ding hi. Tukum kitel ciangin bel dem pi-in kidem ta ding uh ahih manin mai lamah khen theih dingin kizopna hong nei lo thei uh a, lawm hoih, a kideihsak mahmah bangin zong bel kizom kik thei uh hi.

Candidate min pulaksa leh pulak nai lianloh bangzah hiam min kimu a, zong muanhuai thei uh hi. Tedim leh Tonzang Area pana cing khempeuh leh, Kalaymyo leh Tamu lam pan pawlkhat bel bang party, bang party ahi zongin Zomi vive ahih manun kuakua cing leh, gam leh minam ading mahin hong hanciam mahmah ding uh kisam hi. Dinmun thupi mah ngah lehang vai thupi kigeel, kisem thei ahih manin tua lam ngah theihna dingin party tuamtuam a Zomite in hanciamna hoih tak hong neih ding uh kisam hi.

Kuakua a cing zongin Zomite ading sep ding masuan tampi om hi, cih MP thakte in mangngilh loin, hong hanciam mahmah uh leh deih hang. Zomi thu pen Zomi minsel party leh kipawlnate vaipuak bek hi loin, tua sunga kihel lote in zong a kibangin vaipuak nei hi hang, cih phawk thak ni.

Hun om zek lai, zan khat zan nih thu a thu kilumletin, ngaihsutna leh muhdan tampi kilamdang thei lai, tu le tu a mimal muhdan leh ngaihsutna ahi hi. Gamlapi pan… T. Sawm Lian