Kamsia – Kampha cih kammal koi munah zangding? ~ Awn Za Pau

Kamsia – Kampha cih kammal koi munah zangding? ~ Awn Za Pau

Khat vei ka thallohpa/bangkuapipa tapa Mungno, Vum Suan Mungte nupa inh Tulsa khuapi tawh Arkansas gun in hong halna Jenks , OK lamah innthak khat 2009 kum in hong lei a, a inn thungetsakna tawh kizui in innteek papi ham pen khat ka hihna tawh thu genna ka nei hi.

Innteekte nupa pen Sya Cicin (Rev Thawng Khan Cin) pastor sepna Myanmar Zomi Baptist Church (MZBC) ah sumkempi khat ahihi. Sya Cicin in a pawlpi mite a sun a zan ci lo in akul hun ciangin a kul bangbangin vaan zo in hunbit in pawlpi mite kisapna buaina atuamtuamte a hunlap in panpih den hi. A innthak leina lungdampihna in amau innah MZBC pawlpi sia leh upate vaihawm siamna tawh in Christmas lawmh-an neekpih uh ahihi.

Mungno pen khat vei a nasepna pan kisuk khialhna khat ngah kha a, Zato na tung hi. Ko mau theihloh kal mahin Sya Cicin in manlang takin akisamteng na vaanin na panpih khin pah hi. Kei zong ka thugenna ah Syapa’ tung lungdamna ko nuam se lua, ka tapa Mungno pen MZBC ah Pastor Sya Cicin tawh akituahkhak theih zenzen pen ‘kampha’ ka sa mahmah hi, ka cih leh ka thugen a ngaite hong nui ngeiingaii mawk uhhi. Amau in ka kammal zat pen kilawm sa lo lua ahih man a, a nui ngeiingaii ahih lam zong ka thei gige hi. Kei zong kitheihmawh bawl in ka thugen ka zom veve hi.

Kampha cih kammal munah ‘Pasian thupha’ (blessing) hi, cih ding hong deihsak zaw hong awi zaw uh ahihi. Ken ka zatluat het khol loh hangin tu lai khangthakte’n a na zang khin luata uh ahihi. Tu lai khangthakte sungah a piangthak naiilo akicih ding kuamah ut lo a, a piangthak vive a kinei tek ih hih mah bangin, ih kammal zatthakte in zong nidang Pasian thu ih theih ma pekpek a ih zat kammalte nusia in kammal thak khat in mun hong luah ahihi. Tua kawmkal ah khatvei zonet hiam aw koi zaw hiam aw khatah, ka theih ngei lo khat in kampha/kamsia cih kammal Zopau ah om nawn lo hi cih dektak khat in lai hong suaksak ta leuleu hi.

Kei zong Mikangten zong luck, lucky, cih kammal zang lai buang hi ven, kamsia kampha cih kammal ih zat nop kei leh tua kammal munah bang kammal zang ding ih hia? ci’n ama ‘e mail’ mah tawh ka kitheihpih ngei hetloh pa mah ka dot kik leh, kamsia kampha munah ‘tuahsia tuahpha’ ih ci ding hi ci in hong dawng hi.

Bangbang ahi zongin ih Pasian upna ih sanna nidang tawh kibang lo in a san dan zong uang semsem dingin zong ka ki-ngaihsun a, hi ka sa peuhmah kawikawi zel hi.. Ih kammal zat dante zong picing semsem zong kasa a ‘khial hi’ cih giap dingin zong hi kasa thei tuan kei hi. Ih ci ta zongin lah aungbali kihon ciang a, aungbali thein sawm thein za ngahnate ah ‘tuahpha’ cih kammalte hong zathuai lo leuleu ahih manin, tua zong maan khin gai lo leuleu ding hi.

Khat lam pang pan ka ngaihsut leuleu ciangin ‘Pasian thupha’ cih kammal zong mun khempeuh ah zathuai takpi mah maw, Pasian thu tawh kisai leh a thu tawh kilawm kituakna munte ah zathuai bek maw cih zong ngaihsut huai ka sa kawikawi zel hi. Tua hi a ih pu pih pate khan lai, tang a tuan a ih zat khitsa kamsia kampha cih kammal pen beisak takpi ding maw ahih kei leh koi lai munah ih zang tam…? Pu Awn Za Pau

*Luck is what happens when preparation meets opportunity – Seneca, the Roman philosopher who was born in 5 BC
*In religion, blessing is the infusion of something with holiness, spiritual redemption or divine will.- Wikipedia