Ka phawkkhak vilval kanu kam – 10

Ka Phawkkhak Vilval Kanu Kam – 10

Tan langh ka kah ding ciangin ka u tawh sangkah nuam lo-in zingsang sangpai hun sim in kibawl in ka kap den hi. Ka nu in ka pai nop na ding un ‘solek, leezin, kabasia’ cih bang tawh hong zol in sanginn ah hong kha zelzel hi. Ahi zongin ka nu ciah khit ciangin ka u tawh ka nu’ nung zui in ka ciah kik thei zel uh hi.

Zingsang khat ka nu in ka u tawh sanginn ah hong khak khit ciang in a nungzui in ka ciah kik uhi. Ka nu inn ciah nawn lo-in lo na kuan suak a, inn ka tun vua leh ka pa’n ciaang khat tawh nong na ngak hi.

“No bang cia, hong ciah pahpah” ci-in a ciaang tawi tawh sat dingin hong kithawi hi. Ka u tawh sanginn lam ah ka leh taai kik uh hi. Ka pa in zong sanginn ka tun dong uh ka nung uh pan in ciaang tawh hong zui-a, ciah ngam nawn lo-in tua ni bup sang ka kah uh hi.

More: Theikhol thei leng ~ Rev. Fr. Damian Dal

Nitak ka lup ding uh ciangin ka nu in ka u nau un hong sam in, “ No unau, banghang in sangkah nuam lo-in hih bangin om zelzel na hi uh hiam? Ko, na pa tawh ka neu lai un sang ka kah nop uh hangin na pu te, na pi te in sang kah ding hong phal lo ahih manin laipai khat zong sim thei lo hi ung. Ko na bat ding uh na pa tawh hong phal lo hi ung. Tu a kipan in sang kah nuam lo-in sang pan in hong ciah ciah nawn kei tapeuh un maw,” hong ci! By, Tg. Pau Khan Kap (October 2, 2014, Columbus, Oh)