Ka Zuapa

Ka it mahmah ka Pa ka pahtawina in, ama gelh ahi “Kammal kilawm,” tampite’ lak panin, ka phawkkhak pak teng hong hawmsawm nuam ing.

• I thuakna a tam ciangin, a guallel kibang a, ahi zongin gualzawh nading lampi a bawlbawl ihi gige hi.

• Bangbang ahi zongin thuak zo photphot leeng, i thumong hong nuam veve ding hi.

• Pau lo phun loin, i thuak keeikaainate Topa’n guaksuaksak het lo hi.

• Zahtakna ngahna pen sum tawh lei theih hi lo a, eima gamtat luhekzia tungah kinga zaw hi.

• Hong kisimmawh in, hong ki langpan’ leh ei leh ei i kitel nading hi zaw a, simmawhna leh langpan’nate ahoih lamin i thukik theih leh tua nungah thupha in zui hi.

• Siatna i pelh ding ciangin, Topa tawh i tonkhop tuan kei leh eima hih zawhna tawh i peel zo tuan kei ding hi.

• Pasian’ nasem ka hih mah bangin, mite’ na ka sepsak ciangin zong, Pasian adingin a sem mah bangin ka ki ngaihsun hi.

• Pasian’ nasemte pen lungduaina leh thuakzawhhatna i kisam den hi.

• Ka Pawlpi mite’n hong bangci muh cih ka tel kei a, ken bel ka pawlpi mite a ithuai a ngaihbaang in ka ngaihsun tawntung hi.

• Topa’ leenggah huan ah sep ding tampi om cih ka thei a, tua sungah vul in a keusa singkungte tuipia in, no suaksakkik ding pen thupi kasak mahmah khat ahi hi.

• Leitungah sawtpi nungta lo ding ihih manin, sawtpi a kimang ding na hoih sep ding leh tangthu hoih neih ding thupi ka sa hi.

• Ka tate it lua mahmah ka hih manin, midangte in a tate uh, kei it zahin a it zo lo ding bangin ka ngaihsun kha liang hi.

• Thunget nop lohna tawh mawh kei ni!

Ka nuntakna hong kheel mahmah ka Pa’ kammal zat khat;

“I biak Pasian leh kei na Pa mahmah uh nong it nong zahtakna un, vuihtheih khamtheih peuhmah na sukha kei un,” cih ahi hi.

Kha thu taksa thu-ah tate’ adingin, vaipuak kicing takin hong nei tawntung, ka it mahmah ka “ZUAPA” tungah, cidamna leh khansauna om hen la, Pasian in ama minthan’ gamzai nadingin hong zatsak semsem ta hen. Amen!

Khazih sungah,

David Tuang