Kawlgam ah Burmese Monk khat vankham zatang 4.6 Million tawh kiman

Kawlgam ah Burmese Monk khat vankham zatang 4.6 Million tawh kiman

Myanmar, Rakhine State sung aom Buddhist Monk khatpa ii Monastery sungpan in vankham zatang “Methamphetamine Pills” akigawm in tang Million 4.6 tak kimankhia cih Monday (Feb 06) ni in Myanmar Police te’n genkhia uhhi. Tua Burmese Monk pa ii aminpen Arsara kicikhat ahihi.

Hih Burmese Monk papen Rakhine State sung, Maungdaw Town, Baho khuaneu khatah mawtaw tawh azinlaitak in palik te’n a mawtaw Checking abawl uhciangin vankham zatui tampitak mawtaw sungah mukhia masa uh cihi.

Mawtaw Checking abawl uhpen Sunday nitaklam hi a, mawtaw sungpan in vankham zatang akigawm in tang 400,000 ki mukhia masa hi ci’n Local Police Cheif Kyaw Mya Win in AFP te tungah genkhia hi.

Tuakhit ciangin palik te’n muangmawh semsem uh a, hihpa ii uk ahi Shwe Baho Monstery ah Checking abawl leuleu uhciang in vankham zatang akigawm in tang 4.2 Million mukhia leuleu uh cimawk hi.

Kawlgam pen leitung ah vankham zatui alimzat mahmah gamkhat in ki ciamtehlai hi. Hih akiman Methamphetamines Pill kici zatangte zong Asia gamsung ah khangno te’n limzat mahmah uh kici hi.

Nungkumsung bekbek inzong Kawlgam sungah palik te’n vankham zatang 98 Million bang kimankhia ci a, 2015 kumsung inzong 50 Million bang kimankhia cihi. Ki limzat mahmah hidinghiam, kumsim inzong akimankhia tamsemsem hi.

More: Kawlgam ah Buddha lim vai tawh thongkia New Zealand gammipa

Rakhine State sungahzong vankham kilimsep mahmah a, nungkum September khasung inzong Maungdaw ah hih Methamphetamine vankham zatang 6.2 Million tawh mi 2 kimankhia cih State Media in suahkha ngei uhhi. ZD Sawltak #zomidaily