Kachin khuasung mite athatlum Myanmar galkap te kum 10 thongkiading thukipia

Kachin khuasung mite athatlum Myanmar galkap te kum 10 thongkiading thukipia

Myanmar, Kachin State sungah khuasungmi 3 aki thahlupna ah akihel galkap 6 te kum 10 ta hong akiading in Myanmar galkap thukhen te’n thupia uh cih AP News pan kiza hi. Kum 10 sung thongkiading bekthamlo, nasep hamsa “Hard Labor” semsakding cihzong ahihi.

Hihbangin lametloh laitak in Myanmar Military Tribunal te’n khauhtak in galkap te kum 10 ta thongkiading in thu apiakpen Rightg Groups te’n thupi samahmah uhhi.

Kachin State Police Office te’n agenkhiatna ah abeisa September khasung in Kachin khuasungmi te thahlupna ah akihel galkap tepen amawhna kiciantak in kimukhia ahih manin kum 10 sung thong akiading un Friday ni in thu akipia ahihi ci’n genkhia uhhi.

Hih thukhenna pen galkap te sungah amauleh amau “internal investigation” kibawl uh a, tuapan in thukhenna akinei ahihi.

Kachin State Police Officer khat ahi Min Zaw in agenna ah hih khuasung mite thahlupna ah akihel mi 6 tepen thusitna kinei in, amawhna te uh aki pulakkhiat uhciangin amauzong niallo in, khialmah ung ci’n ki pulakciat uh cihi.

Tua akithatlum Kachin khuasungmi 3 tepen Myanmar galkap te matcip ahihi. Akiman pen mi 5 hi a, tualak ah mi 3 aki thatlum ahihi. Tua khuasungmi Civilian tepen Hka Pra Yang kici khuageinai gamsung ah singtom in apai uh hi a, aomna uh Refugee Camp aciahlam in Myanmar Soldier te’n amat uh ahihi.

Tua galkapte matcip mi 5 lakah mi 2 tepen aomna uh Refugee Camp tungkik uhhi. Ahi zongin mi 3 tepen mangcip uh a, akikan ciangin aluanghawm uh akiphumna ki mukhia hi.

Rights Groups te’n hihbangin galkap te khauhtak in thukhenna akibawl cihpen abeisa ah omngeilo cihi. Ahi zongin hih thusitna, thukhenna pen apualam te theihlohding in “Closed Doors” in kibawl ahih manin, lamdang kisa hi.

Myanmar human rights specialist for Fortify Rights panin thunei khat ahi David Baulk in agenna ah hihbangin apualam te theihlohding in thukhenna aneih uhpen ahangkhat omding hi. Apualam ah hihthu aki thehzakloding, galkap te ii gamtatna aki theihlohding deihna hiding hi ci’n genkhia hi.

More: Union Ni le Panglong Tangthu Phawkkikna ~ Cope Suan Pau

Myanmar Military te ii gitloh ngongtatna pen kilimgen mahmah a, Human Rights tawh kituak vetlo hi ci’n aki encikden ahihi. Rakhine State sung ahzong Myanmar military te’n Rohingya Muslim te hawlkhia in, minam siansuahna nei uhhi. Akigawm in Rohingya mi 650,000 bang Myanmar gampanin taikhia uh a, Bangladesh gamsung ah lut uhhi ci’n Media tuamtuam te’n gen uhhi. Sawltak #zomidaily