Ka zilei’na thu ~ Lengtong Pauno

Ka zilei’na thu ~ Lengtong Pauno

1990,June, in Zongeina tawh Vangteh ah ka lawmnu kapi lai uh’n, leiitawh hong thuah khawmsak pahdinga ka nget uh himah hiven, ka sunghpa in, “Vangteh ah keibek mah a om kahi a, ka unau sanggam khempeuh Kalaymyo a aom ahihteh, sangkhak teh hong vaihawm zaw un” ci in hong nolh hi.

Hunte hongpaipai kipelhtoto, nuntak neekzon’ haksat hangmah tawh ko’ innkuan zong Hpakant pai kum 7 sawt, kei Malaysia pai kum 5 sawt, tate tangvalta, anu’ manh kipia nailo, nisim zansim a batneek batkheuh hiden.

Ka sunggpa hopih lenglah, “Hongpai naike’n” cidenmawk. Khangluite’n, ahun aphaat a zi leilohpen, akaamsiate’ adingin “Siluang tungtaanga mo kilei mah haksapen hi” cih akigen zangei, hong vaihawmsakding kuamah lah om tuanlo ahihmanin keizong Vangteha ka sunghpa Tuithangpan fon hopih. “Khualzin baih nading naneina pa?” kacih leh, “Neikeng” ci, ke’nzong, “Tua ai’leh, ong hawhning maw”… “Aw, ong hawh ou” cilian. Keizong, kei’ tunglian a ka unu leh, kabehsungua tangzang ka maingapteng zawnin, ka zilei dinga Vangteh pai pih.

Apaipen, ka unu leh keitawh mi 7 pha ung. Ka sunghpa amahbeklian na naom. Amah’n: “Bang thu om a mi hizah hongpai naivua Pau” hongci. Ke’n: “Pa aw, thu ka ngaihsutsutciang, iteen’na leitungpen natna sihna leitung hi a, denciang bangpiangding kuamah’n theikhollo hi hangh. Munkhai’nu Dimno bel naupaai, hongpai zolo hi in, Munkhaite unau zong dam.

Amau zong Pasian thupha tawh a tang valding hita uhi. Tua hi in pa aw, khanglui te’n, siluang tunga momanh kigen mah hamsa pen, acihmah bang un, kazi Dimno pen, na tanu hiven maw pa. Tu mahmahin nang’…ka tanu Dimno hong leikhin ciai Pauno… hongci lecin ahipah, nang’thu hilelmawk mataw pa. Tua hi a. Munkhainu’ vai siangsak leengci a, haksapi maha kabeh kaphung ka unu, amauteng zawna nangma tungah lunggulhna leh lametna lianpi tawh hongpai hi ung ei’ pa aw” kaci hi.

Ka sunghte beh papi Ngul Khen in, “Pau aw, ko’ Vangtehdan ah, sungh sabah acih khat neive ungin, aklui akpi akgual khatbek ahi zongin hong saangding hi ung. Kikawmna haksa ahihteh tutungin mansakpah leeng ka cihna hi” hongci ahih manin, keizong amau hong gawhcia dingmah vokkhat ka zongsak pah hi.

Ko’ Tuithang hileh amau honggawhsa pen akhe 3 kipuading hi a, amau a pen aliang khekhatbek akipua ahi hi. Tua nangawn khualgam nahih manvua sunsiahtaang a hongki puasak bek hi, ci lailai.

Video: Tung Solkha ~ Lengtong Pauno

https://www.youtube.com/watch?v=k9Tca5-b6U8

Tuithanga ka inna, ka baangkua haitawi tuitaak tengin lah, Zongeina mo sahawmding ngak a inn ah na omding uh cih thei ka hih manin, Vangtehpan Tuithang nikhat suahding, zingsang nai 3am a dingkhia ding kacih uhpen, 12am in ka paikhia uha, ka sapuak uh hawm thamcing loding ahihmanin Tedim sasai zingsang khuavakphet ka tung uha, moleii sahawmdingin voksa tawi 5. ka leibeh uh hi.

Tuithang ka inn ka tung uha, hong uap hong lungdampih sanggam ulenau behlephung innsung baangkua tanu haitawi pilepu leh ka pawlpi mite tampi na om uhi. Inn 93. apha laitak Tuithang AG Pastor kasep laitak zong ahi hi. Hihbangteng tawh tuani zana kipan abat neek nawnlopa kahita hi.

Hihlai asimkha khangno khempeuh, na mailam na maban uh Topa’n hong limcisak tahen.

Ka lungdam, Munkhai’pa