Ka Nu’ phu ka lading hi ~ Tdkhen

Ka Nu’ phu ka lading hi ~ Tdkhen

America leh Germany kido lai-in, a lehlam lehlamah galkapte ngongtat thei mahmah uh a, na ki guksak leh numeite zawhthawhna tawh kibuanna a tam mahmah hi. Tua hangin inn leh lo tampi kisia hi. Jine-te innkuan zong a inn uh kang hi. A pa zong thautang lengsawn in kha in a si hi. A nu tawh amau gel bek om a, amah pen zato siamah hi-in, galkap liam tampite kem dingin zato ah a pai’ pah a kul ahi hi.

A nu a paisan ding haksa sa mahmah a, a paisan ding a ngaihsut ciangin kap kha zel a, a nu tawh a kap khawm zel uh hi.

A pai’hun ding tungta a, mawtaw in hong zawn ta hi. A nu tawh thu ngen khawmin, khitui luangin hong kikhen uh hi. Tua bang laitak mahin zong bomb a puakkham dam’dam’ hi. Tainih bang a pai’khit uh ciangin, Jine in a kisam mahmah khat mangngilh ahih lam hong kiphawk a, ahi zongin pulak pah ngam lo hi.

Mawtaw hawlpa in Jane’ mel a muh ciangin, “Bang kisam na hiam” ci-in donga, “Ka na a kitangsam khat mangngilh ing” a ci hi. Mawtaw hawlpa in zong pau nawn sese lo-in a mawtaw lehhawlin a kileh kik uh hi. Inn kong a tun ciangin lungkham’ tauna aw khat, innsungah a za hi.

Jine in zong bang ahi zen tam, ci-in thakhatin tum pah a, innkong a hon phetleh sual tungah a nu, guaktangin sisan tawh a kiphah gawp a mu hi. Galkap khat thakhatin tawlet(padenpauh)ah lengkhia a mu hi. A nu a etcian ciangin a awm-ah tem tawh a kidawt a mu hi.

Jine in a nu kawi’cip a sawm’ laitakin a inn gei-ah bomb hong kia a, mawtaw hawlpa in Jine suahtakpih nuam zaw ahihmanin, a baan-ah manin a mawtaw tawh a taipih vingveng hi. Jine in a inn kang a muh ciangin, a nu tawh kangtum ding cih ngaihsun ahihmanin, thuak’hak sa lua mahmah hi.

A nasepna mun, zato a tun ciangin, galkap liam tampi kepding a om a mu pah hi. A dahna tawh mawk’om theih thu hilo ahihmanin, a nu mah ngaihsun ngeungau-in, Pasian’ tungah ki-ap kawmkawm a, a sep ding peuh a sem samsam hi. Galkap liam tampi hehnemin, ama’ hangin galkap tampi in Jesu a muhlawh uh hi.

Khatvei galkap liam 10 hong kipuak a, siamahte in buaipih mahmah uh hi. Jine in zong galkap liam pha mahmah khat a buaipih laitakin, a gei-a pa in Jine pen na en gige a, a zan-lama nupi khat a buan’khit cianga, tem tawh a dawtlup nu’ tanu ahih lam a theih ciangin, a cih nading a thei kei hi. Jine in zong tua pa a muh phetmahin a nu thatpa ahih lam a tel hi.

Tawlet-a a lensuah laitakin a biangpawn phenphan a mu man hi. Jine in zong ama’ san a tun ciangin hoih tak mahin bawlin, a minte leh a nat dante a lai(ward)sungah a gelh sak hi. A nu thatpa’ min pen Loch ahi hi. Ji.ne in a nu’ phu a lak’ ding hun, lem a sa hi. Lak’ dingin zong kilawm a sa lel hi.

Loch in zong tua mah ngaihsun ahihmanin zanin zong ihmusip ngam ngei lo hi. Nikhatni-in Jine zong a duty hun hong tungta a, “Ka nu’ phu ka la ding hi” ci-in, sihna gutui tawh kigingsa in hong pai khia hi. Kongkhak a hon’ding ciangin ngaihsutna dang khat hong piang ngiau hi. A sep loh dingpi sem kha in a kingaihsun hi. Tua bangin konggei-ah hunkhat sung ding nilohin, amah leh amah a kisutsut hi. “Na galte na it in” cih thu in na dawntuah ngiau ahihmanin, lamdang kisa lua hi.

Nidangin a duty ding ciangin thu ngen den hi napi, tu-tung pen thunget ding phawk kha lo hi. “Kei hongitte in ka thu a zui ding uh hi” cih thu a lungsimah hong kiguang thuah leuleu a, Jesu’ min tawh midangte mah bangin a bawl’ding a khensat ta hi.

Konggei mahah khukdin sukpahin thu ngen a, a thongip sunga a zatui puakte a paikhia pah hi. A nu thatpa’ aadingin thu hong ngetsak ta hi. Tua-a kipanin a lungsim vangikpi teng tolhkhia a, maitai takin hong om kik thei hi. Tua ciangin kong hong a, mi khemoeuh muhna kibangin a en thei pah hi.

A banbanin a meimate uh puah sak a, tua laitakin Loch in a om na panin a na en gige hi. Bang zatui tawh hong sunlum zen tam, ci-in patau mahmah hi. Ama’ kiang hong tun ciangin hoih takin hopih a, a liammate dawmtakin a sawpsak hi. Midangte sangin hong limbawl’ zaw lai cih Loch in a muh ciangin, tel zo lo-in lamdang a sa lua mahmah hi. Siamah nu inlah amah tel mahmah hi, cih a tel sem hi.

Kalthum bang hong sawt ciangin, Loch zong teikhut tawh hong kilawn zo ta a, lamdang a sak mahmah siamahnu kiang hong tung masa pen hi. Loch zong siamahnu’ konggeiah hong ding phei-in, na mupah ahihmanin Jine in, “E, dam ta na ke-maw” ci-in na nuihmai hi. Loch pen a teikhut tungah kingamin, gen sawn ding zong thei lo-in a ling setset hi. Jine in tua banga om a muh ciangin, “Bang kisam na hiam, kong sepsak theih ding a om hiam” ci-in a dong pha hi.

Loch pen Jine’ lam zong nga ngam lo-in, “Na nu that ka hihlam hong thei napi-cin, hizah-a ka tungah hehpihna nong neih pen a bangci mi na hiam” ci-in a gen’ bangbangin ta dingin, a kihuamsa in hong dong hi. Jine in zong. “Tua thute gengen nawn kei in! Ka Topa in nangmah hongit ahihmanin, na tunga kong bawl’ bangbang ka Topa’ hong thupiak ahi hi.

Ama’ tungah lungdam zaw in! Nang kong bawlbawl laitakin zong, kei’ neih bang na neih nadingin ke’n thu hong ngetnget sak ing” a cih ciangin, Loch zong thakhatin a lungtang hong kitam kham in, khitui naptui tawh zaw-ningniangin a Topa kiang a zuan ta hi. Tdkhen