Kawlgam in Democracy gamhoih khat asuahtheih nading bang kisam?

Kawlgam in Democracy gamhoih khat asuahtheih nading bang kisam?

1. US Sanction Ngah Nading Hong Maikhak Thukham te
Kawlgam kumpi in agam ki-ukna democracy a hih theihloh nading zaitak in nasem in maikhak ahih man, Kawlgam sungah gamdang mi sumtang tawh nasepna, US gammite le US gammite tawh a kizom midang te in a neih theihloh nading khakna lai Executive Order 13047 (E.O. 13047) thukham khat President Bill Clinton in 1997 May 20 ni in bawl hi. Hih EO 13047 pen Foreign Operations, Export Financing and Related Programs Appropriations Act, section 570 (b) ahi zongin, 1997 (Public Law 104-208) ahi zongin leh International Emergency Economic Powers Act (50 U.S.C. 1701-1706) (IEEPA) cih thukham omsa te tawh kituak a kibawl thak thukham khat ahi hi.

Tua tawh kizom in 2003 kum July 28 ni in President Bush in Burmese Freedom and Democracy Act of 2003 (BFDA) cih thukham khat bawl leuleu a, tua thukham siksan in, Kawlgam ah inn le lo tawh kisai vangil van manpha khat zong tua hun laitak a Kawlgam galkap kumpi tawh kikhekna khakcip in, US pan Kawlgam ah puak ahih kei leh Kawlgam pan US ah a man ciangtan zah tawh kikhek cih te a kipan tua inn le lo vangil te kileina aki neih theihlo nading in E.O. 13310 cih Executive Order thukham khat suaksak kik uh hi.

Vangil, inn le lo te tungtawn a ameet teng khempeuh zong ngah thei nonlo in, Kawlgam tawh kizopna pan kikhak tan a, October 18, 2007 ni in US President Bush in Executive Order 13448 thukham bawl leuleu hi. E.O 13464 zong a tung a thu tawh kizui in hong piang thak hi. 2008 kum July 29 ni in Kawlgam kumpi in JADE kici Junta’s Anti-Democratic Efforts Act of 2008 (Public Law 110-286) cih khat bawl leuleu uh a, Kawlgam sung pan suang manpha ahi suangsan, suang eng, suang kaang, suang ngo le suang manpha nam tuamtuam te gam dangah a kizuak theih loh nading khakcip na thukham nei gige uh hi.

2. Kawlgam ading US Sanction Thukham Palsat Mite Bang Gimna Thuak Ding

Hih a tung a thukham te apalsat US gam mi a om leh US dollar awn khat (Million) sang atam zawlo kiliau sak ding a, mi mawkmawk khat in hih thukham a palsat leh kum 20 sang atam zawlo thongkhiat ding, ahih kei leh dollar awn khat le kum 20 thong a nih in dantat in bawlsiatna thuak ding uh ahi hi. Gammi mawkmawk khat in hih thukham te a palsat leh thukham khat a palsat hangin dan thuak ding a US dollar 25,0000 ahih kei leh a zah nih kiliausak ding hi. Hihzah a nasia thukham hangin US gammi limlim in Kawlgam mi le Kawlgam uk kumpi pen galkihtak sakihtak in, leh zunkih ekkih bangin hong gamta ta uh hi. Hong paupih ding zong kihanglo in a gei ah US kumpi thukan peuh a om kha diam ci in en gualgual uh hi. Lau ciat uh a, kidawm mahmah uh hi.

3. Kawlgam ading US te’ Sanction Thukham in Bangteng Kalh Hiam?

Tua banah Secretary of the Treasury kici democracy ukna deihlo te ading sanction a len te’ kikupna ah, Kawlgam ki ukna sungah kumpi zum nasem ulian dingin, SPDC (State Peace and Development Council of Burma) pan ahi zongin, USDA (Union Solidarity and Development Association of Burma) pan ahi zongin, human rights tawh kituaklo Kawlgam gamvai saina ah democracy ukna a maikhak sak nasem kumpi makai te’ sung pan a kiteel lai teng, kumpi a sep lai tengin hih a tunga US kumpi’ Executive Order te bang mah hun in kihong ngeilo ding a, thukham om bangin na kisem ding ahi hi.

4. Hih US Santion Thukham US Kumpi ading bek maw?

Hih sanction pen US te’ thukham i cih mawkmawk khak ding kidah mahmah hi. Democracy ki ukna a len pen leitung ah USA mah na hi pah hi. US President in Executive Order khat a bawl leh leitung bup in a mangsuk pah diam ahi hi. Hih US thukham a manglo Asia gam sungah North Korea cih te pawl Africa gam ah Nigeria le Niger gam cih te pawl pen UNO a kipan leitung gam tuamtuam kipawl in, haksatna dan aki pia pah ziahziah ahi hi. Kawlgam in gamvai sai na ah bang ciang tung ta a hiam cih en suk leuleu ni.

5. Kawlgam Democracy Gam Asuah Nading Kua Tengin MP, Party Makai le Kumpi Sem thei?

Tulaitak President Thein Sein in gam makai lo in, Kawlgam ukcip veve a, USDA te’ party ahi USDP makai pi asem ahi hi. Hih a tunga US te’ thukham enkik ni. SPDC le USDA pan kiteel khia kumpi ukna anei te hong khan laiteng hih thukham te bei ngeilo in khauh pai semsem ding hi. Pang Long Agreement in democracy pai zia tawh kituak maw cih en leuleu ni. Shan, Chin le Kachin teng kipawl tuam ding in a dang State te sang ahi zongin, Kawlgam kumpi sangin ahi zongin lianzaw, hoihzaw, hauzaw ding cih lungsim hong khan khiatna Pang Long Agreement ahi hi. Democracy zia le za tawh kituaklo hi. Gam khat sung ah Shan, Kachin le Chin in Federated State angah leh a dang pyi ne 4 teng zong a vekin federated state ahih kul hi. Alliance bawl in state nih le thum kipawl tuam in ankuang tuam uum cih bang kul se lo hi. Hih pen kithu tuahloh na le democracy i ngah theihloh nading amai khak thu bulpi khat ahi hi.

Kawlgam sungah democracy hong khankhiat nading deih na tawh Daw Aung San Suu Kyi in kum 20 sungbang kimat kihenna thuak in, tua banah democracy party ahi NLD zong phuan khia a, leitung bup in democracy makai a, aciapteh numei manpha, galhang le makai hoih khat in a kiciam teh sa ahi hi. Tua bang hi napi in, Kawlgam sungah political party aki phuat khiat ciang, democracy lungsim a nei party khat ading in NLD pan Dr.Aung San Suu Kyi thukimna tawh phalna lak ding pen a tavuan ahi hi. Party min khawng democracy party ci mawkmawk in USDP le USDA makai tulaitak kumpi asem Thein Sein i phalna khawng i thupit sak leh i party pen democracy ki ukna tawh kigam la tektek cihna hi pah a, US sanction le Executive Order thukham khauh mahmah in hong sukha in kizawn lawh tektek ding cihna ahi hi. NLD i phalna zong ngah veve a, USDP phalna sangin athu pitzawk lamtak zong phawk ciat ni.

6. Eimite’ Sungah Democracy Ngah Na Dingin, Bangci Pansan Lakkul Ding Hiam?

Ei mi sung mahmah ah zong makai i teel ciangin kisian suah kul hi. Mipil lo khat in hih sanction vai pen US bek tawh kisai in ei tawh kisailo hi ci kha thei ding a, tua kam mal in minam bup ading zawnna, nuntak hamsatna hong guan beh ding hi. I makai teel pa in bang lungsim nei a, democracy lungsim, picing lungsim taktak a nei mah hiam cih zong ettel kul hi. Kawlgam socialist le military khut nuai ah nasem in, PhD, le degree sang tuamtuam na neih leh, gam le nam kimakaih na sung pan no le no ki theisiam in ki nominate sakloh ding hoih hi. Bang zah ta in pil kisa hi tase mah lehang, US kumpi in muanna hong nei ngeilo ding hi.

Tua bang te ading sanction omlo cihna ahi hi. Abeisa hun ah galkap buu, galkap mang sem, Ne Win hun pan Than Shwe hun sung in galsiam a minthang, pahtawina ngah cih pian te pawl pen tuhun democracy lampi i sial hun laitak makai in kikoih theilo hi. Nomination committee sungah na kihel khak leh na meltheih tanau ahih phial zongin colonel, general cihpian tepawl le a mau tu le ta te mamah zong teel dingin koih khakloh ding kidop huai hi. Hih military hun sung mihau mahmah galkap kumpi tawh nasem a asenpi mahmah cih tepawl zong makai kitel na sungah helloh ding ahi hi. Tua bang mite’n i minam sungah makai hong sep laiteng in democracy lungsim hong khang ngeilo ding a, i ngakngak hauhna US sanction cih tepawl hong kipiak nading lampi a khakcip tawh i kibang ding hi.

7. Theih Beh Ding Thu Pawl Khat

Tua banah, minam tawm ihih manin, minam vai peuh tawh Aung San Suu Kyi kumpi a sem nailo khat va hua mawkmawk, Kawlmi hihna tawh va enneu mawkmawk cih te a kipan, aphuatkhiatsa democracy party nangawn gensiat theih na ding lampi zong kankan cih te pawl pen democracy lungsim a pua mi khat ading in neih huai hetlo a, zong lauh huai mahmah cihna hi pah hi. I theihsa mah bangin, US thukham pen hih democracy paizia le gamvai politics lam ah, leitungbup thukham zong ahih pah lam phawk kawm in i sep i bawlna, i gamtat i luhekna, i sangkahna, i sumbawlna, minam ading nasepna, party makai ihih na, i kampau na, i ngaihsutna le khantoh nading gelna, khat le khat i kideihsak na, kipumkhat ding i hanciamna, le biakna makai isepna te ah thukhual takin le kidawm kawmin i kalsuan ciat ding thuhoih thu manpha ahi hi. Professor Dr David Ngin Sian Pau