Ka muhpak US Gamthu pawlkhat – 35

Ka muhpak US Gamthu pawlkhat – 35

Vaimiim Cimh Mah Huan Tangtang
USA ah Kawl an khempeuh ban ah, Zo an khempeuh gatam lo buang a kimin kizuak hi. Vaimiim suksa Mexican sai ah kingah hi. Vaimiim tawh ciauhpih ding meibe, patlak be, belawi, beli leh anzo teh, maiteh, maipaak, maino, anhialteh a khempeuh in kingah hi. Gatam a omloh hangin besan khawng buh khawng mah tawh gatam bangmah a, athuk kibawl thei hi. Inn lamah ka neulai a kipan vaimiim ciim pen zantak an (staple food) a zing leh nitak kine ahi a, hi laitak zongah zantak an in mang in sum cil bawl zo leng tampitak a nemtuam kankan ding ahihi.

Tua ahih kei leh zong bawngsa, aaksa khawng tawh ciausukin vaimiim sa ciim in huan leng lim mahmah kan lai hi. Mexicante zong tua dan mah in ne ahih manin, vaimiim suksa deih zahzah in kizuak hi. Ahi zongin ei lam bang a, alim zaw kan ding a, agau lai aa, siikbeel pei tawh ih kan hulte omlo in a lo pho vive ahihi.

Vaimiim gau ki-ngah den ahih manin vaimiim gau ngeekte tawh/ ahih kei leh vaimiim bung sung aate tawh ciausuk leng a tuikhumin ei lam a ih kanhulte mah tawh kibang pah lel a lim mahmah hi. Zasan tawmtawm, mantasan, sing (ginger) gawm khawmin sathau tawh kangin meh leng limlua kisa in ‘ neel hum na’n pha ’ in kitawp thei nawn lo zah dong hi.

Tua ahih manin sum bei ding cihna tawh hi zawzen sam lo in, neu lim aa khankhiatpih vaimiim ciim leh zasan mah lim ka sa den zaw aa, a tawm pen nipi khat in khat vei kei ai tuam dingin ka huan tangtang thei uhhi. (Lo-pho = Vaimiim a gau lai hi lo in a gawte a bawk abawk in kikhai a, tuate neek ding a summ sung a ih suk tawm a ih huante pen ‘a lopho’ kici hi.)

(azom omlai hi…)

Agelh: Awn Za Pau