Kalay Myo: Tuicin Tung – Namthuam

Kalay Myo: Tuicin Tung – Namthuam

Zomi u leh nau akua mapeuh,
Kawlpi leh Kalay vellay teng, Zogam dongah, guah tam luatna hangin inn leh lo, nek leh dawn hakna te hangin ii dah mahmah hi. A piang ngeilo alau huaipi khat ii gam ii lei ah hong tung mawk hi.

US leh gam muntuamtuam pan pawlpi khempeuh, thu um mimal ciat in, ki dahpih leh ki lunghimawh pih mahmah in, thu ngetna ahi zongin, sum tha tawh huh ding te aki pan ki geel mahmah hi.

Tulsa pen zomite khuapi ii cih mah bangin, ZIOK makaipi Pu Sawm Lian in, mapan khop ding hong pulaakna aom bangin Myanmar Christian Church (MCC-Tulsa) in zong hih theihna lampi a om bangin mapan khop ding ki thukim hi.

Tua ahih manin, August 1, 2015 Haksatna thuak ii gam ii lei adingin antan thungetna leh August 2, 2015 niteh huhna ding sum leh paai kaih khop ding geelna lianpi ki nei hi.

Hih bangin Tuicin tungteh phawk kik, theih khak ding pawl khat:
1. Lai siangtho lui sungah Naw ii hun lai in, Tuicin na tung ngei a, tua pen ahang khat hi bangin in na gen hi. Mite mawhna lianlua, Pasian mai ah namsia lua mahmah ahih manin sawpsiangna in, tuicin na tung sak hi.

2. Lai siangtho thak sung leuleu ah: Topa Zeisu’n a ma hong pai kik nading a nai teh, zinlin, leh khuahun kikhelna, leh gial tun dingte zong na lim gen hi.

3. US gam sungah tuma kum 5 lai pawl in, Katri Huihpi nung in, Florida gam New Orleans khuapi leh a kiim khua teng tui in, sawp siang hi. Hih khuapi pen US gam a, Mawhna khuapi (Sin City) khat aki ciamteh hi. Nung deuh in, zong New York lam ah lamet loh pih in, huihpi nungin, tuipi in nawk to hi. A sawtlo in, zong US gam nitum na lam, California sak lam pan Washington State dong Tsunami om ding in, News pan ki zazel a, Zomi khat leh nih zong tua mun pan a kihemkhiakhia zong om cih zong ki za hi. Hih Tsunami hong tung leh, ni dang a Japan a sang suuk zaw lai ding in News in gen hi.

4. Pasian bawl sa mi hingte tungah haksatna khat peuhpeuh a tunsim in, mawk pian lo in, Pasian mahmah in, NGIMNA LEH GEELNA tawh a bawl hi tawntung zaw hi. Khuahun te Pasian BEK ii let hi a, ama deih bangbangin a hek ahihi.

5. Hih bang hunteh, ei Tapidaw thu um te ii khuavak hong nak taan mahmah ding ii lamen hi. I khuavak pen ii sepkhiatna, ii gamtatna hoih ahihi hi. Pasian theilo kawlmite lakah huhna leh khoina tawh amaute na huai peuh leng, Pasian thu ii genteh amau hong ngai nuam mahmah ding uhhi. Huhna leh khualna pen itna lakna ahih manin bang mah ii gen kei phial zong in, hong ki it limlim ding hi.(Kawlte paunak ah Talohsabuh Tuhkyizu) a cih kammalte phawk huai ka sa hi.

6. Zomi bup kipum khat in na sem khawm thei, leng, hih hun pen Tapidaw nuntakna man ii lakkhiatna ding hun khat in, Pasian hong bawl zong hi thei kha ding hi.

Hih na sepna ah, ZYA leh biakna lam ki pawlna tuamtuam te aw, na hanciamna uh thupi ka sa uhhi. Pasian in na gim natawlna teng uh ii gam leh ii nam a dingin thuphapi in hong bawl sak ta hen. No agim a tawl teng zong Pasian in a thak thupha tawh hong tuam ta hen. Amen

Lunghi mawhna lianpi tawh,

Sia Khaipi
Myanmar Christian Church
&
Myanmar Community Social Services Development
www.mcctulsa.com
http://myanmarcommunity.us