Ka muhpak US Gamthu pawlkhat – 46

Ka muhpak US Gamthu pawlkhat – 46

America Tung Tektek
Zomi/Chin bup vekpi US tung pen tawm mahmah nawn lo ding hi. A mi bupin 30,000 naii bang neh mahmahta in ka um hi. America tung tektek cih hangin ih tun dan kibang hetlo hi. Kum 1960 pan 1980 kikal atung pawlkhat om a, tuate pen Falam gamuk sung pan Lumbang khua mi vive tam hi. Tua hun lai in Kawlgam nuntak dan zong tua zahpi in haksa kisa lo banah US a va ten ding cih khawng kingaihsun ngam taktak nai lo banah, tup ngam dingin zong kingaihsun kha naii lo hi. Zong ki-ut vellvall hetlo hi.

1980 pan 1990 kikal ah biakna tawh kisai sangkah ding a pai pawl khat a om suaksuak hong om kiukiu hi. 1990 pan tuni ciangdong ahih leh, Guam pan ahon ahon a, atung masa pawl, Malaysia, Thailand leh India khawlmunte pan atung tampi tak ki-om hi. Tua kawm kal ah US Embassy zum pan visa ngah a, a om suaksuak zong om hi. Mi tawm mahmah pawlkhatte leuleu DV (Diversity Visa) tawh a tung zong ki-om kawikawi ta leuleu hi. Sum leh paai tampi bei lawh banah lu khaam luang khaam liang a, Mexico lam pan a pumlut a aki-ap pawl khat zong ki-om hi. Tua mah bangin Canada pan US a lut sim pawl khat ih om hi. Gam khat leh gam khat a kawm tembaw tung pan a tuak ziau zong lah om a ih tun dan khat leh khat kibang het lo hi.

Bangbang ahi zongin tu hun ciangin US tung Zomite lakah atam zaw pen, haksatna tampi a kithuak zawk diakna gamnawl gamgi teng pan zong a tamzaw tham hong kihel hi. Tedim, Tonzang, Cikha, Falam, Rihkhuadar, Haka, Thantlang, Mindat, Kanpetlet, Matupi, Rezua, Paletwa, Sami khuapite khawng bek tung ngei in Kawlpi, Mandalay, Yangon mu ngei nai lo a, US tung vingveng zong a lom a tang in ki-om phengphang hi.

Falam khangsiah Thantlang, Matupi leh Paletwa uksung bangah, India tawh gamgi kim a omteng mundangte sang in a milip in tampi tak USA tung uhhi. Siang gen mai leng Zomi USA tungte pen a tei tangsa a tung tawmkha a om mah bangin, Kawlgam ah zong Kawlgam khuapi a tung ngei nai lo, Mangpau cih thadah Kawlpau zong a thei kha naii a za kha naii lo ih mipih tampi kihel a, hi lai mun panin ih nuntak luina sung a, ih om dan tawh hong kikhai vat mahmah hong suak pah hi.

US akitun leuleu ciangin Kawlgam pan a athu thei laisiam laithei leh a pil zaw hiat akinei teng ahi, tan 10 ong leh degree ngahsa vive zong a om tei uh hangin, tua pilnate hong thupi sim sakpih het lo hi. Tua bang aa Zolai thei bek ahih kei leh sangkah lai sim ngei lote tawh, nek leh dawn sepna bawlnate leh inn leh lo mawtaw neih cihte akipan neih leh lam hong kikim ciangin, ih liangko hong kibang khin pah lel a, akua akua kineu et theih ding kisimmawh theih ding zong om lo hi. Tua kawm kal ah kithukhual sak in itna leh deihsakna takpi tawh thu leh la ih va mop nop hangin valh thei vat lo uh aa, a thalh kikkik pawl khat om lai uhhi. Cih nopna ah pawl khat in nang zong bang hi tuan na hiam hong ci ding dan vive zong na hi kawikawi thei zel uhhi. Tua ahih manin thu muamte in zong ih mop siam mahmah ding kisam mahmah hi.

Tua bang bilbial ban ah, ih Kawlgam ih Zogam sung ih om lai aa toi tak a ih neih ih lungsimte zompaih suak in, tangzai sak semsemin minam bup kipawl theihna ding ngaihsun ni citeng lo in, ei mau san ciat ah auau sa in ei aa’ tekmah ultung sak nuam in ih diang lunglung leuleu hi. Kihuaii kipawl liailiai ding kikem kikhoi lingling ding sangsik in ih kipawl khen nuam lunglung malam zel hi. A taktak in Zomite pen ih puansilh ih niikten, ih ngeina ih la ih paute in ei kigengen ei kizolzol kul lo aa, akigawm tuahsa akibang mahmah sa kim lai, minam aituam laak nopna leh huaiham vaii tawh ih kizung khenkhen nuam ta bung leh zaw niloh hi. Pawlcing kisa piante hong kituam huaii luailuai nuam zel uhhi. Bangkua phamawh panmun len hong zon sansan lai uhhi.

USA ii a khantoh dan pen khangto lua liang leuleu in ei gam ei lei tawh a kikhaih dan ih theih tek sa ahi hi. Tua zah a kikhaih mah bangin amau khat leh khat kizop dan ngeina dan ei gam ei lei zat dan tawh kibang het lo hi. Mi khat peuh in a suah ni bawl leh a lawm a gual a ki-itpih teng ansai khat peuh ah sam a, anneek man khit ciangin a pai teng in a mau neek zahzah tek sum pia ziauziau uhhi. Khat guak in sikh a kivak ngeiingaii cih khawng tam zat het lo uhhi. Dinner Club cih khawng zang mun mahmah uh aa ansai khat ah akithei a kingai diak leh department khat aa zum nasem teng cih bangin va pai in a mau duhtek an va ne uh aa, a man ciangin an man pen a mau tek in amau anneek man ciat pia tek pah lel uhhi.

Ei mite sung na ngawn ah sai ah an kineekpih vaii tawh kisai in American dan mah ki-een bawl leuleu in an kineekpihna ah kizang zang ta mai hi. Kawlgam pan a hong tun zawh a sawt nai lo nupi khat ama omna Gamke (State) dang pan hong hawh pak hi a, a sanggam nihte omna ah hong hawh hi. Anneek pih dingin khatpa in sam hi. A zin tunna tektek ah a sangampa zong om gegu napi, amah tawh sam khawm lo in a sanggam khat leh a zin tunna innteekte bek sam hi. Amah leuleu teh a sanggamte tawh kithuah khawm dingin sam beh a, ahi zongin anneek man pen amah leh amah kisikh dingin gen hi.

Amah leh amah kisikh zawzen ding cih pen ei ngeina tawh a ih ngaihsut kak teh, a lungsim sungah kituak kilawm zong sa het lo mahmah (awkward) ahi tam, a sim nuak zawzen ding lah kilawm sa liang lo in, ken hong zui nawn dah ning ee.. ci in hoih tak pha tak mah in gen kik hi. Tua zawh teh ih paina ding mawtaw kicing pha kei ven hong zui veve hoh ve leh, na mawtaw ih zang pah kei deh! a cih teh, amah zong anne ding cia kisam, an nang leh nang in an man pia ding ci, tun mawtaw kicing kei in na mawtaw zang nuam hang in hong zui le teh hoih in teh.. hong ci lailai, Kawlte’n Ma Aye in nih veitak thuak ( Ma Aye hnit khar nar) a cih linlian tawh akibang hi a, a kam tawh a dawn kik loh hangin “ Nu vaw! Pa vaw! Lai lai aw..!! cih ding loh ngal a dang gen ding om lo hi ci in akigen sawnsawn ka za ngei hi.

Bangbang a hi zongin a khangto mahmah gam nitumna gamte leh nisuahna gam a tengte ngeina pen kilehngat kitukalh mahmah a, hih ngaihsutna ah kua zaw maan zaw cih gen hak veve hi. Ni suahna lam pan a tungthakte a’ding in kilawm bel kisa nai het lo mah ding ahihi. Sam vet kei leh a lung a nuam zaw ding bang khat ahihi. A hi zongin hun khat teh khangto mahmah leng, ei gam ei lei zongah tua bang ngeinate ih zuih hun hong tun hamtang ding zong ahun kigenthei nai lo bek a hun khatteh tua bang dan aa ih zat takpi ding hun hong tung kha ngeelngeel thei takpi ding hi. Singapore ah mite kamzat dan; sum na neih kei leh kihopih vet dah ni. No money! No talk! cih dan hi ta mai ding hi.

Khat leuleu Kawlgam pan a, Mang pau Mang lai siamsa khat tuah thu zong tampi tak om lai hi. Amah pen Kawlgam ah zong za lian ngei khat hi a, mawtaw zong a hawlhawl ngeingei khat mah ahihi. America a tun zawh a sawt lo in mawtaw tawh a vak leh ei mite in lamdang sak tuak zawzen in, nang zong mawtaw na hawl thei ta maw..Pa ..?, siam baih si teh nang lah uham khin ta cin a.. cih khawng, Mangpau siam baih si teh cik a na sin manman na hia..?, Mang lai khiatna tampi tak na thei ngangtang bilbel sa veng aw.. cih khawng a kicih ciangin thuak hak a sak hun zong tam vei mahmah hi. Tua ka cih ciangin USA tung tektek ih hih hangin khat leh khat ih kibat loh zia a gengen nuam zaw ka hihi. (Kei leh kei ka kicihna hi peuhmah lo hi. Mi dang khat tuah thu ahi bangbang a kong gelh hi. AP)

(azom omlai hi…)

Agelh: Awn Za Pau