Kanu hangin kapa ka zahtak hi ~ Lian Tuang

Kanu hangin kapa ka zahtak hi ~ Lian Tuang

Ka pa pen U le nau, khua le tui vai khat peuhpeuh a om ciangin zu le sa mah bulphuh in thu vaihawm hamtang ngait mah thupi a sa khat ahi hi.

Ka tan 10 ciangciang ko innkuan in ka pa khasum le vuanthansan kici (Ration) antang pi 14 bek ngak in nungta ka hih manun nipi khat in buhsih nih vei thum vei khawng bek ka ne zo uh a, tua lo teng bel buhcim le vaimimcim bek mah ka ne uh hi.

Nu le pa kithawng

Ka pa pen ka tan 9/ 10 khawng ciangin nidang sangin zu ong lim nek semsem hi. Nitak khat ka nu anhuan kawm in ka pa’n zu neknek tengleh nuntak hamsatna hangin kam ong kinialnial uh hi. Ki kamtam semsem uh a, a sawtsawt ciangin ka pa hehlua in ka nu sam pan manin vua dingin ong kithawi hi. Ka nu hehlua khasialua in kap kawm in amah kia phunphun hi.

Pata kilai

Ka nu sam pan amat kawmin a thaneih zah in ka pa hang buabua lai hi. Akhuttum lik veva in tum dingin kithawi hi. Ka nu laulua in khuadak leplep hi. Ka nu khasiatna le kahna aw ging hangin ka khasiat suakin ka heh ong suak mahmah a, ka ci ling deldel hi. Ka nu cimawh in men neinai sa in“ ki pasal sak mahmah na hih leh zu nene ken la na sem ve” ci lailai hi.

Tan 10 sangnaupang tangvalno hi ta ka hih manin thatang tawh kilai ding pen ka ngap mahmah hi. Ka pa heh semsem in ka nu sam pan kai in a kaipai hi. Ka nu ong kapkhia ngaungau ahih manin kei zong om thei nawn loin ka tutna pan taiphei in ka pa ka bawh phei hi.

A awm pan man kawmin bang hang ka nu kapsak na hiam ka ci hi. Ka pa lah heh kei lah heh ka hih manun a kilai ding ka hi ta uhi. A awm pan manin ka kisawn uh leh ken ka thazawh peuhmah hi.

Na pa tung khutkhial ken

Ka nu a huh, a panpih, a honkhia danin a kingaihsun ka hi hi. Ahi zongin kap kawm sa in ka nu’n kei ong lencip hi. Ong khen hi. Ka pa kiangah nang zong na tate tawh na kilai sawm lawmlawm zumhuai sa lo na hiam ci lailai hi. Ka pa’n ong khiam in innsungah ong lutsan ziau bilbel hi.

Ka nu’n a kah kawm in “ Na pa pen gina in gina ta kei leh ama tung khutkhial kamkhial kha kei in. Amah zu kham sa kham in lampi ngei ah a lum phial zongin na pa ahih manin pa bangin na bawl ding pen na tavuan hi lel hi. Nute pate a simmawhte mi suaklo thei ahi” ong ci zawsop hi. Amah nuam ding ka sak na nuam hetlo hi.

Ka nu hangin ka pa zahtak

Tua a kipan ka pa pen bangbang ahi ta zongin ka it semsem thei a, ka zahtak semsem hi. Ka pa tung kipasal sak in gamtat vatvat ding zong ka ngaihsun ngam nawn vet kei hi. Tua ban ah khuasungah ka pa zukham a vak ka muh ciangin ka zum mahmah hangin ama tung ka heh ngam nawn kei hi.

Thumna taunate mawksuaklo

Pasian hehpihna hangin ka pa nuntakna kikhel in a zu nusia a, CMBC pawlpi ah upa makai kum 13 val sem in khua le tui, u le naute ading mi thupi khat ong suak lailai hi. A zi a tate adingin lungdamna khamuanna innkuan sung amakaihsiam, pa manpha khat in ong kikhel kik hi.

Hih ka pa kikhelna thute ka ngaihsut kikkik ciangin ka nu pilvanna, itna, thuakzawhna, lungduaina, cihtakna, thumna taunate Pasian in a thupha tawh hei sak hi ding hi ci in ka ngaihsun kha hi. Lian Tuang