Ka zak den ngei thukhat ~ Timothy Naulak

Ka zak den ngei thukhat ~ Timothy Naulak

Ka zakdenngei thukhat in banghiam cihleh Kawlgam sung ah Galkap in hong uk pen hoih zaw hi, Galkap in hong uk kei leh migilo hongtam ding aa, mi nam khat leh khat, pawl khat lehkhat ect…. Ki do na , kit el khialh na, ki muh dah na tam in tua hang in ki buai zaw kha ding hi. Nek leh dawn k icing in, hoih tak hong uk peuh leh uh Galkap uk na mah ahoihpen hi. Tu laitak aa ih om dan ( Galkap ukna) mah ahoihpen, ki lem na om pen galmuang pen cih ahihi.

Kawlgam sung ah Galkap in thuneih na hong ngahkhit zawh kum tampi tak hi in mipi thuneih na (Democracy) tawh ki uk na maan hong theisak kha ngeilo uhhi. Galkap uk nagam te sang in Democracy ki uk nagam te ah galmuang zaw hi cih ih theih ding thupi masa hi. Banghang hiam cih leh Democracy gam ah migilo, buai na aom ciang in Palik ten ma hong la in, gal aom leh galkap mah in ma hong la pah lel uhhi. Galkap ki uk na gambek ah galkap in nasem theibek cih na hi zenzen lo hi.

Galkap cih ciang in gal aom leh asim ding ado ding hi uh aa, Democracy gam ahih man in galkap om nawn lo ding cih na hi peuhmah lo hi. Tulai tak kawlgam galkap bang ci leng pen International level taktak hi nai lo lai hi. Democracy taktak tawh ki uk na hoih ih neih ciang Galkap, Palik pen tulai tak aa Galkap, Palik dinmun sang in ahoih zaw leh a sensang zaw in ki puahphat toh hong kul ding hi. Tua ahih man in Palik, Galkap in gamsung daih na, galmuanna aom theih na ding in a vaipuak(tavuan) uh lian zaw tham lai ding cih na ahihi. Mipi thuneih na(Democracy) tawh ki uk na hi tah ci aa utut aa om theih, ut bangbang aa gamtat theih hi tuan lo hi.

Genteh na in ah mipi thuneih na hi ci in minam khat in minamkhat sim mawh, mi khat in mi dang khat sim mawh, bawl sia, numei buan, mi ki that akipan buai na tuamtuam bawl thei ding cih na hi zenzen lo hi. Galkap uk na sung ah mipi in thu ki neithei lo in Galkap te khutnuai ah ki om in hongsawl na bangbang ki mang in ki zui hi. Mipi thuneih na nuai leuleu takciang in Mipi in ih deihloh, thusia la sia aom ciang in Palik te deihbangbang in kisam in thubuai aom loh na ding, gal muan na aom theih na ding in galkap in ma hong la vatvat ding uh hi.

Cih nop na ah Palik, galkap te in mipi hoihna ding ahih nak leh mipi thu hongmang ding, mipi deihna bangin ma hong la ding, mipi te sawltak tangzang hong suak ding cih na hi zaw hi. Tua ahih man in ih gamsung ah, ih khua sung ah, ih vengsung ah buai na, haksat na ih neihciang, ahunlap in leh amanlang theipen aa hong huh theih na ding un Palik, galkap te zong atawntung aa akigingden ding in hong om ding uhhi.

US gam sung ah buai na khat aom ciang 911 nambat metziau aa palik, galkap akisap theih ziau mahbang in ih gam Kawlgamsung ah zong mipi ki uk na hoih , mipi thuneih na taktak (Federal Democracr) ki uk na tawh ih ki uk ni ciang galmuang in, hong nuam mahmah ding hi. Galkap uk na sung ah na om lai hongbang nawn lo ding aa vasa abuk pan aki khahkhia bang in suakta kisa in huihsiangtho na diik thei ding aa mihing manphatna na tel pan ding hi.

Tua niciang mipi in buai na ih neih leh haksat na ih neih leh tu laitak aa na hopih ngamloh, na gal etet, a muh khak ding uh zong na ut loh ih kih takmahmah galkap, palik te pen ahunlap in nang hong cing te leh na deih hunhun in nasap, na sawl te hong suak ding uhhi. Sate (pyine) tek ah palik om in galkap om ding aa, Unian(pythawngsuh) ah palik om in galkap om ding hi. A mau mun santek ah vaipuak(tavuan) hong la ding uh aa galkap thuneih na ( galkap uk na) hun lai bang dan hi lo in mipi sawltang zang te hongsuak ding uhhi.

Galkap uk na sung ah Galkap ten mipi te sawltangzang in nei uh aa mipi thuneihna (Democracy) ki uk na sung ah mipi in Galkap, palik te sawltangzang in nei uhhi. Tua ahih man in mipi thuneihna maan ih neih theih na ding thunget na leh tha leh ngal tawh ma la ciat ni. Timothy (Naulak)