Kawlgam ah Rohingya te Citizenship piakding UN in hanthawn thapai

Kawlgam ah Rohingya te Citizenship piakding UN in hanthawn thapai

Kawlgam sung aom Rohingya Muslim te gammi hihna “Full Citizenship” piakding leh gamsung ah suaktatak a omtheih nading in Kawlgam kumpi in phalna apiak nading in U.N. General Assembly in hanthawn uhhi.

Kawlgam sungah Rohingya mi 1.3 Million bang omding in ki ummawh a, tuateng pen National Law thukhuntawh kizui in gammi hihna Citizenship ki pialo ahih manin genthei in cimawh mahmah uh cihpen UN te muhna ahihi. “Stateless and no rights” ci’n UN te’n Kawlgamsung aom Rohingya te hehpih mahmah uhhi.

Kawlgam kumpi te’n ahihleh hih Rohingya tepen “Bengalis” te hi uh a, Bangladesh gam panin honglutsim “illegal migrants” te ahi uhhi ci’n pulak uhhi.

Kawlgam pen 2011 kum nungsang ah Dictatorship panin Democracy hongkikhelpian ciangin Buddhist leh Rohingya Muslim te buaina zong hong khangto semsem hi. Buddhist leh Rohingya buaina hangin mi 280 bangin sihlawh hi ci’n AP News in ciaptehna nei uhhi.

Tuaban ah mi 140,000 bangin inn leh lo nusia in taikekmang uh a, tuate pen atamzawtham Rohingya mi vive in ki ciamteh hi. Rohingya tepen Rahine State sung aom gamsung kawmpulak tengah ki bucip uh a, hehpihhuai mahmah cihpen UN te muhna ahihi.

Ahi zongin Kawlgam kumpi thunei te’n hih Rohingya Muslim tepen gamsung ah deihhetlo leh Citizenship piakding anial thapai uh ahih manin, UN tetawh bangciang hongki nawttoding uhhiam genciantheih omnailo hi. ZD Sawltak