Kammal kilawm pawlkhat (Azom 29 May)

Kammal kilawm pawlkhat (Azom 29 May)

I hoihna themcik khatte i kisaktheihpih a, i hoihlohna tampi takte hangin i zum thei kei se hi.

Pilna nei khat in, apilna a zatsiam kei leh mihai pente gamtatna sangin siahuai zaw lai hi.

A geel ding leh a sem ding eite mah i hi-a, a taangtungsak ding pen bel, Pasian bekmah hi ding hi.

Eima hanciamna tawh pilna, siamna leh neih leh lamhte a kilawm ciang khat i nei kha mah dinga, ahi zongin tua pilna siamna leh neih leh lamhte kip sakin, man aneisak ding pen Pasian bekmah ahi hi.

Na khempeuh na deih bangin hong piang lo ding ahih manin, a piang bangbang tungah thuaksiam nading leh lungkim zawh nading kisin zaw in!

Pasian adingin a manpha mahmahte i hi hi. Tua hi-a, a manpha mahmahte ut bangbang a, mawk zat gawp dingin pammaih mahmah hi.

Mite umin muang leeng kikhial thei veve a, Pasian umin muang leeng kikhial ngei hetlo hi.

Lungkiatna pen guallelh nading hi-a, thuakzawhna pen gualzawh nading ahi hi.

Jesu anei leh aneilote kilamdan’na pen gah hoih leh gah hoihlo tawh hong kilangkhia ding hi.

Khazih sungah,

David Tuang