India, Kashmir sung buaina hangin misi 16 phakhinta

India, Kashmir sung buaina hangin misi 16 phakhinta

India, Kashmir sungah kumpi galkap te leh thautawi migilo te kikap ahih manin, mi 16 takin sihlawh uh cih Sunday ni in Indian Authorities te’n genkhia uhhi. Himalayan Region sungah tukum thau kikapna te lakah ahuaisiapen leh misi atampen inzong ki ciamteh cih AFP pan kiza hi.

India kumpi galkap “Indian Soldier” asi pen mi 3 hi a, thautawi migilo “Militant” lampan inzong mi 11 takin sihlawh uhhi. Tuaban ah khuasungmi “Civilian” zong mi 2 in sihlawh ahih manin, hih Kashmir sung kikapna hangin asibekbek pen akigawm in mi 16 tak phatota hi.

Thau kikapna ahuaisia phadiak pen India leh Pakistan gamnih kikal aom Kashmir, Srinagar khuasung tengah hiphadiak in, buaina tamveipi piangkhin hi. Khuasungmi asi mi 2 tepen Police te kaplup kici a, khuasung ah Indian Rule lungkimlo in lungpho mipi te aki thehthangding in thautawh akap uh kici hi. Lungphona anei mipi te’n suangtum tawh Police te dengmasa uh ahih manin, Police te’nzong thautawh akapkik uh cihi.

Rebel Groups te’n lungphona neihding in tangkokhia ahih manin, Monday ni in Srinagar khuasung aom sanginn tezong khaksakding in thu kipia hi.

Militants asi lakah mi 7 tepen Dragad khuasung ah kumpi galkap tetawh akikapna panin asi uh ahihi. Tua thau kikapna Battle Zone sungteng ah helicopter zong niamtak in aleng kawikawi kimu cihi.

Adang Militant khatpa pen Dialgam khuasung ah kumpi thunei tetawh thau kikaptuak in, tuapanin asi kici hi.

Video: Kashmir gampan itna ~ Thangno (Phamsa)

India gamsung ah Kashmir State pen Muslim tampitak aomna “India’s only Muslim-majority state” akici hi a, buaina zong tammahmah denhi. Khuasungmi Cililians te’nzong Rebel Group te panpihzaw uh a, Pakistan tawh ki gawmkhopding ahih keileh Independence State in tuamdinding lunggulhna tawh Rebel Group te’n abeisa kumtampi akipan India kumpi pen alangdoden uh ahihi.

Pakistan gamzong Kashmir State agupna in India kumpi tawh 3 veibang kidolawh khinta uhhi. Hih buaina tungtang ahzong Pakistan te’n India kumpi pen mawhsak mahmah uh a, itna lungsim neilo in mipi te thautawh aphialkapgawp uhhi ci’n mawhsak uhhi. Tuaban ah asi tepen mawhneilo vive hi cihsan sawnsawn uhhi.

Abeisa kumsung in hih Kashmir kuamsung ah India kumpi alangdona hangin Militants mi 200 val in sihlawh uhhi. Tukumsung inzong Militants mi 49 in sihlawh khinta uhhi.

More: Mangthang nuam maw, mangthang nuam lo? ~ Rev. Khup Za Go

1947 kumin British Colonial Rule abei ciangin Kashmir pen phelnih kisuah in, alanglam Pakistan suak a, alanglam pen India gamsung ah aom ahihi. Sawltak #zomidaily