Ka naupa Thangno sih thu ~ Lengtong Pauno

Ka naupa Thangno sih thu ~ Lengtong Pauno

Ka naupa Tg. Cin Lian Thang (Thangno) pen, nautum’pa keima naukik 9 te’ lakah aphulciil’ (a Upen) pa ahi hi. Tedim, Sakollam ah 1966 in suakin Khampat No 1. ah khanglian hi. A tangvalno a patin Khamti suangkhuk, Hpakant suangkhuk cihte ah avialvaak hinapi in suangmanpha tokhalo in ameikhulawng (အက်ဇောပိုက်) vivebek tokha hiding hiven, Malaria lungno awn 7 khawngtawh vomliikliakin innlam ciahkik hi.

Yangon Sia Thangno’ (Sian Cin Thang’) sangah, Burmese tawh Laisiangtho Diploma hongzo hi. A sangkahnapan Yangon Yawga ngahkha hiding hiven, innlam ciahlo in Yangon city ah vai bang thaamsuak hi.

2011 February, 6 ni in, a omna Yekyaw veengpanin nai 10am teh Hmawbi lam paiding ci in, khuavak phetin vakkhia hi, ci. Botataung market geilam atun’teh, ahusamh, nak haksa sa ahitam? Tuakiimnai a ameeltheih Nu Mang (Pu Pu Thang) te inn asih nadingmun dingin avazuanta hongsuak hi.

Dongkikthei nawnlo ihih manin, tuaci hingel dinghi, cih upmawh thu agen ihita hi. Nu Ngai Khan Mang te innkuan tungah kamtawh genzawhloh itna leibat anei gige kahi hi. Topa’n thupha hong piaksak tahen.

Ka nau Thangno pen, asihin kum 44 pha a, lam 44 (44th St) ah si a, Yagon, Yekyaw ECC pawlpi te’n, Sia dinga azatzawh uh kha 4 pha hi. 4×5 = 20 hi a, ko’ unau amasa + anunung = 20 ka pha uh hi.

Video: Kashmir gampan itna ~ Thangno (Phamsa)

Nu Mangte’ inn nambat HNo. 26. hi a, Zolai alphabet A pan 26. na Z ahi hi. Z = Zeisu kiang zuan cihna ahi hi. Ka nau Thangno pen, ” Sihsiampa” ci in ka ciamteh hi. A khualak vakna a asivat ahihmanin,…

• Akem akhoi kuamah buaisaklo hi.
• Dangkasan peekhat zong beisaklo hi.
• A meigongding kuamah nusialo a,
• Kuamah tagah saklo hi.
• Amah a it ahehpih teng hii, galna phakna a akingah sumlepaai zatcing hi. Ka lungdam, Munkhai’pa