Ka phawkkhak velval kanu kam (7)

Ka phawkkhak velval kanu kam (7)

Ka u te nih in pasal hong neihsatkhit ciangin ka u, ka nu leh ka pa tawh ko li bek inn ah ka om uhi. Ka sangkah tawh tuuk ahi zongin khal ahi zongin ka nu’ lo kuan na-ah ka huh kinken zo kei hi. Ka unau teng un ka om kim lai un, ka nu huhin ka unau un, lo ka kuan khawm thei zel uhi. Ahi zongin tu-in ka u te lah om nawn lo, ken lah ka nu huh kinken zolo lailai kahih manin ka nu pen lungleng kawm si leh gim kisa zungzung hi.

Ka nu in meeltheih khat peuh kham lam pai ding aom ciangin kam vaikhak in, nau te kiangah, ‘na nu un, hong hawh suk hen hong ci’, nong na paukhankapcihsak in ci-in kam vaikhak thei zel hi. Tua hang mah tawh in khat vei ka u zong Lungdam bawl leh Kumthak siim kawm in, a tano tawh hong hawh takpi hi.

Ka u te hong hawh sung nitak khat, kikhop tuak ciangin innciah nawn lo-in, lawmte tawh nungak hel in ka vaksuak hi. Ciahhak pian ka kisak hiven, inn katun ciangin ka nu leh ka pa a lupna tung vuah na paupau lai hi. Keizong paupih nawn lo-in, ka lupna ah damtak in ka lum khiankhian hi. Ihmu thei pah lo ka hih manin, ka nu leh ka pa te’ kiho na ka ngai ngai hi.

Tua leh ka nu in,“ koi sin aw, naute a koi ci lup tam, ka lungnuam kei, tho in va en dih ning,” ci-in ka pa a ho hi. Ka nu, meikhuat tawh a lupna khan uh pan in hong pusuak in ka paam vua alum, ka u ang aa, a tu nu en ding kasak leh en lo-in kheng phei in, ko lumna lam ah hong pai suak in ka lupna uh hong tun ciangin ka lulam hong en hi. Keizong ka mitsi in, a ihmu khem ka kineih a, khua phawk lo danin ka om hi.

Ka nu in a meikhuat tawi pen sualtung ah koih suk in, ka khe khuan aa ka puanza silh loh la-in hong kaai to a, ka tungah hong thuap beh sak hi. Tua ciangin kileh in a lupna khan vuah lut kik in ka pa kiang ah,“ a puan za khat nasilh kei tak pi ei” ci-in gen hi.

Kei, ki tangval sak in nungak bang ka hel keei hangin ka nu in, nau ngek khat bang, naupang meelmawl khat bangin hong cing in hong vilvil lai na hi mawk! By, Pau Khan Kap March 23, 2013