Kawlgam kiteelna leh Zomi MP thakte muakna

Kawlgam kiteelna leh Zomi MP thakte muakna

Pasian in abeisa kum 60 valsung a, ilung gulhgulh kiteelna kician hong ngah sak manin ilungdam mahmah a, mikhempeuh in igam ilei I itna hongno suak sak mahmah hi. Gamsung gampua panin kilung himawh ciat hi.

THU OMZIA ENSIAM NI:
Ei Zomi te adingin hibang kalsuanna thak tuakngeilo ihih manin tutunga pen ahoih thei penpen ding leh alem thei pen pen dingin kiteelna sungah ikihel ciat a, lungkimna zong omdinga, lungkm zawhlohna zong omding hi. Ahizongin hihdan kiteelna ei hun adingin alimci khat hongsuak ahih manin mailam adingin ngaihsut hoih lakna leh akisam thu te muhkhiatna in izang ding a, kuamah kitel khialhna cihbang omsak lo in, kitel siamding ihan ciam mahmah ding hi. Koi party koi party pan ahi phial zongin Zomi ahih nakleh “ Lungdam mahmah hang” icih kim ciat ding thupi mahmah ding hi. Pasian dan zong ahihi.

I LUNGSIM LEH I NUNTAKNA CIDAM SAK NI:
Tu in nasep maban akalsuan pan ding ihih manin ingaihsutna te cidam sak mahmah ni, cina te in nalian sem zolo a, cidam te bek in nalian sem zo hi. Mimal khat leh khat kikal ; innkuan khat leh khat kikal ; pawlpi khat leh khat kikal ; khua khat leh khat kikal , beh khat leh khat kikal , awkaih khat leh khat kikal ah kuamah in meima neihsawm lo in acidam thei thei dingin hanciam ni thungen ni.

SISAN IN THU HONGGEN DING HI:
Koi mun koi party ah I omzongin isisan in thu honggen dinga, denteh isep khop theih ding thu hoih hong om mahmah ding hi. Nidang sangin zong Zomi te pen hamsatna ituah tohtoh ciangin isisan mah in thu honggen ahih manin kipum khatna leh sepkhop zawhna hong om toto ta hi. Sisan in gamgi neilo a, sisan in khuahun neilo a, sisan in deidan neilo ahih manin ataktak thu hong om nak leh ivek in khut kilen in ma ipan khop hun hongtung mahmah ding hi.

MAKAI DING TE ZAHTAK LEH PANPIH SIAM NI:
Makai dinga iteel te pen amau leh amau in bangmah asem zoding hilo in, ei teng tawh asem khawm ding ahih manin limtakin zahtak leh pahtawi siam ni, I muan leh I it a iteel te ahih manin makai a aomsung uh zahtak bawl in, pahtawi bawl in, panpih siam ni, tua hileh hong thalawp ding uh a gahhoih tampi hognnei ding uh hi. Amaute lawhcinna ding pen eite tungah tampi om hi. Mosi akhut akham ciangin Aaron leh Hur ten adomsak bangin akhut te uh domsak siam ni. Thu ngetsak ni, akisap hunhun ah thapia siam ni. Amau te kiang pan thupha tampi pi lamen pahlo in, amaute tawh kipawl in igam leh ilei adingin nalian tampi pi asem zo dingin kalsuan pih zaw ni.

MP THAK TE PAHATWINA IPIA HI:
Zomi te sungah khuahun luan zia zui in tutungin anuai a MP tengin teelna hongngah ahih manin akuakua cilo in avekun pahtawi leh angtan pih mahmah hang.
1. Pu Cin Sian Thang. -Zogam
2. Pu Gin Kam Lian -Zogam
3. Pu Thang Deih Khup -Zogam
4. Pu Suan Do Cin -Zogam
5. Pu Cin Khan Pau -Zogam
6. Pu Pau Lun Min Thang. -Zogam
7. Pu Kham Khan Thang. -Zogam
8. Pi Ciang Ngaih Mang -Zogam
9. Pu Thawng Mang -Zogam
10.Pu Kam Za Mung. -Sagaing.

Hih Zomi sawm tengin amau hih theih bangbangin Zogam leh Zomi te maban ding honggeel ding uh ahih manin ilungdam pih mahmah hi. Topa in amau teng thupha hongpiak sak henla, Zogam leh Zomi te adingin Abraham bangin thupha naak dingin hongsiam sak tahen. Mipi te aitangin kumpi tokhom dongah vai hong hawm sak dingte ahi uh hi.

MAKAI THAKTE THAPIAKNA:
Pasian in Mosi ateel lai in asiam pen leh acing pen cihbang hilo in adeih a ateel ahihi, tuabang mah in tutung in atunga MP teng pen Pasian in deih in mipi tungtawn in ateel ahih man in ilungdam hi. Amaute adingin thungetsakna leh thapiakna anuai abangin inei nuam hi.

1 Abraham bangin anungta Pasian hong bul phuh den uh hen.
2. Mosi bangin Amipih Zomi te adingin hong kuankhia ngam uh hen.
3. Daniel bangin mite lak ah hongsiangtho nuntak uh hen.
4. Joseph bangin kumpi pa maipha hongngah sawm uh hen.
5. David bangin nahoih semdingin hong kithawi uh hen.
6. Nehemiah bangin nahoih sep hong kipan uh hen.
7. Esther bangin amipih te adingin palai kician hongsuak uhhen.
8. Joshua bangin hong hangsan uh hen.
9. Jacob bangin Pasian inn ( Bethel) hong zuan zoden uh hen.
10. Zeisu bangin lainatna leh hehpihna hongnei uh hen.

LUNGDAMKOHNA LEH THU KHUPNA:
Pasian in hibangin igam ilei makai ding mi hongpiak manin ilungdam mahmah hi. Ei mipi te in thungetna , thapiakna, panpihna leh lamlahna tawh kalsuan pih ciat ni. Pasian nasem te, sumbawlte, kumpi nasem te, minam nasem te akipan Zomi bup in thungetsak in mainawt pih ciat ni. Topa Israel te amakaih bangin Zomi te hong makaih tahen.

Lungdamna leh thupha piakna tawh,
Rev. Pau Khan Khai
Zosiam Gospel Ministry.
Nov 10,2015.