Ka nu uh ii Thupitna le ka zahtakna uh
Ka nu uh pen kum 65 bang val ta ahih manin Pi Luan Dim kici ta hi. Amah pen nausuak Syama hi a, Zomi a tamzaw in Syama Luan Dim ci in hong theih sak uh hi. A sangkahpih Zomi tampi tak zong ulian, mihau, mi minthang a suak tampi om hi. A zahtak huai tua bang ka nu’ gual ka pa’ gual mite in ka nu uh hong theih pih uh hi.
Pasian’ hehpihna tawh a cidamin tudong mah in khangno suak mahmah lai hi. Ka pa uh tawh tulaitak USA ah ka nau Pastor Paubawi’ Dallas Theological Seminary pan STM degree (May 9, 2015) lakna huh ah va kihel thei uh hi. Tapa 6 le tanu 3 ong nei uh hi. Ka vekpi un Pasian’ angvanna tawh ka damkim uh hi. Tu ahih leh 13 nei ta hi.
Ka nu pen kumpi sung panin kumcing pension tawh midwife pension a sang hi a, a sep sungin pahtawina laidal khat zong a ngah loh hangin nu tampite’ pahtakna ngah a, sepkhialh le sihsuah khat beek nei lo hi. Topa a zahtak mahmah mi khat hi a, Dolluang gam Thangsan-Mualzang khua ah piang in, Jesuh Khrih Tanpa le Topa in a san ciangin Sya Thang Gin in tuiphum a, tuni dong piangthak upna kician gupngah nu khat ahi hi.
Nausuak Syama pen Pimpih ah kum 9, Taklam ah kum 7, Vongmual ah kum lang, Tauleng ah kum khat le lang val, Dampi ah kha thum, Zozaang ah kum 18 val bang sem hi. A sepna khuate khua khat le khua khat tai 3,6,7 cih bang kigam la hi mah leh nau suak ding a zanzan in hong kisap hangin, a sam khuate’ kiangah thalawp tak le hehpihna nei takin, kumpi’ nu nasepna le Pasian a zahtakna hangin a mipihte nausuak gimna honkhia dingin mission a kuan khia den nu khat ahi hi. Sun hi leh zan hileh thopah in pai vingveng hi. Ama’ naudom nasepna hangin Zomi tampi takin nuntak lawhna ngah uh hi. Tua pen Topa’ piak thupha hi a, ko a tu a tate in ka angtan pih mahmah uh ahi hi.
Nausuah nasep tawh kisai-in ka nu in, nau susia nasep, zatang zatui zang ngei loin, tua banga sawm nute hong pai ciangin hoih takin taai in, thuhilh a, nau sia sak kei un. Bawl sia kei un, ci-in genpih tawntung hi. Abortion peuhmah ka nu un, nakpitakin langpan hi. Nuntakna a zahtakna le a khualna hi a, Pasian a zahtakna kilang hi. Paikhiatna 1: 
17na ah hih bangin na kigelh hi, “Ahi hangin naudomte in Pasian zahtak uh hi. Egypt kumpipa in amaute a thupiak bangin gamtalo uh a, nau pasalte nungta sak uh hi”. a cihna thu kimu thei hi. A lang khat leuleu ah ka nu un nau kihal sak ding, ahih keileh ta tampipi nei loh theih nadingin mihing’ pilna le siamnate zanga, ta tampipi neih se loh ding hanthawn thei zel hi. Ta tampipi neihna pen punna zaina hi tuan lo hi, ci hi. Zomi nupite a khualna thu khat mah ahi hi.
Ka nu un, Pasian zahtakna tawh kumpinu’ nasepna ah citak tek le thumaan takin semin, gamta a, mihingte nuntakna it in, nausuak gimna a thuak nupite a hehpih a huhna thupha hangin ko a tate zong Topa Pasian in tuni ciang damna thupha ong pia ahihna ka lungdamna uh a gen khia nuam ka hi uh hi. Laisim mimal Topa in thupha ong pia tahen!
On the behalf of my brothers and sisters
Evan. Suangh Dal
Comment piaknop aomleh...