Kalaymyo Khuado Pawi tangthu

Kalaymyo Khuado Pawi tangthu

Kalaymyo pen Zomite tamtenna khuapi khat hi a, Zomi banah Falam, Hakha, Lusheite zong honpi khat mah kiteng khawmin, tuate lakah ngeina, pau leh lai kician anei pen Zomite mah ki hi hi. Kum simin Zomite kum khenpawi ahi “Khuado” zong ahunhunin Zomi ait mipawl khatte hanciamna tawh kibawlto zel in i lawmte in i “Khuado” pen “Buh thak neek pawi” Chanpcher kut” cih bangin min vawh uh a, ataktak in “Zomi Khuado” na hi lel hi.

Abeisa kum 30 hun lai-in zong Kalaymyo (Kawlpi) ah “Khuado” na kibawl in anung laisuan Banner ah “Chin Kum Thar” ci-in kisuangin, tua hun laitak a, Mandalay GTI sangkah Tg. Lian Khen Kham, Tg. Thang Khua Zam leh Tg. Suan Khan Dalte in dik/man salo bek thamlo in, om theilo in, Stage tungah kah in anung laisuan botkhia in paih sak uh hi.

Hih bangin i lawmte in i “Zomi Khuado” pen lam tuamtuam tawh hong suh sawmnate deih lohna hangin Tg. Thang Khan Dal leh Tg. Suan Khan Dalte thongah zankhat kikhumin, Tg. Lian Khen Kham leh Tg. Thang Khau Zamte mankha lo in kibucup uh hi.

Hih hun laitak in Pinlong Hausa Pa Khai Khen Mung hi a, Kalaymyo, Chin Social Cultural kipawlna makai Pa Dal Lam Ging hi a, Township Council President Bomoe Ye Win ahi hi. Nung laisuan bawh khiat man Ks. 2000/- liausak in thongkiate khah in thuhong veng thei hi. I gennopna ah i Zomi Khuado pen Zomite mah in thupi ngaihsut in, athupi theithei-in i omna ciat ah bawl in i kepcing ding Zomi vaipuak hi.

Related: Khuado pawi leh Pasian’ thu

Hih bangin “Khuado” a nacing, a nakem, a na hu, i ute thupisa in Pahtawi na i pia a, tu kum “Khuado” zong i omna ciat ah a thupi theithei-in bawl ciat ding hi hang ci-in i kihanthawn hi. GZA panin Khuado niding hong kipsakna hongneih masiah ZYA panin October khalik ni dingin i kikip sak hi. ZYA Weekly News